တီႈမိူင်းၼီႇပေႃး ၽူၼ်ၵိုင်ႉၵၢင်ႉတူၵ်းႁႅင်းထပ်းၵၼ်ႁိုင်သၢမ်ဝၼ်းလႄႈ လိၼ်ယူတ်ႇ ၼမ်ႉလွႆ လူၵ်ႈၼွင်း  လႄႈ မီးၵူၼ်းလူႉတၢႆဢမ်ႇယွမ်း (43) ၵေႃႉ ဝႃႈၼႆ။

မိူဝ်ႈဝၼ်းထီႉ 20/10/2021 ၽူႈမီးပုၼ်ၽွၼ်းၽၢႆႇပလိၵ်ႈလၢတ်ႈဝႃႈ “ ၵူၼ်းၵမ်ႈၽွင်ႈဢၼ်ႁၢႆဝႆႉ ၵေႃႈ မီးယူႇ (30) ၵေႃႉဝႃႈၼႆ၊ ၸဝ်ႈၼႃႈတီႈပလိၵ်ႈ သၢၼ်ႇတႃႇၶၢၼ်ႇဝႃႇ(ဆန်တာ ခန်ဝါ) လၢတ်ႈ ဝႃႈ ၵူၼ်းဢၼ်လႆႈတၢင်းၸဵပ်းဝၢတ်ႇၵေႃႈတေမီးယူႇမွၵ်ႈ (20) ၵေႃႉပၢႆ ၵူၼ်းၸိူဝ်းၼႆႉ လႆႈသူင်ႇ ယူတ်းယႃတူဝ်တီႈႁူင်းယႃၼႂ်းမိူင်းဝႆႉယူႇ” ဝႃႈၼႆ။

ဝၢၼ်ႈၵွင်းမူး ဢၼ်မီးၽၢႆႇလင် ဝဵင်းလူင်ၶတ်ႉတမၢၼ်ႇတူႇ  (ခတ္တမန္ဒူ မြို့တော်) ၵႆၵၼ်မွၵ်ႈ 220 လၵ်းပၢႆၼၼ်ႉ မီးၵူၼ်းဢၼ်ပၢႆႈၽေးၼမ်ႉယူႇမွၵ်ႈ 60 ပၢႆ ဢမ်ႇၸၢင်ႈဢွၵ်ႇၵႂႃႇတၢင်းလႂ်ၶမ်ဝႆႉယူႇ၊  တႃႇတေၶဝ်ႈၸွႆႈၽႅဝ်တီႈၼၼ်ႉၵေႃႈ ၶတ်းၸႂ်ယူႇသေတႃႉ ၵွပ်ႈဝႃႈၽူၼ်သိုပ်ႇတူၵ်းႁႅင်း ဢမ်ႇထၢတ်ႇ လႄႈ ဢမ်ႇပႆႇၸၢင်ႈၶဝ်ႈၵႂႃႇၸွႆႈလႆႈ ဝႃႈၼႆ။

“ ၸဵမ်မိူဝ်ႈဝႃးယဝ်ႉ ၵွပ်ႈၾိင်ႈၾႃႉရႃႇသီႇ ဢမ်ႇလီ ၽူၼ်ၵေႃႈတူၵ်းႁႅင်းဢမ်ႇထၢတ်ႇဢမ်ႇဝၢႆး ၸုမ်းၽၢႆႇၸွႆႈထႅမ်ၶဝ်ႈၼမ်ႉတၢင်းၵိၼ်  တႃႇတေၶဝ်ႈၽႅဝ်တီႈဝၢၼ်ႈၼၼ်ႉၵေႃႈ ပႆႇၶဝ်ႈၽႅဝ်၊ မိူဝ်ႈၼႆႉၵေႃႈတိုၵ်ႉသိုပ်ႇၶတ်းၸႂ်ထႅင်ႈယူႇၼႆ ၸဝ်ႈၼႃႈတီႈပလိၵ်ႈ ၶုၼ်ႇဝႃႇ(ခွန်ဝါ) လၢတ်ႈၵႂႃႇတီႈ ႁွင်ႈၵၢၼ်ၶၢဝ်ႇ (ရိုက်တာ) ” ဝႃႈၼႆ။

မႄႈၼမ်ႉထူမ်ႈၼွင်း လႄႈ ၶူဝ်၊ သဵၼ်ႈတၢင်း၊ ႁိူၼ်းၸိူဝ်းၼႆႉ ထုၵ်ႇၼမ်ႉထူမ်ႈပႃးၵႂႃႇၸွမ်းမူတ်း ၽၢင်ႁၢင်ႈ လွၵ်းၼႃး ဢၼ်ထုၵ်ႇၼမ်ႉလူၵ်ႈထူမ်ႈ ၸိူဝ်းၼႆႉၵေႃႈ ၼႄဝႆႉယူႇ ဝႃႈၼႆ ။တီႈမိူင်း ၼီႇပေႃးၼႆႉၵူႈပီႊၵၢင်လိူၼ် July တေႃႇထိုင်လိူၼ် September ၽူၼ်တူၵ်းၼမ်ႉၼွင်း လိၼ်ယူတ်ႇ ဝႃႇ ၸိူဝ်းၼႆႉၵႆႉပဵၼ်ယူႇ ၊ လိူဝ်ၼၼ်ႉၵေႃႈ သိုပ်ႇၵႂႃႇၼႃႈၼႆႉ  ၽူၼ်တေၸၢင်ႈတူၵ်းၼမ်ထႅင်ႈ ၼႆယူႇ ဝႃႈၼႆ။

Source news.dvb.no