ပႃႇတီႇမႂ်ႇသုင်ၸိုင်ႈတႆး SSPP/SSA ၸတ်းႁဵတ်းပၢင်ႁူပ်ႉထူပ်း ပေႃႈမႄႈၵူၼ်းမိူင်း ၼႂ်းဢိူင်ႇႁူဝ်ၶၢႆး ၸုမ်း(2) ၸေႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း ။
ဝၼ်းထီႉ 27 လိူၼ်ဢွၵ်ႊထူဝ်ႊပိူဝ်ႊ 2021 ယၢမ်းၵၢင်ၼႂ် 10:12 မူင်းတေႃႇ 12:48 ၼၼ်ႉ ယူႇတီႈ ပႃႇတီမႂ်ႇသုင်ၸိုင်ႈတႆး SSPP/SSA ၸဝ်ႈႁၢၼ်ၽူဝ်းလူႇ ဢွၼ်ႁူဝ်သေ ႁဵတ်းပၢင်ႁူပ်ႉထူပ်း ၵူၼ်းမိူင်းသပ်းလႅင်း ၵဵဝ်ႇၵပ်းလွင်ႈ မူႇပိူင်မုၵ်ႉၸုမ်း ၊ ၵၢၼ်မိူင်း ၊ ၵၢၼ်သိုၵ်း ၊ လွင်ႈၶၢဝ်ႇငၢဝ်း ၊ လွင်ႈဢၼ်ၵူၼ်းမိူင်း ထုၵ်ႇသိုၵ်း RCSS လွၵ်ႇငိူတ်ႈၵူဝ်ႁေဝႆႉၸိူဝ်းၼၼ်ႉ ၶိုၼ်းလၢတ်ႈပၼ် ႁႂ်ႈ ၵူၼ်းမိူင်းပွင်ႇၸႂ် ႁဵတ်းၵၢၼ်သုၼ်ႇတူဝ်ၵႂႃႇလႆႈလွတ်ႈလႅဝ်း ဢမ်ႇမီးၽေးသင်၊ လိူဝ်ၼၼ်ႉ ၵွပ်ႈပိူဝ်ႈဝႃႈ မၢၵ်ႇႁၢင်ႈ မၢၵ်ႇၽင် တိုၵ်ႉၵိုတ်းထႅင်ႈတင်းၼမ် ဢၼ်ပႆႇၵူတ်ႇထတ်းႁၼ်မူတ်း လႄႈ သင်ၸိူဝ်ႉႁၼ်မႅၼ်ႈ မၢၵ်ႇမႅင်း မၢၵ်ႇႁၢင်ႈ ၼႂ်းႁႆႈၼႂ်းသူၼ် သဵၼ်ႈတၢင်းၵႂႃႇ ႁဵတ်းၵၢၼ်ၵူၼ်းမိူင်း ၸိူဝ်းၼႆႉ ႁႂ်ႈပွင်ႇပၼ်ၸဝ်ႈၼႃႈတီႈ ယူႇတီႈၽၢႆႇၽူႈမီးပုၼ်ႈၽွၼ်း တေၸွႆႈထႅမ်ပူတ်းဢွၵ်ႇပၼ် ၵႂႃႇၸိူဝ်းၼႆႉ ဝႃႈၼႆ ။
ၵူၼ်းဝၢၼ်ႈ ၸုမ်း 2 ၼႂ်းဢိူင်ႇႁူဝ်ၶၢႆး မိူၼ်ၼင်ႇ ဝၢၼ်ႈပၢင်ႇၵွင်းမူး ၊ ဝၢၼ်ႈၼွင်လႅဝ် ၊ ဝၢၼ်ႈမႂ်ႇ လၵ်းမ ၊ ဝၢၼ်ႈပၢင်ႇလႅင်း လႄႈ ဝၢၼ်ႈၼမ်ႉမေႃႇဢုတ်ႇ ၊ ႁႅင်းၵူၼ်းၶိုၼ်ႈႁွတ်ႈမီးယူႇ 100 ပၢႆ ဝႃႈၼႆ။
ၵူၼ်းၼႂ်းပိုၼ်ႉတီႈ ဢၼ်ၵႂႃႇၶဝ်ႈႁူမ်ႈပၢင်ႁူပ်ႉထူပ်းၵေႃႉၼိုင်ႈလၢတ်ႈဝႃႈ – ” ႁဝ်းၶႃႈၵူၼ်းမိူင်း တႄႉၵူဝ်ဢေႃႈ သိုၵ်း RCSS လွၵ်ႇငိူတ်ႈႁဝ်းဝႃႈ ပေႃးမိူဝ်းႁိူၼ်းၸိုင်တေၺႃးၸုမ်းသိုၵ်း SSPP/SSA ၶဝ်ၺွပ်းၵႂႃႇဢိူဝ်ႈ ပေႃးပဵၼ်ၵူၼ်းၸၢႆးလုၵ်ႈဢွၼ်ႇ ၵူၼ်းထဝ်ႈဢမ်ႇဝႆႉ တေဢဝ်ၵႂႃႇႁဵတ်းသိုၵ်း ပေႃးပဵၼ်ၼၢင်းယိင်း ၶဝ်တေၵၼ်ႉၸၼ် လူလၢႆသူဢိူဝ်ႈ ဝႃႈၼႆၶႃႈ ႁဝ်းၶႃႈၵေႃႈၵူဝ် ဢမ်ႇႁတ်း မႃးဢေႃႈ ၽိူဝ်ႇမႃးထူပ်း မႃးႁၼ် မႃးထွမ်ႇငိၼ်း ၶဝ်လၢတ်ႈၼႂ်းပၢင်ၵုမ် ၸိူဝ်းၼႆႉတႄႉ ဢမ်ႇၸႂ်ႈ ၸိူင်ႉၼၼ်ၶႃႈ ၶဝ်ၵေႃႈ ဢမ်ႇႁဵတ်းသင်တီႈႁဝ်း ၶဝ်ၵေႃႈ မႃးသပ်းလႅင်းၼႄႁဝ်းၶႃႈ လွင်ႈၵၢၼ်သိုၵ်း ၊ ၵၢၼ်မိူင်း လႄႈ ၶဝ်ၵူၺ်းလၢတ်ႈဝႃႈ ၵၢၼ်ႁဝ်းၵေႃႈႁဝ်းႁဵတ်း ၵၢၼ်ၶဝ်ၵေႃႈ ၶဝ်တေႁဵတ်းၵူၺ်း ဢမ်ႇပဵၼ်သင် ဝႃႈၼႆၵူၺ်း ” ၼႆၶႃႈ ။
ဝၢႆးသေမွၵ်ႇလၢတ်ႈသပ်းလႅင်းပၼ်ယဝ်ႉ ယူႇတီႈၵူၼ်းမိူင်းၵေႃႈ တၢင်ႇလၢတ်ႈၼႄ လွင်ႈတၢင်း ဢၼ်ၵူၼ်းမိူင်းၶႂ်ႈႁဵတ်းၶႂ်ႈသၢင်ႈ ၊ လွင်ႈယူႇၵိၼ်သဝ်း ၊ လွင်ႈၵူၼ်းမိူင်း လႆႈထုၵ်ႇလွၵ်ႈငိူတ်ႈၵူဝ်ႁေ ၸိူဝ်းၼႆႉၵႂႃႇ ဝႃႈၼႆ ။
ၼႂ်းထုင်ႉဢိူင်ႇႁူဝ်ၶၢႆး ဝၢႆးသေပၢင်တိုၵ်းယဵၼ်ၵႂႃႇယဝ်ႉ ယူႇတီႈ ၽၢႆႇဢုပ်ႉပိူင် ၽၢႆႇတပ်ႉ ပႃႇတီႇမႂ်ႇသုင်ၸိုင်ႈတႆး လူင်းႁူပ်ႉထူပ်းပေႃႈမႄႈၵူၼ်းမိူင်း သပ်းလႅင်းၼႄ ၵၢၼ်မိူင်း၊ ၵၢၼ်သိုၵ်း ၊ ၵၢၼ်ၶၢဝ်ႇ ၊ လွင်ႈတၢင်းပဵၼ် လႄႈ လွင်ႈတွၼ်ႈလိၼ်ၶိုၼ်ႈယႂ်ႇ ၸိူဝ်းၼႆႉ ဝႃႈၼႆ။
