SSPP/SSA 02/10/2021
သိုၵ်း RCSS ၶဝ်ႈတီႉၺွပ်းၵူၼ်းမိူင်း ဢၼ်လုၵ်ႉတီႈဝၢၼ်ႈၶိုမ်းမႂ်ႇ ပၢႆႈမႃးယူႇၼႂ်းဝဵင်းၵျွၵ်ႉမႄး တီႉၺွပ်း ပူႇၵၢင်ႉ ဝၢၼ်ႈၶိုမ်းမႂ်ႇ ၵႂႃႇပႃးဝႃႈၼႆ။
မိူဝ်ႈဝၼ်းထီႉ 30/09/2021 ၶၢဝ်းယၢမ်းဝၢႆးဝၼ်း (02:00) မူင်းဝၢႆးဝၼ်းၼၼ်ႉ ယူႇတီႈၸုမ်းသိုၵ်းRCSS ၶဝ်ႈတီႉၺွပ်း ၵူၼ်းမိူင်း (4)ၵေႃႉဢၼ်လုၵ်ႉတီႈဝၢၼ်ႈၶိုမ်းမႂ်ႇ ပၢႆႈမႃးသွၼ်ႈယူႇဝႆႉ တီႈၼႂ်းဝဵင်းၵျွၵ်ႉမႄး လူၺ်ႈဢၢင်ႈၶေႃႈဝႃႈ ၵွပ်ႈႁွင်ႉၵႂႃႇၸွမ်းၵူၼ်းဝၢၼ်ႈ ဢၼ်ၵႂႃႇမီးဝႆႉ တီႉဝတ်ႉၵျွင်းဝၢၼ်ႈလဝ်း ၸေႈဝဵင်း ၵုၼ်ႁိင်း ဢမ်ႇၵႂႃႇၸွမ်း လႄႈ ၸင်ႇလႆႈတီႉၺွပ်းၵႂႃႇဝႃႈၼႆသေတႃႉ ယူႇတီႈၵူၼ်းဝၢၼ်ႈၶိုၼ်းမႂ်ႇ တႄႉ လၢတ်ႈဝႃႈ ၵွပ်ႈလုၵ်ႈၸၢႆး ဢၼ်ၵႂႃႇႁဵတ်းသိုၵ်း RCSS ၼၼ်ႉလၵ်ႉပၢႆႈ လႄႈၸင်ႇလႆႈတီႉၺွပ်းၵႂႃႇၵူၺ်း ဝႃႈၼႆ ။
ၸၢႆးဢုင်း ၵူၼ်းၵျွၵ်ႉမႄးၵေႃႉၼိုင်ႈ လၢတ်ႈတီႈၸုမ်းၶၢဝ်ႇႁဝ်းၶႃႈဝႃႈ – “ဢၼ်ၶဝ်လႆႈတီႉၺွပ်းၵႂႃႇၼၼ်ႉ ယွၼ်ႉဝႃႈပဵၼ်ပေႃႈမႄႈ ၵူၼ်းသိုၵ်း RCSS ဢၼ်လၵ်းပၢႆႈတပ်ႉၵႂႃႇၼၼ်ႉၵူၺ်းၶႃႈ ၶဝ်ပၢႆႈၶဝ်ႈမႃးယူႇ ၼႂ်းဝဵင်းၵျွၵ်ႉမႄးယဝ်ႉ ၵူၺ်းၵႃႈ ၶဝ်ၶိုၼ်းမႃးတီႉၺွပ်း ဢဝ်ပေႃႈမႄႈၶဝ်ၶိုၼ်း ၶႃႈဢေႃႈ လွင်ႈၶဝ်မႃး တီႉၺွပ်းၼႂ်းဝဵင်းၼႆႉ သိုၵ်းမၢၼ်ႈတင်း ပလိၵ်ႈၸိူဝ်းၼႆႉၵေႃႈ မီးယူႇ ၵူၺ်းၵႃႈ ၶဝ်ႁဵတ်းႁိုဝ်ၺီႉၵၼ်သေ ၶဝ်ႈမႃးၺွပ်းၵႂႃႇတႄႉဢမ်ႇႁူႉၼင်ႇၵဝ်ႇၶႃႈ ဢၼ်ၶဝ်မႃးၺွပ်းၵႂႃႇၼႆႉ ပႃးတင်းပူႇၵၢင်ႉဝၢၼ်ႈၶဝ်ၵေႃႉၼိုင်ႈ ဢေႃႈ” ဝႃႈၼႆ ။
ၵူၼ်းၸိူဝ်းဢၼ်ထုၵ်ႇသိုၵ်း RCSS တီႉၺွပ်းတူဝ်ၵႂႃႇၼၼ်ႉတႄႉ (1) လုင်းတိၼ်ႇဝိၼ်း ပဵၼ်ပူႇၵၢင်ႉ ဝၢၼ်ႈၶိုမ်းမႂ်ႇ ၊ (2) လုင်းပွႆး၊ (3) ပႃႈပဝ်း၊ (4) ပႃႈသူၺ်ႇၵျႃႇ ပဵၼ်ၵူၼ်းဝၢၼ်ႈၶိုမ်းမႂ်ႇ ဢၼ်ပၢႆႈမႃးသွၼ်ႈယူႇဝႆႉ တီႈဝဵင်းၵျွၵ်ႉမႄး ဝႃႈၼႆ ။
လွင်ႈဢၼ်တီႉၺွပ်းၵႂႃႇၵူၼ်းဝၢၼ်ႈၶိုမ်းမႂ်ႇ 4 ၵေႃႉၼႆႉ လုင်းတိၼ်ႇဝိၼ်း ၵေႃႉဢၼ်ပဵၼ်ပူႇၵၢင်ႉ ဝၢၼ်ႈၶိုမ်းမႂ်ႇၼၼ်ႉ ထုၵ်ႇၺႃးတူတ်ႈတၢမ်ႇ ၶင်ၶွၵ်ႈတႂ်ႈလိၼ်ဝႆႉတီႈတပ်ႉႁူးသူၼ် ယွၼ်ႉလွင်ႈတၢင်းသင် တႄႉ ဢမ်ႇလႆႈႁူႉၸွမ်း တႃႇထႅင်ႈ 3 ၵေႃႉတႄႉၵေႃႈ ၺႃးၶွၵ်ႈၶင်ယူဝ်းယူဝ်းၵူၺ်း ဝႃႈၼႆ။
ၵူၼ်းဝၢၼ်ႈၶိုမ်းမႂ်ႇ ၵေႃႉၼိုင်ႈ ဢမ်ႇၶႂ်ႈဢွၵ်ႇၸိုဝ်ႈ လၢတ်ႈၼႄႁဝ်းၶႃႈဝႃႈ-“ ၸႂ်ႈၶႃႈဢေႃႈ ဢၼ်တီႉၺွပ်း ၵႂႃႇၼၼ်ႉ မၼ်းပဵၼ်ၵူၼ်း ဝၢၼ်ႈၶိုမ်းမႂ်ႇ ႁဝ်းၵူၺ်းၶႃႈ ပႃးတၢင်းပူႇၵၢင်ႉႁဝ်းၵေႃႉၼိုင်ႈ ၵွၼ်ႇဢေႃႈ ယွၼ်ႉၶဝ်ႁူႉဝႃႈ လုၵ်ႈၸၢႆးၶဝ်ဢၼ်ၵႂႃႇႁဵတ်းသိုၵ်း RCSS ၼၼ်ႉ လၵ်ႉပၢႆႈၵႂႃႇယဝ်ႉၼႆၶႃႈ လႄႈ ၶဝ်ၵေႃႈၸင်ႇလႆႈ ဢွၼ်ၵၼ်ပၢႆႈ ၶဝ်ႈၵႂႃႇယူႇတီႈၼႂ်း ဝဵင်းၵျွၵ်ႉမႄး ယူႇဢေႃႈ ၵူၺ်းၵႃႈ RCSS ၶဝ်ၵေႃႈယင်းတိုၵ်ႉၸႂ်ႉၵူၼ်းၶဝ်ၸွပ်ႇသေ ပေႃးႁူႉယဝ်ႉၵေႃႈ ႁွင်ႉဢဝ်ၵူၼ်းသိုၵ်းၶဝ်မွၵ်ႈ 6/7 ၵေႃႉသေ ၺီႉၵၼ်တၢင်းသိုၵ်းမၢၼ်ႈ ၶဝ်ႈၺွပ်းၽႅဝ်တီႈၼႂ်းဝဵင်းၵျွၵ်ႉမႄး ၵွၼ်ႇၶႃႈ၊ ၵူၼ်းဝၢၼ်ႈႁဝ်းၶႃႈၵေႃႈ ဢၼ်ဢမ်ႇႁတ်းယူႇတီႈၼႂ်းဝၢၼ်ႈ ဢၼ်ပၢႆႈၵႂႃႇၵေႃႈၼမ်မႃးၶႃႈဢေႃႈ၊ လႆႈငိၼ်းဝႃႈတေႉ ၵူၼ်းဢၼ်လႆႈထုၵ်ႇၺႃး ၸုမ်းသိုၵ်း RCSS ၶဝ်ၺွပ်းတူဝ်ၵႂႃႇၼၼ်ႉတေႉ ဢဝ်တူဝ်ၶဝ် ၵႂႃႇမီးဝႆႉတီႈ ဝၢၼ်ႈႁူးသူၼ် ၼႆၶႃႈဢေႃႈ” လၢတ်ႈဝႃႈၼင်ႇၼႆ ။
ၵူၼ်းၸိူဝ်းဢၼ်ထုၵ်ႇသိုၵ်း RCSS တီႉၺွပ်းတီႈၼႂ်းဝဵင်းၼႆႉ လုင်းတိၼ်ႇဝိၼ်း ၊ လုင်းပွႆး ထုၵ်ႇတီႉၺွပ်း တီႈ ပွၵ်ႉ (7) ၊ ပႃႈပဝ်း ထုၵ်ႇတီႉၺွပ်း တီႈပွၵ်ႉ (2) ၊ ပႃႈသူၺ်ႇၵျႃႇ ထုၵ်ႇတီႉၺွပ်း တီႈပွၵ်ႉ (8) ၼႂ်းဝဵင်းၵျွၵ်ႉမႄး တင်းမူတ်း ဝႃႈၼႆ ။
Source : Local
