SSPP/SSA 11.10.2021
ၵူၼ်းမိူင်းဢၼ်ယူႇၼႂ်းဝဵင်းၼမ်ႉလၼ်ႈ ႁၢႆဝႆႉသွင်ၵေႃႉ လႆႈၶၢဝ်းတၢင်း 9 ဝၼ်းယဝ်ႉ ဢမ်ႇလႆႈတၢင်းၵပ်းသိုပ်ႇ ၸဵမ်မိူဝ်ႈတႄႇဢွၵ်ႇႁိူၼ်းၵႂႃႇ တေႃႇထိုင်ယၢမ်းလဵဝ် ဝႃႈၼႆ ။
မိူဝ်ႈဝၼ်းထီႉ 02.10. 2021 ဢၼ်ယူႇတီႈၼႂ်းဝဵင်းၼမ်ႉလၼ်ႈ ပွၵ်ႉဢေးၶျၢၼ်းတႃႇ – ၸိုဝ်ႈႁွင်ႉ မႄႈထဝ်ႈ ပႃႈၸၢင်းသွႆႈ ဢႃႇယု(63) ပီႊ ၊တင်းလုၵ်ႈၸၢႆးမၼ်း ၸိုဝ်ႈႁွင်ႉ ၸၢႆးမၢဝ်းလႅင်း ( ႁွင်ႉ) ဢၢႆႈလႅင်း ဢႃႇယု (35)ပီႊ လုၵ်ႉတီႈႁိူၼ်း ၶီႇလူတ်ႉၶိူင်ႈလမ်းၼိုင်ႈဢွၵ်ႇၵႂႃႇ ၶၢဝ်းယၢမ်းႁူဝ်ၶမ်ႈ (4) မူင်းပၢႆယဝ်ႉ ၊ ႁၢႆၵႂႃႇ လႆႈၶၢဝ်းတၢင်း 9 ဝၼ်းယဝ်ႉ ဢမ်ႇပႆႇႁၼ်ပွၵ်ႈၶိုၼ်း လွင်ႈၵပ်းသိုပ်ႇၵေႃႈဢမ်ႇလႆႈ ၽူင်းၵေႃႈဢမ်ႇဢဝ်ၵႂႃႇ ၸိူဝ်းပဵၼ်ပီႈၼွင်ႉၸမ်ၸႂ် မႆႈၸႂ်ၸွမ်း ၵူဝ်ပဵၼ်သေၸိူဝ်ႉသေလွင်ႈ ဝႃႈၼႆ ။
ၵူၼ်းၶၢႆၼမ်ႉမၼ်းၸၢၵ်ႈ ဢၼ်ယူႇႁိမ်းႁွမ်းၵိၼ်ၸမ်လၢတ်ႈၼႄဝႃႈ – မိူဝ်ႈၶဝ်တေဢွၵ်ႇၵႂႃႇၼၼ်ႉ မႃးသႂ်ႇၼမ်ႉမၼ်းလူတ်ႉတီႈလၢၼ်ႉၶႃႈသေ ၶဝ်သွင်ၵေႃႉၶီႇလူတ်ႉဢွၵ်ႇၵႂႃႇ ၶူဝ်းလၢႆႈ ၶူဝ်းပုတ်ႈၵေႃႈ ဢမ်ႇပႃးသင် ၽူင်းၵေႃႈဢမ်ႇဢဝ်ၵႂႃႇ ၶဝ်ၵႂႃႇၸိူင်ႉၼၼ်ယူဝ်းယူဝ်းၵူၺ်း လႅပ်ႈမိူၼ်တေ မီးၵူၼ်းႁွင်ႉ တီႈတၢင်ႇႁိူၼ်းသေ ၵႂႃႇထူပ်းယဝ်ႉဢၢၼ်းပွၵ်ႈမႃးၶိုၼ်း ၸိူင်ႉၼၼ်ၵူၺ်းၶႃႈ ၵူၺ်းၵႃႈ ဢမ်ႇႁၼ်ၶဝ် ပွၵ်ႈၶိုၼ်းႁၢႆလူင်ၵႂႃႇၸိူင်ႉၼၼ် တေႃႇထိုင်ယၢမ်းလဵဝ် ၵႂႃႇလႂ်တၢင်းလႂ်ၽႂ်ႁွင်ႉၵႂႃႇၵေႃႈ ဢမ်ႇႁူႉၸွမ်းၶႃႈ လွင်ႈၵပ်းသိုပ်ႇၵေႃႈဢမ်ႇလႆႈ ဝႃႈၼႆ ။
ၵဵဝ်ႇၵပ်းလူၺ်ႈ ပႃႈၸၢင်းသွႆႈ လႄႈ ၸၢႆးမၢဝ်းလႅင်း ( ႁွင်ႉ) ဢၢႆႈလႅင်း ဢၼ်ႁၢႆၵႂႃႇၼႆႉ ၵူၼ်းႁိူၼ်းၶဝ် လႄႈ ပီႈၼွင်ႉၸမ်ၸႂ် ဢွၼ်ၵၼ်မႆႈၸႂ်ၸွမ်းသေ တူၵ်ႇႁႃဝႆႉယူႇ သင်ၸိူဝ်ႉၽူႈလႂ်ႁူႉႁၼ်ၼႆၵေႃႈ ပွင်ႇပၼ်တီႈၽူႈမီးပုၼ်ႈၽွၼ်း တီႈဝဵင်းၼမ်ႉလၼ်ႈ သေၵမ်းၼႆယူႇၶႃႈဢေႃႈ ။
