SSPP/SSA 05.10.2021
ၼႂ်းမိူင်းႁူမ်ႈတုမ်မိူင်းမၢၼ်ႈ ဢၼ်ယိပ်းၵွင်ႈၵၢင်ပဵၼ်ပၢင်တိုၵ်းၼႂ်းပိုၼ်ႉတီႈသေ ၸိူဝ်းဢၼ်ၵူၼ်းမိူင်း ယူႇၼႂ်းပိုၼ်ႉတီႈ လႆႈၶၢမ်ႇပႅတ်ႈႁိူၼ်းယေးပၢႆႈၽၢတ်ႇၼၼ်ႉ ႁူဝ်ၼပ်ႉလုၵ်ႈဢွၼ်ႇၼမ်ထိုင်မွၵ်ႈ 760,00 ပၢႆ ၼႆ ၸုမ်း Save the Children ဢွၵ်ႇၶၢဝ်ႇဝႆႉ ဝႃႈၼႆ။
တင်ႈတႄႇဢဝ်ၼႂ်းလိူၼ် ၽေႇၾေႇဝႃႇရီႇမႃးၼႆႉ ၸုမ်းၵေႃႇၵၢၼ်ႁၢႆႉ ၶွင်ႇသီႇသိုၵ်းမၢၼ်ႈ သိမ်းဢႃႇၼႃႇသေ ၼႂ်းမိူင်းႁူမ်ႈတုမ် ၸွမ်းပိုၼ်ႉတီႈၵမ်ႉၼမ် ၸုမ်းတပ်ႉၵႅတ်ႇၶႄႇၵူၼ်းမိူင်းလႄႈ ၸုမ်းၶွင်ႇသီႇသိုၵ်းမၢၼ်ႈ လႆႈပဵၼ်ပၢင်တိုၵ်းႁၢဝ်ႈႁႅင်းမႃးလိူဝ် ၵူၼ်းမိူင်းလႆႈပၢႆႈၽေးတင်းၼမ် ဝႃႈၼႆ။
ၵူၼ်းမိူင်းဢၼ်လႆႈၶၢမ်ႇပႅတ်ႈႁိူၼ်းယေးတင်းၼမ်သေပၢႆႈၵႂႃႇယူႇၼႂ်းထိူၼ်ႇ လႆႈတၢၵ်ႇလႅတ်ႇ၊တၢၵ်ႇ ၾူၼ် ဢဝ်ၽႃႇယၢင်ၵင်ႈယူႇသဝ်းၵႂႃႇ ၊ လွင်ႈယၢပ်ႇတႃႇၼႃးႁိူၼ်း ပဵၼ်လွင်ႈၵိၼ်ယႅမ်ႉ မၢင်ဝၼ်းၵေႃႈ လႆႈၵိၼ်ၶဝ်ႈၼိုင်ႈတႃႇသေ ယူႇၵႂႃႇၵူၺ်းၼႆ ၸုမ်း Save the Children သိုပ်ႇလၢတ်ႈဝႃႈၼႆႉ။
တေႇဢဝ်ၸုမ်းၶွင်ႇသီႇသိုၵ်းမၢၼ်ႈသိမ်းဢႃႇၼႃႇမႃးၼႆႉ ၵူၼ်းဢၼ်လႆႈၽၢတ်ႇႁိူၼ်းယေး ပၢႆႈယူႇသဝ်းၼႂ်းထိူၼ်ႇၸိူဝ်းၼၼ်ႉ မီးၵႂႃႇ 206,000 ၵေႃႉ။ ၼႂ်းလိူၼ် September ၼိုင်ႈလိူၼ်ၵူၺ်း ၼႂ်းမိူင်းယၢင်း ၵူၼ်းမိူင်းဢၼ်လႆႈပၢႆႈ မီးမွၵ်ႈ 220,00 ၵေႃႉၼႆ တီႈပၢင်ၵုမ်လူင်ၸၢတ်ႈၸိုင်ႈလုမ်ႈၾႃႉ လၢတ်ႈဢွၵ်ႇၶၢဝ်ႇၵႂႃႇ ဝႃႈၼႆ ။
ၵူၼ်းမိူင်းဢၼ်ပၢႆႈၽေးသိုၵ်းဢွၵ်ႇႁိူၼ်းယေးယူႇသဝ်းၼႂ်းထိူၼ်ႇ မီး 760,000 ၵေႃႉ၊ ပႃးလုၵ်ႈဢွၼ်ႇ မီးမွၵ်ႈ 290,00 ၵေႃႉ၊ ပူၼ်ႉမႃးၼႂ်းလိူၼ် September ၼၼ်ႉၵေႃႈ လႆႈပဵၼ်ပၢင်တိုၵ်းႁႅင်းဝႆႉ တီႈၼႂ်း ၸေႈဝဵင်းမေႃႇသူဝ်ႇ ဝဵင်းလဵဝ်ၵူၺ်း ၵူၼ်းမိူင်းဢၼ်ယူႇၼႂ်းပိုၼ်ႉတီႈ ပၢႆႈယၢၼ်ႁိူၼ်းယေးတင်းၼမ် ဝႃႈၼႆ။
ၽူႈတၢင်တူဝ်ၸုမ်းသုၼ်ႇလႆႈသုၼ်ႇပဵၼ်ၸၢတ်ႈၸိုင်ႈလုမ်ႈၾႃႇ ၼိုင်ႈၵေႃႉပၼ်ၶေႃႈၾၢင်ႇဝႃႈ မိူဝ်ႈပူၼ်ႉမႃး ၼႂ်းလိူၼ် June ၼၼ်ႉ ၼႂ်းမိူင်းယၢင်း ၵူၼ်းမိူင်းဢၼ်ပၢႆႈၽေးသိုၵ်း ထူပ်းၽေး လွင်ႈတၢင်းပဵၼ် ၊ လွင်ႈၵိၼ်ယႅမ်ႉ ဢိုပ်းၶဝ်ႈ၊ဢိုမ်းၼမ်ႉသေ လႆႈလူႉတၢႆၵႂႃႇမီးတၢင်းၼမ် ၊ ၵူၼ်မိူင်း ဢၼ်ယူႇသဝ်းၼႂ်းထိူၼ်ႇၸိူဝ်းၵေႃႈ ၵူဝ်လႆႈပဵၼ်ၸိူင်ႉၼၼ်ႉ ဝႃႈၼႆ။
မိူဝ်ႈလဵဝ်လွင်ႈၵိၼ်ယႅမ်ႉ လႄႈ လွင်ႈတႃႇၸွႆႈထႅမ်ၸိူဝ်းၼၼ်ႉၵေႃႈ ဢမ်ႇပႆႇၸၢင်ႈႁဵတ်းႁိုဝ် ၵွပ်ႈပိၵ်ႉဢိုတ်းလွင်ႈၵႂႃႇလွင်ႈပႆသေ ၵူၼ်းမိူင်းဢၼ်မီးယူႇသဝ်းၼႂ်းထိူၼ်ႇ ၵမ်ႉၼမ်လႆႈၵိၼ်ၶဝ်ႈလၢႆ ယူႇသဝ်းၵႂႃႇၸိူင်ႉၼၼ်ႉ ၵူႈဝၼ်းၵူၺ်း ဝႃႈၼႆ။
ၶၢဝ်းယၢမ်းမိူဝ်းလဵဝ်ၵေႃႈ ဢၼ်တိုၵ်ႉသိုပ်ႇပဵၼ်ပၢင်တိုၵ်းၵၼ်သေ လႆႈၵိုတ်းပိၵ်ႉလွင်ႈၵႂႃႇမႃးပႆ ၵူၼ်းၼႂ်းမိူင်းႁူမ်ႈတုမ်ၼၼ်ႉၸွမ်းပိုၼ်ႉတီႈၵမ်ႉၼမ် တႃႇတေလႆႈလွင်ႈၸွႆႈထႅမ် တီႈ Agency လႄႈ ဢၼ်ၵူႈမိူင်းမိူင်း ဢမ်ႇႁွတ်ႈၽဵဝ်မႃးလႆႈ လႄႈ လႆႈဢဝ်တၢင်းၸွႆႈထႅမ် တီႈၵူၼ်းမိူင်းၼင်ႇၵၼ် ၸွႆႈထႅမ် ယူႇသဝ်းၵိၼ်သၢင်ႈၵႂႃႇၵူၺ်း ဝႃႈၼႆ။
Source : DVB
