ယွၼ်ႉပၢင်တိုၵ်းမိူင်းၶျၢင်းပွတ်းႁွင်ႇသေႁဵတ်းႁႂ်ႈၵူၼ်းမိူင်းၼပ်ႉႁူဝ်ႁဵင်လႆႈပၢႆႈၽေးသိုၵ်း လႄႈ မိူဝ်ႈလဵဝ်တႃႇၵူၼ်းၸိူဝ်းပၢႆႈၽေးသိုၵ်းၼၼ်ႉၵေႃႈ လႆႈႁၢင်ႈႁႅၼ်းတီႈယူႇပၼ်ယူႇဝႃႈၼႆ ။
ဝၼ်းထီႉ 20/10/2021 တီႈၼိူဝ်သဵၼ်ႈတၢင်း ၽလၢၼ်း(ဖလမ်း) လႄႈ ႁႃးၶႃး(ဟားခါး) ၼႂ်းမိူင်း ၶျၢင်းပွတ်းႁွင်ႇ ၼၼ်ႉတပ်ႉသိုၵ်းမၢၼ်ႈ လႄႈ တပ်ႉႁူမ်ႇလုမ်ႈၵူၼ်းပိုၼ်ႉတီႈ ပဵၼ်ပၢင်တိုၵ်း ၵၼ်ယဝ်ႉ ၵူၼ်းပိုၼ်ႉတီႈလႆႈဢွၼ်ၵၼ်ဢွၵ်ႇပၢႆႈၼပ်ႉႁူဝ်ႁဵင်မၼ်း ၵွပ်ႈၼၼ် ၼင်ႇႁိုဝ်ၵူၼ်း ပၢႆႈၽေးၸိူဝ်းၼႆႉ တေမီးတီႈယူႇၼၼ်ႉ ႁၢင်ႈႁႅၼ်းတႃႇတေပိုတ်ႇၽုၺ်ႇပၼ် တီႈလိုဝ်ႈသဝ်း ၵူၼ်းပၢႆႈၽေး (IDP) ဝႃႈၼႆ ။
တေဢဝ်ဝၼ်းထီႉ11ဝၼ်း လိူၼ်ဢွၵ်ႊထူဝ်ႊပိူဝ်ႊမႃးၼႆႉ တပ်ႉသိုၵ်းမၢၼ်ႈဢၼ်လုၵ်ႉတၢင်း ဝဵင်းၵလေး(ကလေးမြို့) မိူင်းၶျၢင်း ၼၼ်ႉၶိုၼ်ႈမႃးလႄႈ တၢင်းတီႈၼိူဝ်သဵၼ်ႈတၢင်း ၽလၢၼ်း (ဖလမ်း) လႄႈ ႁႃးၶႃး(ဟားခါး) ၸိူဝ်းၼႆႉ တပ်ႉသိုၵ်းမၢၼ်ႈ တင်း ၽၢႆႇတပ်ႉသိုၵ်းႁူမ်ႇလူမ်ႈ ၵူၼ်းပိုၼ်ႉတီႈလႆႈပဵၼ်ပၢင်တိုၵ်းၵၼ် ဝႃႈၼႆ။
ၵူၼ်းၸွႆႈထႅမ်ၵူၼ်းပၢႆႈၽေးတီႈ ဝဵင်းၽလၢၼ်း(ဖလမ်း) ၵေႃႉၼိုင်ႈလၢတ်ႈဝႃႈ-“မိူဝ်ႈဝၼ်းထီႉ 19/10/2021 ပဵၼ်ပၢင်တိုၵ်းၵၼ်သေ ယွၼ်ႉတပ်ႉသိုၵ်းမၢၼ်ႈဢဝ်ၶိူင်ႈလူင်ယိုဝ်းသႂ်ႇလႄႈ ဝၢၼ်ႈ ၸိူဝ်းဢၼ်မီးယူႇတီႈႁိမ်းပဵၼ်ပၢင်တိုၵ်း မိူၼ်ၼင်ႇ ဝၢၼ်ႈ(တားရ်ရွာ၊ တလန်ဇာရ်ရွာ၊ ရမ်ထလို ရွာ) ဝၢၼ်ႈဢၼ်ယူႇၼိူဝ်သဵၼ်ႈတၢင်းၵႂႃႇၸူး (ရိဒ်ရေရွှာ) ၸိူဝ်းၼႆႉ ၵူၼ်းတၢင်းဝၢၼ်ႈ လႆႈဢွၼ်ၵၼ်ဢွၵ်ႇပၢႆႈယူႇ ဝႃႈၼႆ။
ၽူႈမီးပုၼ်ႈၽွၼ်း တႃႇတေပိုတ်ႇၽုၺ်ႇပၼ်တီႈယူႇသဝ်းၵူၼ်းပၢႆႈၽေး လၢတ်ႈၼႄဝႃႈ-“ဝၢၼ်ႈႇဢၼ်မီးယူႇၼိူဝ်သဵၼ်ႈတၢင်းလူင် 4 ဝၢၼ်ႈၸိူဝ်းၼႆႉလႆႈၶၢမ်ႇဢေႃႈ၊ ၵူၼ်းဝၢၼ်ႈတၢင်း 4 ဝၢၼ်ႈလႆႈဢွၼ်ၵၼ်ဢွၵ်ႇပၢႆႈမူတ်း ၊ လႆႈပၢႆႈယူႇတီႈၼႂ်းထိူၼ်ႇ လႆႈဢဝ်ၽႃႈယၢင်မုင်းသေ ယူႇဝႆႉဢေႃႈ ၊ ပေႃးၶဝ်လႆႈယူႇဝႆႉၸိူင်ႉၼႆ ၵူဝ်ထုၵ်ႇထၢင်ႇထိူမ်ဝႃႈ ပဵၼ်ၸုမ်း (PDF) ၼႆသေ ၵူဝ်ၶဝ် ပဵၼ်ၵႂႃႇသေၸိူဝ်ႉသေလွင်ႈ ဝူၼ်ႉဝႃႈၼၼ်သေ ပဵၼ်ဢၼ်မႆႈၸႂ်ယူႇဢေႃႈ၊ ၵူၼ်းပၢႆႈၽႄးတေႉ တေမီးယူႇမွၵ်ႈ(3,500) ပၢႆ ဝႃႈၼႆ။
တပ်ႉသိုၵ်းမၢၼ်ႈ ဢၼ်မီးယူႇဝႆႉမိူဝ်ႈလဵဝ် တီႈၽလၢၼ်း(ဖလမ်း) ဝဵင်းလူင်ႁႃးၶႃး (ပြည်နယ်မြို့ တော်ဟာခါး) မိူဝ်ႈဝၼ်းထီႉ 20/10/2021 ယၢမ်းဝၢႆးဝၼ်းၼၼ်ႉၽႅဝ်မႃးတီႈၼႂ်းၵႄႈၵၢင်သဵၼ်းတၢင်း ၽလၢၼ်း(ဖလမ်း) လႄႈ ႁႃးၶႃး(ဟားခါး)၊ ႁိူၼ်းၵူၼ်းဝၢၼ်ႈ(10)လင်ပၢႆ ထုၵ်ႇၺႃးဢဝ်ၾႆးၸုတ်ႇ ၽဝ် ပႃးတၢင်းဝတ်ႉၵျွင်းမုၼ်ၸဝ်ႈ ထုၵ်ႇယႃႉလႅဝ် ၸိူဝ်းဢၼ်မီးယူႇတီႈၼိူဝ်သဵၼ်ႈတၢင်း ဝဵင်း ၽလၢၼ်း(ဖလမ်း) လႄႈ ႁႃးၶႃး(ဟားခါး) ၽၢႆႇၼိူဝ်ဝၢၼ်ႈမႂ်ႇထလၢၼ်(ထလန်ရောန်ရွာ) ၵူၼ်းမိူင်းၵေႃႈလႆႈဢွၼ်ၵၼ်ဢွၵ်ႇပၢႆႈဢွၵ်ႇတၢင်းၼမ် ဝႃႈၼႆ ။
Source.BBC.com
