လုင်းတိၼ်ႇဝိၼ်း ဢႃယု(59) ပီႊ ၵေႃႉဢၼ်ပဵၼ် ပူႇၵၢင်ႉဝၢၼ်ႈၶိုမ်းမႂ်ႇ၊ ဢိူင်ႇမိူင်းငေႃႉ၊ ၸေႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ထုၵ်ႇၺႃးၸုမ်းသိုၵ်း RCSS တီႉၺွပ်းတူဝ်ၵႂႃႇ တီႈၼႂ်းဝဵင်းၵျွၵ်ႉမႄး တီႈပွၵ်ႉ(7) မိူဝ်ႈလိူၼ်September 30 ဝၼ်းၼၼ်ႉ လႆႈလူႉသဵင်ႈၵႂႃႇမိူဝ်ႈၼႆႉ ဝၼ်းထီႉ 25-10-2021 ယဝ်ႉဝႃႈၼႆ။
ၵဵဝ်ႇၵပ်းပိူင်ပဵၼ်လွင်ႈၼႆႉ ၵေႃႉပဵၼ်လုၵ်ႈၸၢႆး ဢၼ်ၵႂႃႇႁဵတ်းသိုၵ်း RCSS သေ လၵ်ႉပၢႆႈၵႂႃႇၼႆ လႄႈ ယူႇတီႈသိုၵ်း RCSS တီႈတပ်ႉႁူးသူၼ် ၸင်ႇလႆႈမႃးၺွပ်းဢဝ်တူဝ်ပေႃႈမၼ်း ၵေႃႉပဵၼ် လုင်းတိၼ်ဝဵၼ်း ပူႇၵၢင်ႉဝၢၼ်ႈၶိုမ်းမႂ်ႇၵႂႃႇ ၊ လုင်းတိၼ်ႇဝိၼ်းၼႆႉ ထုၵ်ႇတီႉၺွပ်းၵႂႃႇယဝ်ႉ ၺႃးတူတ်ႈတၢမ်ႇ ၶမ်ၶွၵ်ႈတႂ်ႈလိၼ်တီႈတပ်ႉႁူးသူၼ်သေ ၶိုၼ်းလၵ်ႉပၢႆႈဢွၵ်ႇမႃးဝႃႈၼႆ ၊။
ဝၢႆးသေပၢႆႈဢွၵ်ႇၶွၵ်ႈၶင်မႃးၽႅဝ်ၶိုၼ်းတီႈ ဝၢၼ်ႈၵၢတ်ႇတႂ်ႈ ဝၢၼ်ႈဝဵင်း၊ ဢိူင်ႇၵုၼ်ၵွၵ်ႇ၊ မိူင်းငေႃႉ၊ ၸေႈဝဵင်းၵျွၵ်ႉမႄးၼၼ်ႉ လႆႈလူႉသဵင်ႈၵၢမ်ႇၵႂႃႇတီႈႁိူၼ်း လုင်းဢႃႇယူႉ+ပႃႈသွႆႈ ဝႃႈၼႆ။
ၵူၼ်းမိူင်းတီႈမိူင်းငေႃႉၵေႃႉၼိုင်ႈလၢတ်ႈၼႄႁဝ်းၶႃႈဝႃႈ-“ဢေႃႈၶႃႈ မိူဝ်ႈၶၢဝ်းယၢမ်း(2)မူင်း ၼႂ်ၼႆႉၼၼ်ႉဢေႃႈ မၼ်းၸၢႆးလႆႈလၢၵ်းပၢႆႈဢွၵ်ႇမႃးတီႈ ဝၢၼ်ႈႁူးသူၼ် လႆႈလၵ်ႉပၢႆႈဢွၵ်ႇမႃး တၢင်းၶိုၼ်းၼႆၶႃႈ မၼ်းၸၢႆးၶိုၼ်းၽႅဝ်မႃးတီႈႁိူၼ်း လုင်းဢႃႇယုႉ+ပႃႈသွႆႈ တီႈႁိမ်းဝၢၼ်ႈၵၢတ်ႇတႂ်ႈ ဝၢၼ်ႈဝဵင်း၊ ဢိူင်ႇၵုၼ်ၵွၵ်ႇ၊ မိူင်းငေႃႉ၊ ၸေႈဝဵင်းၵျွၵ်ႉမႄးၼၼ်ႉ လႆႈလူႉသဵင်ႈၵၢမ်ႇၵႂႃႇ မိူဝ်ႈယၢမ်း ၵၢင်ၼႂ် (3)မူင်းၼၼ်ႉဢေႃႈ၊ ဝၢႆးၼၼ်ႉၵေႃႈ ဢွၼ်ၵၼ်လုမ်းလႃးပၼ်ၶၢပ်ႈတူဝ်သေ ပေႃးထိုင်မႃး ယၢမ်းဝၢႆးဝၼ်းမႃးၸိုင် တေပူၼ်ႉၶၢပ်ႈတူဝ်ပၼ်ၵႂႃႇ တီႈဝၢၼ်ႈၵၢတ်ႇတႂ်ႈ ဝၢၼ်ႈဝဵင်း၊ ဢိူင်ၵုၼ်ၵွၵ်ႇ ၵႂႃႇယူႇၼႆ” လၢတ်ႈဝႃႈၼင်ၼႆ။
ၵဵဝ်ႇၵပ်းၵူၺ်းၵူၼ်းၸိူဝ်းဢၼ်ထုၵ်ႇၺႃးတီႉၺွပ်းၵႂႃႇ ၼႂ်းဝၼ်းလဵဝ်ၵၼ် တင်းလုင်းတိၼ်ႇဝိၼ်း ၸိူဝ်းၼၼ်ႉ ဢမ်ႇပႆႇႁၼ်ပွႆႇမႃးၶိုၼ်းမိူၼ်ၵၼ် ဝႃႈၼႆ။
