မိူဝ်ႈဝၼ်းထီႉ 24.10.2021 ၵူၼ်းမိူင်းဝၢၼ်ႈၵုင်းၵေႃႇ ၼႂ်းဢိူင်ႇႁူဝ်ၶၢႆး ၸေႈဝဵင်းမိူင်းၵိုင် ၵႂႃႇႁႃဝူဝ်း ၽႃႇၺႃးမၢၵ်ႇႁၢင်ႈၵၢင် ၸုမ်းသိုၵ်း RCSS လႄႈ မႃးသူင်ႇတီႈႁူင်းယႃ ၵေးသီးသေ လႆႈလူႉတၢႆၵႂႃႇဝႃႈၼႆ ။
လုင်းသၢမ် ၵေႃႉဢၼ်ၺႃးမၢၵ်ႇတႅၵ်ႇသေလူႉတၢႆၵႂႃႇၼၼ်ႉ ၵႂႃႇႁႃဝူဝ်းမၼ်း ဢမ်ႇႁၼ်လႄႈ မိူဝ်းၼွၼ်း တီႈဝၢၼ်ႈၵုင်းပႅၵ်ႇၶိုၼ်းၼိုင်ႈ ထိုင်ၵၢင်ၼႂ် ၸူးႁွင်ႉဢဝ်ၵူၼ်းဝၢၼ်ႈၵုင်းပႅၵ်ႇ သွင်ၵေႃႉ ၸၢႆးမျႃႉ လႄႈ ဢေးယိင်း ၵႂႃႇႁႃၸွမ်း မိူဝ်ႈၽွင်းဢွၵ်ႇၵႂႃႇ ၽၢႆႇႁွင်ႇဝၢၼ်ႈ ၽႅဝ်ႁိမ်းၸမ်ၸဝ်ႈမိူင်းၼၼ်ႉ ထုၵ်ႇၺႃး မၢၵ်ႇတႅၵ်ႇသႂ်ႇသေ တိူဝ်ႉၺႃး လုင်းသၢမ် လႆႈမၢတ်ႇၸဵပ်းႁႅင်း လႆႈသူင်ႇႁူင်းယႃၵေးသီးသေ လူႉသဵင်ႈ တီႈႁူင်းယႃၵေးသီး ဝႃႈၼႆ ။
ၵေႃႉပဵၼ်ပီႈၼွင်ႉၸမ်ၸႂ်မၼ်းလၢတ်ႈၼႄဝႃႈ – “ မၼ်းႁႃဝူဝ်းမၼ်းၸဵမ်မိူဝ်ႈဝႃးယဝ်ႉ မၼ်းငိၼ်းဝႃႈ ဝူဝ်းမၼ်းမီးသၢႆတၢင်းၵုင်းပႅၵ်ႇၼႆသေ မၼ်းမိူဝ်းၼွၼ်း တီႈဝၢၼ်ႈၵုင်းပႅၵ်ႇ ထိုင်ၵၢင်ၼႂ် မိူင်းလႅင်းမႃး ၸွင်ႇၸူးဢဝ်ၵူၼ်းသွင်ၵေႃႉၵႂႃႇႁႃၸွႆႈမၼ်း မိူဝ်ႈထိုင်တၢင်းႁွင်ႇဝၢၼ်ႈၵုင်းပႅၵ်ႇ ႁိမ်းၸဝ်ႈမိူင်း ၼၼ်ႉၵေႃႈ မၢၵ်ႇတႅၵ်ႇသႂ်ႇမၼ်းၵမ်းလဵဝ် ၊ ၵူၼ်းဢၼ်ၵႂႃႇၸွမ်းမၼ်း တႄႉလၢတ်ႈၼႄႁဝ်းဝႃႈ မိူဝ်ႈၽႅဝ်းႁိမ်းၼၼ်ႉ ငိၼ်းသဵင်မေႃး တိတ်းတိတ်း 2 ၵမ်းၵေႃႈတႅၵ်ႇၵမ်းလဵဝ် ၼႆဢေႃႈ ၊ ၸိူဝ်းၼၼ်ႉ ပဵၼ်မၢၵ်ႇၸုမ်းသိုၵ်း RCSS ဢၼ်ၶဝ်မႃးပႂ်ႉတၢင်း ၸုမ်းသိုၵ်း SSPP ၸုမ်းဢၼ်မႃးမီးတီႈ ပၢင်ၵၢတ်ႇ ၼၼ်ႉဢေႃႈ ဝႃႈၼႆ ။
လုင်းသၢမ်ၼႆႉ ပဵၼ်ၵူၼ်းဝၢၼ်ႈ ၵုင်းၵေႃႇ တႄႇၼႃႈႁိူၼ်းၸွမ်း ပႃႈပိူင်း မီးလုၵ်ႈႁူမ်ႈၵၼ် 5 ၵေႃႉ ၊ လုၵ်ႈၸၢႆး 1 ၵေႃႉ ၊ လုၵ်ႈယိင်း 4 ၵေႃႉ ဝႃႈၼႆ ။
မိူဝ်ႈဝၼ်းထီႉ 09.10.2021 ၵူၼ်းမိူင်း ဝၢၼ်ႈႁူၺ်ႈမူၼ်ႇ ဢိူင်ႇႁမ်းငၢႆး ၸေႈဝဵင်းမိူင်းၵိုင် ၼင်ႇၵဝ်ႇ မိူဝ်ႈၽွင်း တိုၵ်ႉၵႂႃႇတူၺ်းႁႆႈတူၺ်းသူၼ်ၼၼ်ႉ လႆႈၽႃႈၺႃးမၢၵ်ႇ ၸုမ်းသိုၵ်း RCSS ႁၢင်ႈၵၢင်ဝႆႉသေ လူႉတၢႆထင်တီႈ 3 ၵေႃႉ ၸိုဝ်ႈႁွင်ႉ လုင်းမွင်ႇ ဢႃႈသၢၵ်ႈ (50) ပီႊ၊ ၸၢႆးသၢင်ႈၼူၺ်ႈ (25)ပီႊ လႄႈ ဢၢႆႈလႅင်း (18) ပီႊ ၵူၼ်းဝၢၼ်ႈ လႆႈၵႂႃႇထူပ်းႁၼ်တူဝ်တၢႆၶိုၼ်း မိူဝ်ႈဝၼ်းထီႉ 21.10.2021 သေ လုမ်းၶၢပ်ႈတူဝ်ပၼ်ၵႂႃႇယူႇ ဝႃႈၼႆ။
ဝၢၼ်ႈၼေႃႇသႅင် ၊ ဝၢၼ်လွႆသၢင်း ဢိူင်ႇႁမ်းငၢႆး တပ်ႉၵဝ်ႇဢၼ်သိုၵ်း RCSS ၶဝ်ယူႇဝႆႉမိူဝ်ႈဢွၼ်ႇတၢင်း ၸိူဝ်းၼႆႉ ၶဝ်ႁၢင်ႈမၢၵ်ႇဝႆႉ တၢင်းၼမ်သေထွႆႇဢွၵ်ႇၵႂႃႇ ၵူၼ်းဝၢၼ်ႈ တေၵႂႃႇၸႂ်းႁႆႈတူၺ်းသူၼ်ၵေႃႈ လႆႈၵူဝ်ဝႆႉယူႇ မိူၼ်ၼင်ႇတင်းဝၢၼ်ႈလူင်ၸၢမ်ၵေႃႈ မိူဝ်ႈဝႃး ဝူဝ်းၵႂႃႇၽႃႇၺႃး သဵင်မၢၵ်ႇတႅၵ်ႇ လႅပ်ႈပဵၼ်မၢၵ်ႇႁၢင်ႈမဵဝ်းသႅၼ်းယႂ်ႇၼႆ ၊ လိူဝ်ၼၼ်ႉ ပိုၼ်ႉတီႈတင်း ႁူၺ်ႈမူၼ်ႇ၊ ဢိူင်ႇႁူဝ်ၶၢႆးလူင်းၵႂႃႇ တၢင်းတူင်ႇလၢဝ်းၸိူဝ်းၼႆႉ ၸုမ်း RCSS ၶဝ် ႁၢင်ႈၵၢင်မၢၵ်ႇမီးထႅင်ႈတင်းၼမ် ဝႃႈၼႆ ။
ၽၢႆႇၸၢၼ်းတၢင်းၵႃးလူင်း ၽၵ်းၼၢမ် ၵေးသီး တႄႇဢဝ်ၽၵ်းၼၢမ် တေႃႇထိုင်ႈဝၢၼ်ႈပၢင်ပူဝ်ႇ ၊ ဝၢၼ်ႈၼႃးမူၼ်း ၸိူဝ်းၼႆႉ သိုၵ်း RCSS ယူႇသဝ်းဝႆႉသေ ႁၢင်ႈၵၢင်မၢၵ်ႇဝႆႉတင်းၼမ် ၽၢႆႇ SSPP/SSA သမ်ႉတူင်ႉၼိုင်ယူႇသဝ်းဝႆႉ ၽၢႆႇႁွင်ႇတၢင်းၵႃး ၽၵ်းၼၢမ် လႄႈ ၵေးသီး ၸိူဝ်းၼႆႉဝႆႉယူႇဝႃႈၼႆ။
