ဝူဝ်းၵူၼ်းဝၢၼ်ႈႁူၺ်ႈပၢတ်ႈ ၽႃႇၺႃးမၢၵ်ႇသိုၵ်း RCSS ႁၢင်ႈၵၢင်သေ လူႉတၢႆထင်တီႈ ၼိူဝ်ႉဝူဝ်းၼၼ်ႉၵေႃႈ သိုၵ်းRCSS ဢဝ်ၵိၼ်ယဝ်ႉ ဢမ်ႇပၼ်ၵႃႈသၢႆႈတႅၼ်းၶိုၼ်းဝႃႈၼႆ ။

မိူဝ်ႈဝၼ်းထီႉ 21-10-2021 ယၢမ်း 5 မူင်းတၢမ်းၶမ်ႈၼၼ်ႉ သိုၵ်းRCSS ႁၢင်ႈၵၢင်မၢၵ်ႇဝႆႉ တီႈလႅၼ်သူၼ်ၼဵင်ႈ ၽၢႆႇၸဵင်ႇႁွင်ႇဝၼ်းဢွၵ်ႇ ဝၢၼ်ႈႁူၺ်ႈပၢတ်ႈ  ဝူဝ်းမႄႈလူင် လုင်းမူးတႃႉ ယူႇဝၢၼ်ႈ ႁူၺ်ႈပၢတ်ႈ လႆႈၵႂႃႇၽႃႇၺႃး သေ လူႉတၢႆၵႂႃႇ ၊ ၼိူဝ်ႉဝူဝ်းတူဝ်ၼၼ်ႉၵေႃႈ ယူႇတီႈ သိုၵ်း RCSS ယႃႉၵိၼ်ပႅတ်ႈသေ လွင်ႈၵႃႈသၢႆႈတႅၼ်းတီႈၵူၼ်းဝၢၼ်ႈၵေႃႈ ဢမ်ႇပၼ်သေပျႃး ဝႃႈၼႆ ။

ၵူၼ်းဝၢၼ်ႈဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈႁဝ်းၶႃႈဝႃႈ-ၸႂ်ႈၶႃႈဢေႃႈ ဝူဝ်းႁဝ်းၶႃႈ ႁဝ်းၵေႃႈပွႆႇၸိူင်ႉၼႆၵူၺ်းၶႃႈ မိူဝ်ႈဢွၼ်တၢင်းၸိူဝ်းၼႆႉ ၵႂႃႇမႃးယူႇတႃႇသေႇ သတ်းၼႆၼႃႇ ၶဝ်ၵေႃႈဢမ်ႇႁူႉသင် ၽႃႇၺႃးသေတၢႆၵႂႃႇၵေႃႈ ၶဝ်သမ်ႉဢဝ်ၵိၼ်ၶိုၼ်းလၢႆလၢႆ ၵႃႈဝူဝ်းၵေႃႈ ဢမ်ႇသၢႆႈတႅၼ်းပၼ်ၶိုၼ်း ။

ၽၢင်ၾၢင်ႈဝူဝ်းတူဝ်ၼႆႉ ပဵၼ်ဝူဝ်းမႄႈလူင် ၼမ်ႉၼၵ်းတေမီးမွၵ်ႈ 50 ၸွႆႉ ပေႃးၼပ်ႉၶၼ်ငိုၼ်း တေတူၵ်းမွၵ်ႈ 5 သႅၼ်ပျႃး ၵူၺ်းၵႃႈလုင်းမူးတ ၸဝ်ႈဝူဝ်း ဢမ်ႇလႆႈၵႃႈသၢႆႈတႅၼ်းသေပျႃး ဝႃႈၼႆ ။

ယၢမ်းလဵဝ် ယူႇတီႈသိုၵ်း RCSS ႁၢင်ႈၵၢင်မၢၵ်ႇဝႆႉတင်းၼမ် ၽၢႆႇသိုၵ်း SSPP/SSA တိုၵ်ႉၵူတ်ႇလၢင်ႉ မၢၵ်ႇမႅင်းလႄႈ လႆႈႁၼ်မၢၵ်ႇဢၼ် RCSS ႁၢင်ႈၵၢင်ဝႆႉ တီႈလွႆပႄႉလုၵ်ႈၼိုင်ႈယူႇ လိူဝ်ၼၼ်ႉ ၽၢႆႇ SSPP/SSA တေသိုပ်ႇၵူတ်ႇလၢင်ႉတူၺ်းထႅင်ႈယူႇ ဝႃႈၼႆ။