September 30,2021
ဝၼ်းထီႉ 30 ဝၼ်း လိူၼ် September ပီႊ 2021 ၼီႊ ယူႇတီႈမုၵ်ႉၸုမ်းသင်ႇၶႃႇၸဝ်ႈ ၼႂ်းမိူင်းတႆး ပွတ်းၸၢၼ်း လၢႆၸေႈဝဵင်း မိူၼ်ၼင်ႇ ၸႄႈဝဵင်းမိူင်းပၼ်ႇ၊ ၸႄႈဝဵင်းလၢႆးၶႃႈ၊ ၸႄႈဝဵင်းၼမ်ႉၸၢင်၊ ၸႄႈဝဵင်းပၢင်လူင်ၸိူဝ်းၼႆႉ ႁူမ်ႈၵၼ်ၸတ်းႁဵတ်းပၢင်ၵုမ် တီႈဝဵင်းပၢင်လူင် ပိူဝ်ႈတႃႇၶွတ်ႇၽွတ်ႈ မုၵ်ႉၸုမ်းၼိူင်ႈဢၼ်သေ ႁူမ်ႈၵၼ်သၢၼ်ၶတ်းတေႃႇ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SA) ဝႃႈၼႆ ။
ၼႂ်းပၢင်ၵုမ်ၼႆႉ သင်ႇၶႃႇၸဝ်ႈတူၼ်ၼိူင်ႈ မွၵ်ႇလၢတ်ႈၼႄဝႃႈ ပိူဝ်ႈတႃႇတေၶွတ်ႇၽွတ်ႈမုၵ်ႉၸုမ်း ဢၼ်ၶဝ်ႈပႃးသင်ႇၶႃႇၸဝ်ႈ ဢိၵ်ႇပႃးပႃႇတီႇၵၢၼ်မိူင်း လႄႈ ၵေႃလိၵ်ႈလၢႆးသေ မီးၶေႃႈယိူင်းဢၢၼ်း (4)ၶေႃႈ၊ ပိူင်ၵၢၼ်(6)ဢၼ် ဝႃႈၼႆ။
ၼင်ႇႁိုဝ်မုၵ်ႉၸုမ်းၼႆႉ တေၽေႃႇၼမ်ႉၼႄတူဝ်လႆႈၶေႃႈယိူင်းဢၢၼ်းၶဝ်ၼၼ်ႉ ၶွင်ႇသီႇဢဝ်ၶိုၼ်း ၸိုင်ႈတႆး (RCSS) တေၶၢမ်ႇသဵင်ႈငိုၼ်းတွင်း ၊ ၶိူင်ႈၵမ်ႉၵႅမ်လႄႈ လွင်ႈၵိၼ်ယႅမ်ႉ ၵူႊလွင်ႈလွင်ႈၵႂႃႇ ၼႆယူႇ။
ဢိင်ၼိူဝ်လွင်ႈဢၼ်သင်ႇၶႃႇၸဝ်ႈလႄႈၵူၼ်းမိူင်းၼႂ်းၸေႈဝဵင်းၵမ်ႈၽွင်ႈ လၵ်ႉႁဵတ်းသၢင်ႈပၢင်ၵုမ် လပ်ႉလပ်ႉ ပိူဝ်ႈတႃႇႁူမ်ႈၵၼ်သၢၼ်ၶတ်းSSPPၼၼ်ႉသေ လႆႈတွင်ႈထၢမ် ၸဝ်ႈႁၢၼ် ၽုင်းႁၢၼ် ၽူႈၶၢၼ်ပၢၵ်ႇSSPP လွင်ႈႁၼ်ထိုင်ၸိူင်ႉႁိုဝ်ၼၼ်ႉ လၢတ်ႈဝႃႈ “လွင်ႈႁဵတ်းသၢင်ႈပၢင်ၵုမ်ၵၼ်တေႉ ႁဝ်းၶႃႈဢမ်ႇမီးလွင်ႈသၢၼ်ၶတ်း၊ ဢၼ်လမ်ႇလွင်ႈတေႉ ပေႃးႁဵတ်းပၢင်ၵုမ်ၼႆႉ တေလႆႈမီးလွင်ႈ ၸႅင်ႈလႅင်းဝႃႈ မီးယိူင်းဢၢၼ်းသင်? တေႁဵတ်းသင်? ၽႂ်ယူႇတၢင်းလင်သေၸတ်းၽႅၼ် ၼၼ်ႉၼႃႇ ၼေႃႈ? ပေႃးမိူၼ်တေဝႃႈ ယိူင်းဢၢၼ်းတႃႇၵၢၼ်ၽွမ်ႉႁူမ်ႈ တပ်ႉသိုၵ်းသွင်ၸုမ်းၵေႃႈ တၵ်းလႆႈ ၸုၵ်းပဵၼ်မဵဝ်းဢၼ်တေႁဵတ်းသၢင်ႈလူၺ်ႈ ယႃႇၸူႇယွႆးၵၢၼ်းၶမ်းသေႁိဝ်ႈၸင်ႈ ၊ တူၺ်းၽဵင်ႇၽဵင်ႇ ၶိုင်ႈၶိုင်ႈသေလၢတ်ႈၼၼ်ႉၶႃႈယဝ်ႉ။ ပေႃးမီးလွင်ႈသိုဝ်ႈယူဝ်းတႅၵ်ႇလႅင်းလႄႈ ၶႂ်ႈႁႂ်ႈတႆးႁဝ်း ၽွမ်ႉႁူမ်ႈၵၼ်တေႉ လူဝ်ႇပဵၼ်လၢႆးယူႇၽၢႆႇၸဵင်ႇလီသေႁဵတ်း၊ လၢႆးယူႇၽၢႆႇၸဵင်ႇလီသေမုင်ႈ ဢၼ်ႁွင်ႉဝႃႈ ဢပိဝ်ႉသၽေႃးၼၼ်ႉၶႃႈယိုင်၊ ပေႃးဢမ်ႇၸႂ်ႈမဵဝ်းၼႆႉတေႉ တေဢမ်ႇမီးၽွၼ်းလီသင် ႁဝ်းၶႃႈတေႉ ၶႂ်ႈဝႃႈ ၼင်ႇၼႆဢေႃႈ” ဝႃႈၼႆ ။
ဢိင်ၼိူဝ်ၵူၼ်းၽၢႆႇ(RCSS)သေႃႇသူၼ်းသေ တီႈၼမ်ႉၶမ်း မီးပိုၼ်းဢၼ်သၢၼ်ၶတ်း ပႃႇတီႇမႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆးမႃးယဝ်ႉပွၵ်ႈၼိူင်ႈလႄႈ လွင်ႈၼႆႉၵေႃႈတိုၼ်းပဵၼ်လၢႆးႁဵတ်းဢၼ် (RCSS) ယူႇၽၢႆႇလင် ဢဝ်ႁႅင်းသင်ႇၶႃႇလႄႈၵူၼ်းမိူင်းသေ ၶႂ်ႈသၢၼ်ၶတ်း(SSPP/SSA)၊ ႁဵတ်းႁႂ်ႈ ၵူၼ်းမိူင်းပတ်းပိုၼ်ႉႁၼ်ၽိတ်းၼိူဝ် SSPP/SSAၵူၺ်းယူႇယဝ်ႉၼႆ ၽူႈထတ်းသၢင် ၼႂ်းၵႄႈ သိုၵ်းသွင်ႇမူႇသွင်ၸုမ်း ၵေႃႉၼိုင်ႈ လၢတ်ႈၼင်ၼင်ႇၼႆ ။
