SSPP/SSA 06.10.2021
မိူဝ်ႈဝႃး ဝၼ်းထီႉ 05.10.2021 တီႈမိူင်းၶၢင်ၸေႈဝဵင်းမိူင်းမွၵ်ႇၽၢႆႇသိုၵ်းမၢၼ်ႈထူဝ်းသၢႆသိုၵ်း လႄႈ ၸုမ်းသိုၵ်းၶၢင် KIA ဢဝ်မၢၵ်ႈတႅၵ်ႇပွႆႈသႂ်ႇၵႃးသေ သွင်ၽၢႆႇမီးလွင်ႈပိုတ်းယိုဝ်း ၽၢႆႇဢွၵ်ႇၶၢဝ်ႇ KIO လၢတ်ႈၵႂႃႇ ၼင်ႇၼႆ ။
မိူဝ်ႈဝႃး October , 5 ၼႂ်းမိူင်းမွၵ်ႇ ႁိမ်းဝၢၼ်ႈမျဵဝ်ႉတိတ်ႉ မၢၵ်ႇလႆႈတႅၵ်ႇယဝ်ႉ မီးလွင်ႈတိုၵ်းယိုဝ်းၵၼ် တင်းၶွင်ႇသီႇသိုၵ်းမၢၼ်ႈၼႆ ၽၢႆႇၸုမ်းသိုၵ်းၶၢင် ၸဝ်ႈသိုၵ်းၼေႃႇပူႇ ၼိုင်ႈၵေႃႈ လၢတ်ႈဝႃႈၼႆ။
ၸဝ်ႈသိုၵ်းၼေႃႇပူႇ ၼႂ်းသိုၵ်း KIA သိုပ်ႇလၢတ်ႈဝႃႈ- ၵွပ်ႈသိုၵ်းၶွင်ႇသီႇသိုၵ်းမၢၼ်ႈၶဝ် မႃးသူင်ႇ ၶဝ်ႈၼမ်ႉတၢင်းၵိၼ်ပၼ်ၵူၼ်းၶဝ် လႄႈ ၸုမ်းသိုၵ်း KIA လႆႈဢဝ်မၢၵ်ႈတႅၵ်ႇပွႆႇသႂ်ႇၵႃးသိုၵ်း ၶွင်ႇသီႇသိုၵ်းမၢၼ်ႈၵူၺ်း ဢၼ်လႆႈပဵၼ်ပၢင်တိုၵ်းၵၼ်တေႉ ဢမ်ႇၸႂ်ႈ” ဝႃႈၼႆ။
မိူဝ်ႈယၢမ်းၵၢင်ၼႂ်ၼၼ်ႉ ၵူၼ်းမိူင်းဢၼ်ယူႇႁိမ်းၸမ်ၵေႃႉၼိုင်ႈ လၢတ်ႈဝႃႈ- ၼႂ်းၸေႈဝဵင်းမိူင်းမွၵ်ႇ လႆႈငိၼ်းသဵင် ၵွင်ႈလူင် ၵွင်ႈဢွၼ်ႇ ၵူၼ်းပိုၼ်ႉတီႈၵမ်ႈၽွင်ႈ ဢၼ်ယူႇသဝ်းႁိမ်းႁွမ်းၸိူဝ်းၼၼ်ႉ ပဵၼ်ဢၼ်လႆႈမႆႈၸႂ်ဝႆႉ ဝႃႈၼႆ။
ၵူၼ်းမိူင်းပိုၼ်ႉတီႈၵေႃႉၼိုင်ႈ လၢတ်ႈဝႃႈ- ၶႃႈယူႇတီႈ မိူင်းမွၵ်ႇသေ လႆႈငိၼ်းသဵင်မၢၵ်ႇသဵင်ၵွင်ႈယူႇ ၊ ႁဝ်းၶႃႈၵေႃႈဢမ်ႇႁတ်းဢွၵ်ႇၵႂႃႇတူၺ်း ။ ၵူၼ်းၵမ်ႈၽွင်ႈတေႉဝႃႈ လႆႈႁၼ်ၵႃး ၸုမ်းၶွင်ႇသိုၵ်းမၢၼ်ႈၶဝ် မႃးတၢင်းၽၢႆႇမျဵဝ်ႉတိတ်ႉ လႄႈ ၸုမ်းသိုၵ်းၶၢင် KIA လႆႈဢဝ်မၢၵ်ႈတႅၵ်ႇပွႆႇသႂ်ႇၵႃး ၸုမ်းၶွင်ႇသီႇ သိုၵ်းမၢၼ်ႈ လႄႈ ၽၢႆႇသိုၵ်းမၢၼ်ႈ လႆႈလူႉသုမ်းၵႃးလူင် 3 လမ်း ဝႃႈၼႆ။
ၸဝ်ႈသိုၵ်းၼေႃႇပူႇသိုပ်ႇလၢတ်ႈဝႃႈ- ၼႂ်းၸေႈဝဵင်းမိူင်းမွၵ်ႇၼႆႉပဵၼ်တီႈဢၼ်ၶွင်ႇသီႇသိုၵ်းမၢၼ်ႈ ၶဝ်ႈမႃးတူင်ႉၼိုင်ၵၢၼ်သိုၵ်းတင်းၼမ် လႄႈ ပဵၼ်သဵၼ်ႈတၢင်း တေႃႇသူင်ႇၶဝ်ႈၼမ်ႉတၢင်းၵိၼ် ၊ ၵူၼ်းသိုၵ်း ၊ မၢၵ်ႇၵွင်ႈၸိုၼ်းယၢမ်း ၸိူဝ်းၼႆႉ ဝႃႈၼႆ ။
မိူဝ်ႈ September,27 ၼၼ်ႉၵေႃႈ ၼႂ်းၸေႈဝဵင်း မိူင်းမွၵ်ႇမၢၵ်ႇတႅၵ်ႇတီႈသဵၼ်ႈတၢင်းၽေဢၼ်မီးႁိမ်း ၸဵင်ႇလူင်း တီႈလုမ်းပလိပ်ႈၼၼ်ႉ ၽၢႆႇၶွင်ႇသီႇသိုၵ်းမၢၼ်ႈ လႆႈတၢင်းၸဵပ်းဝၢတ်ႇ ဢမ်ႇယွမ်း 3 ၵေႃႉဝႃႈၼႆ။
ၼႂ်းမိူင်းၶၢင် ၸေႈဝဵင်းမိူင်းမွၵ်ႇ ပွတ်းတၢင်း တၼၢႆး-သဵၼ်ႈတၢင်းလီတူဝ်ႇၼႆႉ သၢႆၵႃးသိုၵ်းမၢၼ်ႈ ၵမ်းၵမ်းလႆႈထုၵ်ႇၺႃး ၸုမ်းသိုၵ်းၶၢင် KIA ဢဝ်မၢၵ်ႇပွႆႇယူႇၼႆ ၵူၼ်းပိုၼ်ႉတီႈၼိုင်ႈၵေႃႉလၢတ်ႈတီႈ ၸုမ်းၽူႈဢွၵ်ႇၶၢဝ်ႇ ဝႃႈၼႆ။
Source : Mizzima
