SSPP/SSA 06/10/2021
ၸုမ်းသိုၵ်း RCSS ႁၢင်ႈၵၢင်မၢၵ်ႇသႂ်ႇ ၵွၼ်ႇထူဝ်း Control တိူဝ်ႉၺႃးၸုမ်းၵူၼ်းၼုမ်ႇ SSPP/SSA ဢၼ်တိုၵ်းၵႂႃႇ ၶဝ်ႈႁူမ်ႈပိတ်ႉမၢၵ်ႇၼင် ၸွမ်းၸုမ်းၵူၼ်းၼုမ်ႇ ဝၢၼ်ႈႁွင်းလူင်သေပွၵ်ႈၶိုၼ်းယၢမ်းၵၢင်ၶမ်ႈ ။
မိူဝ်ႈဝႃး ဝၼ်းလိူၼ်သိပ်းလပ်း ဝၼ်းထီႉ 05/လိူၼ်ဢွၵ်ႇထူဝ်ႊပိူဝ်ႊ-2021 ၼၼ်ႉ ယူႇတီႇၸုမ်းၵူၼ်းၼုမ်ႇ ဝၢၼ်ႈႁွင်းလူင် ၸေႈဝဵင်းၼမ်ႉၶမ်း လႆႈၽိတ်ႈမွၵ်ႇ ၸုမ်းၵူၼ်းၼုမ်ႇ ပႃႇတီႇမႂ်ႇသုင်ၸိုင်ႈတႆး SSPP/SSA ဢိၵ်ႇပႃးတင်း ၵူၼ်းၼုမ်ႇ တီႈဝၢၼ်ႈႁွင်းလူင် လဵၼ်ႈမၢၵ်ႇၼင် တီႈဝၢၼ်ႈႁွင်းလူင် ဝဵင်းၼမ်ႉၶမ်း ယၢမ်းဝၢႆးဝၼ်း (15:00) မူင်းၼၼ်ႉတေႃႇထိုင်ယၢမ်းဝၢႆးဝၼ်း (17:00)မူင်း ၊ ဝၢႆးသွင်ၽၢႆႇလဵၼ်ႈမၢၵ်ႇၼင် ပိူဝ်ႈတႃႇလွင်ႈမိုတ်ႈၵိုဝ်းၸမ်ၸႂ်ၵၼ် ထိုင်မႃး ၵၢင်ၶမ်ႈယူႇတီႈၵူၼ်းၼုမ်ႇ ဝၢၼ်ႈႁွင်းလူင် ၽိတ်ႈမွၵ်ႇ ၵိၼ်ၶဝ်ႈ ႁူမ်ႈမူႇၸွမ်းၵၼ်ၵႂႃႇယူႇ ၊ ဝၢႆးၵိၼ်ၶဝ်ႈယဝ်ႉ မိူဝ်ႈၶိုၼ်းပွၵ်ႈၶိုၼ်းၼၼ်ႉ လုၵ်ႉဢဝ်တီႈ ပၢင်ၵိၼ် ၶဝ်ႈႁူမ်ႈမူႇ ဢွၵ်ႇၵႂႃႇဢမ်ႇပေႃးၵႆ မိူဝ်ႈႁွတ်ႈၽႅဝ် တီႈႁူဝ်ၶူဝ် ၽၢႆႇဢွၵ်ႇမၢၼ်ႈႁွင်းလူင် ၼၼ်ႉ ထုၵ်ႇၺႃး ၸုမ်းသိုၵ်း RCSS ပႂ်ႉဢဝ်မၢၵ်ႇ ၵွၼ်ႇထူဝ်း Control မဵဝ်းမၢၵ်ႇဢၼ်ႁဵတ်းဢဝ် မိပ်ႇတႅၵ်ႇသႂ်ႇတိူဝ်ႉၺႃး လႄႈ ႁဵတ်းႁႂ်ႈ ၵေႃႉပဵၼ်ၶူးသွၼ် ၸၢႆးယွတ်ႈမၢဝ်း ၽူႈၶဝ်ႈၸုမ်းၵူၼ်းၼုမ်ႇ ငဝ်ႈငုၼ်း SSPP/SSA တိူဝ်ႉမၢတ်ႇၸဵပ်း လႆႈလူႉသဵင်ႈၵႂႃႇ ။
ၵဵဝ်ႇလူၺ်ႈလွင်ႈၼႆႉသေ ယူႇတီႈၽူႈၵဵဝ်ႇၶွင်ႈ SSPP/SSA လၢတ်ႈၼႄဝႃႈ – ၵူၼ်းသိုၵ်း RCSS ၼႆႉယူႇဝႆႉ ၽၢႆႇတူၵ်းၶူဝ် ယူႇၸိူဝ်းတူင်ႈၼႃးသေ ဢဝ်မၢၵ်ႇၵွၼ်ႇထူဝ်း Control ၸႂ်ႉၸွမ်းမၢၵ်ႇပွမ်းဢၼ်ႁဵတ်းဢဝ်သေ မိပ်ႇသႂ်ႇၵူၺ်း ၵူၼ်းဢၼ်မႃးမိပ်ႇသႂ်ႇၼႆႉ ပဵၼ်ၽၢႆႇဢုပ်ႉပိူင်ႇ လႄႈ ၸၢႆးငၢၼ်ဝၢၼ်ႈၵူၺ်း ၵွပ်ႈပိူဝ်ႈၶဝ်ယူႇဝႆႉ ၸိူဝ်းၽၢႆႇတူၵ်းၼမ်ႉမၢဝ်းယူႇဝႆႉၸိူဝ်းၼႆႉယူႇ – ဝႃႈၼႆ။
ၸၢႆးယွတ်ႈမၢဝ်းၼႆႉ ပဵၼ်ၵူၼ်းၼုမ်ႇ တီႈ SSYCBY သေတူင်ႉၼိုင်ၵၢၼ်မေႃသွၼ် ပၼ်ပိုၼ်ႉႁူႉၵူၼ်းၼုမ်ႇ လႄႈ ပဵၼ်ၽူႈႁွင်ႉၵႂၢမ်း ၽူႈသူင်ပၢႆးမွၼ်းၵေႃႉၼိုင်ႈယူႇဝႃႈၼႆ။
