SSPP/SSA 11.10.2021
ၼႂ်းဝူင်ႈပူၼ်ႉမႃးၼႆႉ ၼႂ်းမိူင်းမၢၼ်ႈပိုၼ်ႉတီႈ လႆႈပဵၼ်ပၢင်တိုၵ်းၵၼ်တၢင်းၼမ် လႄႈ ၸုမ်းၶွင်ႇသီႇ သိုၵ်းမၢၼ်ႈ လႆႈလူႉတၢႆၵႂႃႇ 427 ၵေႃႉ ယူႇတီႈလူင်ပွင်ၸိုင်ႈ NUG ဢွၵ်ႇၶၢဝ်ႇၵႂႃႇၼင်ႇၼႆ ။
တေႇမိူဝ်ႈ လိူၼ် September, 28 ဝၼ်း တေႃႈထိုင် လိူၼ် October,04 ဝၼ်း လႆႈၵဵပ်းသဵၼ်ႈမၢႆမၼ်း ၸွမ်းၼင်ႇလႆႈႁူႉဝႆႉၼ်ႉ ၸုမ်းၵေႃႇၵၢၼ်ႁၢႆႉ ၶွင်ႇသီႇသိုၵ်းမၢၼ်ႈ မီးလွင်ႈမၢတ်ႇၸဵပ်း မွၵ်ႈ 183 ၵေႃႉ ဝႃႈၼႆ။
ဝၢႆးသေၸုမ်းၵေႃႇၵၢၼ်ႁၢႆႉၶွင်ႇသီႇသိုၵ်းမၢၼ်ႈ ၶဝ်သိမ်းဢႃႇၼႃႇမႃးၼႆႉ ႁဵတ်းႁၢႆႉၼိူဝ် ၵူၼ်းမိူင်း ဢၼ်ဢမ်ႇမီးတၢင်းၽိတ်း 26 ပွၵ်ႈသေ ၵူၼ်းမိူင်းဢၼ်ဢမ်ႇမီးတၢင်းၽိတ်းလႆႈတၢႆယွၼ်ႉ မီး 14 ၵေႃႉ ၼႂ်းၶၢဝ်းတၢင်း 8 လိူၼ် ဝႃႈၼႆ။
မိူဝ်ႈလဵဝ်ၵေႃႈၸုမ်းတပ်ႉၵႅတ်ႇၶႄပိုၼ်ႉတီႈ NUG လႄႈ ၸုမ်းၵေႃႇၵၢၼ်ႁၢႆႉ ၶွင်ႇသီႇသိုၵ်းမၢၼ်ႈ လႆႈပဵၼ်ပၢင်တိုၵ်းၵၼ်ႁႅင်း သေ ၵူၼ်းမိူင်းဢၼ်ဢမ်ႇမီးတၢင်းၽိတ်းသင်ၸိူဝ်းၼၼ်ႉ လႆႈလူႉတၢႆ ၊ လႆႈထုၵ်ႈတီႉၺွပ်းတူၵ်းၶွင်ႈ ၊ လႆႈထုၵ်ႈၽဝ်ႁိူၼ်းယေးတၢင်းၼမ်ၼႆ ၵူၼ်းပိုၼ်ႉတီႈၵေႃႉၼိုင်ႈလၢတ်ႈၼႄ ဝႃႈၼႆ။
ၸုမ်းၵူၼ်းဢၼ်ပႂ်ႉတူၺ်းၸွႆႈထႅမ် ၼႂ်းမိူင်းမၢၼ်ႈ ဢေႇဢေႇပီႇပီႇ(AABB) ၼၼ်ႉ ပိုၼ်ႉၽၢဝ်ႇဝႃႈ – မိူဝ်ႈလဵဝ်ၵွပ်ႈပိူဝ်ႈ ၸုမ်းသိုၵ်းၵေႃႇၵၢၼ်ႁၢႆႉသိမ်းဢႃႇၼႃႇ ၶွင်ႇသီႇသိုၵ်းမၢၼ်ႈ ၶဝ်ႈပိုတ်းယိုဝ်းၶႃႈတၢႆ ၵူၼ်းမိူင်း လႆႈလူႉတၢႆ မီးမွၵ်ႈၸမ် 1,160 ၵေႃႉ ၊ၵူၼ်းမိူင်းဢၼ်လႆႈၶၢမ်ႇတူၵ်းၶွၵ်ႈ မီး 8,700 ၵေႃႉ ဝႃႈၼႆ။
မိူဝ်ႈလဵဝ် ၸုမ်းသိုၵ်းလူင်ပွင်ၸိုင်ႈ NUG တေႇသၼ်ၶၢၼ်းပိုတ်းယိုဝ်းၵၼ်တင်း ၸုမ်းသိုၵ်းၵေႃႇၵၢၼ်ႁၢႆႉ ဢၼ်မိၼ်းဢွင်ႇလၢႆႇ ဢွၼ်ႁူဝ် ဢုပ်ႉပိူင်ႇၼႂ်းမိူင်းမၢၼ်ႈၸိူဝ်းၼၼ်ႉ တေႇဢွၼ်ႇၵၼ်တိုၵ်းတေႃး မႃး ၸဵမ်မိူဝ်ႈ ဢွၵ်ႇၶၢဝ်ႇ လိူၼ် September,7 မႃးၼၼ်ႉ ဝႃႈၼႆ။
Source : DVB
