SSPP/SSA 07.10.2021
ၵူၼ်းဝၢၼ်ႈ ပၢင်သၵ်း၊ ဢိူင်ႇၼွင်မွၼ် ၸေႈဝဵင်းလႃႈသဵဝ်ႈ ထုၵ်ႇၺႃးၸူၼ်ဢဝ်လႅဝ်းၽၼ်းသေ ႁိမ်ဢဝ်လူတ်ႉၶိူင်ႈၵႂႃႇ တီႈဝၢၼ်ႈမႄႈႁၢၼ်ႇ တၢင်းၽႄမႃး ၼမ်ႉပွင်ႈ ၸေႈဝဵင်းလႃႈသဵဝ်ႈ။
မိူဝ်ႈဝၼ်းထီႉ 5 ဝၼ်းလိူၼ် October 2021 (လိူၼ်သိပ်းလပ်း) ၶၢဝ်းယၢမ်း 15:00 မူင်းပၢႆၼၼ်ႉ ၵူၼ်းဝၢၼ်ႈ ၵူၼ်းၼုမ်ႇ ယူႇဝၢၼ်ႈ ပၢင်သၵ်း (8) ၵေႃႉ ပႃးလူတ်ႉၶိူင်ႈ (4) လမ်း၊ ဢွၵ်ႇၵႂႃႇ လႄႇသေ ၶိုၼ်းပွၵ်ႈ မႃးႁိူၼ်းၼၼ်ႉ ထုၵ်ႇၺႃးၵူၼ်းၸူၼ် မီးၵူၼ်းမွၵ်ႈ 20 ၵေႃႉ ဢဝ်လႅဝ်းၽၼ်း ၸိူဝ်းၸုမ်းၶဝ် 8 ၵေႃႉ ဢၼ်ၵႂႃႇၸွမ်းၵၼ် ၵူၺ်းၵႃႈ ဢၼ်တိူဝ်ႉ မၢတ်ႇၸဵပ်း ႁၢဝ်ႉႁၢဝ်ႉႁႅင်းႁႅင်း (2) ၵေႃႉ ထုၵ်ႇ ႁိမ်ဢဝ်ပႃး လူတ်ႉၶိူင်ႈၵႂႃႇ (3) လမ်း လႄႈ ၽူင်း (3) လုၵ်ႈ ၊ ၵူၼ်းသွင်ၵေႃႉဢၼ်ထုၵ်ႇၽၼ်းၼၼ်ႉၵေႃႈ ယၢမ်းလဵဝ် ဢဝ်ၵႂႃႇယူတ်းယႃတူဝ်ဝႆႉတီႈ ႁူင်းယႃလူင် ဝဵင်းလႃႈသဵဝ်ႈ ဝႃႈၼႆ။
ၵူၼ်းမိူင်းပိုၼ်ႉတီႈဝၢၼ်ႈပၢင်သၵ်း ၸၢႆးပိုၼ်း ၵေႃႉၼိုင်ႈလၢတ်ႈဝႃႈ-“ ၸႂ်ႈၶႃႈဢေႃႈ၊ ၶဝ် (8) ၵေႃႉၼႆႉ ၶဝ်ၵႂႃႇလႄႇသေ ၶိုၼ်းပွၵ်ႈမႃးၺႃးၸူၼ်တီႈ တၢင်းၽႄ ၵႂႃႇၼမ်ႉပွင်ႈၼၼ်ႉ ၶႃႈဢေႃႈ၊ တႃႇသွင်ၵေႃႉတႄႉ ၺႃးၽၼ်း ၸွမ်းႁူဝ်ၸွမ်းၼႃႈ ၸွမ်းၶႅၼ်ၸွမ်းတူဝ် ၺႃးၽၼ်းႁႅင်းၶႃႈဢေႃႈ၊ ဢၢႆႈတႃး တႄႉလႆႈယဵပ်ႉမွၵ်ႈ (11) ႁွႆးၶႃႈ ထႅင်ႈၵေႃႉၼိုင်ႈတႄႉ (16) ႁွႆးၶႃႈဝႃႇ ငိၼ်းပီႈၼွင်ႉ ၶဝ်လၢတ်ႈၼေဝႆႉၶႃႈ ၊ ၵူၼ်းၸူၼ်ၸိူဝ်းၼၼ်ႉ ၶဝ်လႆႈလူတ်ႉၵႂႃႇသီႇလမ်း လႄႈ ၽူင်း (3) လူၵ်ႈ၊ လူတ်ႉတႃႇၼိုင်ႈလမ်း တႄႉ ၶဝ်ပေႃႉလႅဝ်သေ ပႅတ်ႈဝႆႉ ၼႂ်းယုမ်းၶႃႈဢေႃႈ” ဝႃႈၼင်ႇၼႆၶႃႈ။
ၵူၼ်းၸိူဝ်းဢၼ်မႃးၸူၼ်လုၵ်ႈဢွၼ်ႇၼုမ်ႇဝၢၼ်ႈပၢင်သၵ်းၼႆႉ ၼႃႈၶဝ်ပဵၼ်ၼႃႈမၢၼ်ႈ လႄႈ ၼႃႈၶႄႇ ၵူၺ်းၵႃႈယူႇတီႈလႂ် လုၵ်ႉတီႈလႂ်မႃး ဢၼ်ဝႃႈၼၼ်ႉတႄႉ ဢမ်ႇလႆႈႁူႉၸွမ်းၶႃႈ ၼႆ ၸၢႆးပိုၼ်းသိုပ်ႇ လၢတ်ႈထႅင်ႈၼင်ႇၼႆ ။
ၸူဝ်ႈၶၢဝ်းယၢမ်းၶွင်ႇသီသိုၵ်းမၢၼ်ႈ သိမ်းဢႃႇၼႃႇမႃးၼႆႉ ၵူၼ်းမိူင်းတင်းၼမ်ထူပ်းတၢင်း ယၢပ်ႇၽိုတ်ႇ ယွၼ်ႉၽေးၽူႈလၵ်ႉၵူၼ်းၸူၼ် လႄႈ မီလွင်ႈယၢပ်ႇၽိုတ်ႇၵူႈလွင်ႈလွင်ႈ ပူၼ်ႉမႃးဢမ်ႇႁိုင်ၼႆႉၵေႃႈ ယူႇတီႈၵူၼ်းဝၢၼ်ႈ ဝၢၼ်ႈပဵင်း ၼႂ်းၸေႈဝဵင်းၵူတ်ႉၶၢႆ တီႉၺွပ်းလႆႈ ၽူႈလၵ်ႉၵူၼ်းၸူၼ်တႃႇ 5 ၵေႃႉမိူၼ်ၵၼ် ဝႃႈၼႆ။
