SSPP/SSA 06/10/2021
ၸုမ်းသိုၵ်း ၶွင်ႇသီႇဢဝ်ၶိုၼ်းၸိုင်ႈတႆး RCSS ၶဝ်ႈတီႉၺွပ်းၵူၼ်းမိူင်းထႅင်ႈတီႈၼႂ်းၸေႈဝဵင်းၵျွၵ်ႉမႄး သၢမ်ၵေႃႉ ပႃးတၢင်းလုၵ်ႈဢွၼ်ႇ ဢႃႇယူႉ 13 ၶူပ်ႇ ၼိုင်ႈၵေႃႉ ဝႃႈၼႆ ။
မိူဝ်ႈဝၼ်းထီႉ 4 ဝၼ်း လိူၼ် October 2021 ၶၢဝ်းယၢမ်း 11 မူင်း ၵၢင်ဝၼ်း ၼၼ်ႉ ၸုမ်းသိုၵ်း RCSS ဢၼ် ၽူႈဢွၼ်ႁူဝ် ၸိုဝ်ႈႁွင်ႉ ၸဝ်ႈလၢဝ်ဝၼ်း (ႁွင်ႉပူႇၼူတ်ႇ) ဢၼ်ဢွၼ်ႁူဝ်တူင်ႉၼိုင်ဝႆႉယူႇ ႁိမ်းဝၢၼ်ႈႁူးသူၼ် ၸေႈဝဵင်းၵျွၵ်ႉမႄး ၼၼ်ႉ ပွႆႇၵူၼ်းသိုၵ်း 4 ၵေႃႉ တီႉၺွပ်းၵူၼ်းဝၢၼ်ႈ မိူင်းငေႃႉ ဢၼ်ပၢႆႈမႃးယူႇ ၼႂ်းဝဵင်း ၵျွၵ်ႉမႄး ၊ ၵူၼ်းဝၢၼ်ႈ သၢမ်ၵေႃႉဢၼ်ထုၵ်ႇၺႃးသိုၵ်း RCSS တီႉၺွပ်းၵႂႃႇၼၼ်ႉ (1) ၸၢႆးလိူၼ်ၽႃႉ ဢႃႇယူႉ (13) ၶူပ်ႇ လုၵ်ႈၸၢႆးလုင်းဢူး ၊ ယူႇဝၢၼ်ႈၼမ်ႉၽဵတ်ႇ (2) လုင်းဢေး ယူႇၼမ်ႉၽဵတ်ႇ ဢိူင်ႇမိူင်းငေႃႉ (3) ဢၢႆႈဢေး ယူႇၼမ်ႉၽဵတ်ႇ ဢိူင်ႇမိူင်းငေႃႉ ၊ ၶဝ်သၢမ်ၵေႃႉ ၼႆႉပဵၼ်ၵူၼ်းလုၵ်ႉတီႈဝၢၼ်ႈ သေပၢႆႈမႃးယူႇဝႆႉ ၼႂ်းဝဵင်းၵျွၵ်ႉမႄး ဝႃႈၼႆၶႃႈ။
ၵူၼ်းသၢမ်ၵေႃႉ ဢၼ်ထုၵ်ႇတီႉၺွပ်းၼႆႉ ၸၢႆးဢေး ဢႃႇယူႇမွၵ်ႈ 30 ပၢႆ ထုၵ်ႇတီႉၺွပ်းတီႈ ဢိၼ်ႇၵျင်းတွင်ႇ (အိမ်ကျင်းတောင် ) လုင်းဢေး ဢႃႇယူႇမွၵ်ႈ 50 ပၢႆ ထုၵ်ႇတီႈၺွပ်းတီႈ ၼႃႈလိၼ်-1 ပွၵ်ႉပႅတ်ႇ (နယ်မြေ-၁ ရက်ကွက်-၈ ) ၸၢႆးလိူၼ်ၽႃႉ ဢႃႇယူႉ 13 ၶူပ်ႇ လုၵ်ႈၸၢႆးလုင်းဢူး ထုၵ်ႇတီႉၺွပ်းတီႈ (ပိန်းနဲ့ကုန်း ) ၸိူဝ်းၼႆႉ ၼႂ်းၸေႈဝဵင်း ၵျွၵ်ႉမႄး တင်းမူတ်းဝႃႈၼႆ ။
မိူဝ်ႈလဵဝ်ၵူၼ်းၸိူဝ်းၼႆႉ ထုၵ်ႇတီႉၺွပ်းႁွင်ႉၵႂႃႇမီးဝႆႉယူႇတီႈတပ်ႉႁူးသူၼ် ဝႆႉယူႇ ၊ ၶၢဝ်ႇပိုၼ်ႉတီႈဢမ်ႇယိုၼ်ယၼ် တႄႉလၢတ်ႈဝႃႈ ၶဝ်ၸိူဝ်းၼႆႉ ၵွပ်ႈလုၵ်ႉၸၢႆးၶဝ် လၵ်ႉပၢႆႈသိုၵ်း လႄႈ မႃးတီႉၺွပ်းၵႂႃႇၶိုၼ်းၵူၺ်း ဝႃႈၼႆ ၊ ပူၼ်ႉမႃး မိူဝ်ႈဝၼ်းထီႉ 30 – လိူၼ် September-2021 ၼၼ်ႉၵေႃႈ ယူႇတီႈ ၸုမ်းသိုၵ်း RCSS ႁႅင်းၵူၼ်း 7 ၵေႃႉ လႆႈတီႈၺွပ်း ၵူၼ်းဝၢၼ်ႈၶိုမ်းမႂ်ႇ 4 ၵေႃႉ ဢၼ်ပၢႆႈမႃးသွၼ်ႈယူႇဝႆႉ တီႈဝဵင်းၵျွၵ်ႉမႄး မိူၼ်ၵၼ်ဝႃႈၼႆ ။
