27/09/2021 sspp ssa

မိူဝ်ႈဝၼ်းထီႉ 25/09/2021 ၼီႊ ၸုမ်းသိုၵ်းဢူၺ်းလီပွတ်းႁွင်ႇ SSPP/SSA + TNLA တင်း ၸုမ်းသိုၵ်း RCSS လႆႈပဵၼ်ပၢင်တိုၵ်းၵၼ်သေ ႁိူၼ်းၵူၼ်းမိူင်း တီႈဝၢၼ်ႈႁူးၵွတ်ႈ၊ ၸေႈဝဵင်းၵျွၵ်ႉမႄး၊ ၸိုင်ႈတႆးပွတ်းႁွင်ႇ ထုၵ်ႇၺႃးဢဝ်ၼမ်ႉမၼ်း ဢိၼ်ႇၵျိၼ်ႇဝၢႆႇတႃးယဝ်ႉ ဢဝ်ၾႆးၸုတ်ႇၽဝ်ပႅတ်ႈ ၊ ဢၼ်လႆႈၺႃးၾႆးၸုတ်ႇ ၽဝ်တႄႉ ႁိူၼ်း(3)လင်ၼႆႉ တႃႇ(2)လင်တေႉၾႆးမႆႈမူတ်း ထႅင်ႈၼိုင်ႈလင်တႄႉၵူၼ်းဝၢၼ်ႈ တၼ်းၶႄ ၶိုၼ်းလႆႈ ဢမ်ႇတၼ်းမႆႈမူတ်း၊ ၵဵဝ်ႇလူၺ်ႈလွင်ႈ ဢဝ်ၼမ်ႉမၼ်းဢိၼ်ႇၵျိၼ်ႇဝၢႆႇတႃးဢဝ်ၾႆးၸုတ်ႇၼႆႉ ပဵၼ်ၸုမ်းလႂ်ၼႆ ဢမ်ႇပႆႇလႆႈႁူႉ ၼႆၶႃႈ။

ၵူၼ်းမိူင်းပိုၼ်ႉတီႈ ဝၢၼ်ႈႁူးၵွတ်ႈ ၵေႃႉၼိုင်ႈလၢတ်ႈၼႄႁဝ်းၶႃႈဝႃႈ-“ဢေႃႈၶႃႈ ၸႂ်ႈၶႃႈဢေႃႈ တင်ႈၸႂ်ဢဝ်ၾႆးၸုတ်ႇၽဝ်ပႅတ်ႈၶႃႈဢေႃႈ ပဵၼ်ၸုမ်းလႂ်ၸုတ်ႇတေႉဢမ်ႇလႆႈႁူႉၶႃႈ ႁိူၼ်းဢၼ်လႆႈၺႃးၸုတ်ႇၽဝ်တေႉ မီးယူႇ(3)လင်ဢေႃႈ ထႅင်ႈၼိုင်ႈလင်တေႉ ဢမ်ႇတၼ်းလႆႈမႆႈၶႃႈ ၵွပ်ႈၸဝ်ႈႁိူၼ်းလင်ၼၼ်ႉၶဝ်တၼ်းၶႄလႆႈ လႄႈ ဢမ်ႇတၼ်းလႆႈမႆႈၶႃႈ မိူဝ်ႈၵႂႃႇၶႄၼၼ်ႉလႆႈႁၼ်ႁွႆးၼမ်ႉမၼ်း ဢိၼ်ႇၵျိၼ်ႇဝၢႆႇတႃးဝႆႉသေၼႆၶႃႈဢေႃႈ ဢၼ်ၼႆႉတႄႉ တေဝႃႈမၢၵ်ႇတူၵ်းသႂ်ႇသေမႆႈတႄႉ ဢမ်ႇပဵၼ်လႆႈၶႃႈ တိုၼ်းတင်ႈၸႂ်ဢဝ်ၾႆးၸုတ်ႇၽဝ်ၶႃႈဢေႃႈ မၼ်းပဵၼ်ၸုမ်းလႂ် ၸုတ်ႇတႄႉဢမ်ႇပႆႇလႆႈႁူႉၶႃႈ ႁိူၼ်း(2)လင်ၼၼ်ႉတေႉလႆႈမႆႈပႃးၵႂႃႇၸွမ်းၼႂ်းၾႆးမူတ်းယဝ်ႉၶႃႈ ၶိူင်ႈၶူဝ်းႁိူၼ်း ၽႃႈႁူမ်ႇၶူဝ်းၼွၼ်း ၽိူၼ်ဝၢၼ်ႇ လႄႈ လူတ်ႉၶိူင်ႈ(2)လမ်း ၶႃႈဢေႃႈ လႆႈမႆႈၵႂႃႇၸွမ်းၼႂ်းၾႆးမူတ်းၶႃႈ” လၢတ်ႈဝႃႈၼင်ႇၼႆၶႃႈ ။

လွင်ႈဝႃႈပဵၼ်မၢၵ်ႇတူၵ်းသႂ်ႇလႄႈမႆႈတႄႉဢမ်ႇပဵၼ်လႆႈ မိူၼ်ၼင်ႇဝတ်ႉၵျွင်းၸိူဝ်းၼႆႉ​​ၵေႃႈၸၢၵ်ႇမၢၵ်ႇတိူဝ်ႉၺႃးယူႇ ၵူၺ်းၵႃႈ ၾႆးဢမ်ႇမႆႈ ႁိူၼ်မၢင်လင်​​ၵေႃႈၺႃးယူႇၸၢၵ်ႇမၢၵ်ႇ ၵူၺ်းၵႃႈၾႆးဢမ်ႇမႆႈၶႃႈ မိူၼ်ႁိူၼ်းၸိူဝ်းၼႆႉ မႆႈၵႂႃႇလီလီၼႆႉ သမ်ႉမီးႁွႆးၼမ်ႉမၼ်းဢိၼ်ႇၵျိၼ်ႇဝၢႆႇတႃးဝႆႉ​​သေ မၼ်းပဵၼ်ၵူၼ်းတင်ႈၸႂ်ၸုတ်ႇၵႂႃႇၵူၺ်း ၼႆၵူၼ်းဝၢၼ်ႈသိုပ်ႇလၢတ်ႈထႅင်ႈ ဝႃႈၼႆ ။ ဢိင်ၼိူဝ်ၸုမ်းဢူၺ်းလီပွတ်းႁွင်ႇ လႄႈ သိုၵ်း Rcss ပိုတ်းယိုဝ်းၵၼ်မိူဝ်ႈဝၼ်းထီႉ 25 /09/2021 ဝၼ်းၼၼ်ႉႁဵတ်းႁႂ်ႈႁိူၼ်းၵူၼ်းမိူင်းၺႃးၸုတ်ႇၽဝ် လႄႈ ဝတ်ႉၵျွင်းမုၼ်ၸဝ်ႈၼိုင်ႈလင် လႆႈလူႉၵွႆပႃးၵမ်ႈၽွင်ႈ ဝႃႈၼႆ ။

Source : Local