ႁိူၼ်းသီၶၢဝ် ထုင်ႉလွႆႁႃႉ
ၵျွင်းၸဝ်ႈၶၢဝ် ဝၢၼ်ႈၶိူဝ်းၼိမ်း လႆႈၵူတ်ႇထတ်းႁၼ်မႅၼ်ႈ တၢင်းပဵၼ်ၶူဝ်ႊဝိတ်ႉ-19 မီးယူႇ (45)ပႃး တီႈဝတ်ႉသီႇရိရတၼႃႇ ဝၢၼ်ႈၶိူဝ်းၼိမ်း၊ ဢိူင်ႇၼွင်မွၼ် တူင်ႇဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ပူၼ်ႉမႃးမိူဝ်ႈဝၼ်းထီႉ 11/09/2021 ယူႇတီႈၸုမ်းၽၢႆႇယူႇလီ ဢိူင်ႇၼွင်မွၼ် လႆႈၵႂႃႇၵူတ်ႇထတ်း တၢင်းပဵၼ်ၶူဝ်ႊဝိသ်ႉ-19 တီႈၵျွင်းၸဝ်ႈၶၢဝ် ဝတ်ႉသီႇရိရတၼႃႇ ဝၢၼ်ႈၶိူဝ်းၼိမ်း ဢၼ်မီးၽၢႆႇႁွင်ႇ ၼွင်မွၼ်သေ ၵူတ်ႇထတ်းၸႅတ်ႈပၼ် တင်းမူတ်း (55) ပႃး ဢၼ်ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိသ်ႉ-19 မီး (45)ပႃး ဝႃႈၼႆ ။
ၽူႈမီးပုၼ်ႈၽွၼ်းၼႂ်းဝၢၼ်ႈၶိူဝ်းၼိမ်း လၢတ်ႈၼေဝႃႈ-“ၸဝ်ႈၶၢဝ်ဢၼ် တိတ်းၸပ်းၸိူဝ်ႉမႅင်းတၢင်းပဵၼ် ၶူဝ်ႊဝိသ်ႉ-19 တႃႇ (45) ပႃးၼၼ်ႉတႄႉ ယူႇတီႈၸုမ်းၽၢႆႇပၢႆးယူႇလီၶဝ် လႆႈဢဝ်သူင်ႇၶိုၼ်ႈၵႂႃႇၵုမ်းၵမ် ၵၵ်းတူဝ် တီႈဝဵင်းလႃႈသဵဝ်ႈယဝ်ႉၶႃႈ ဢၼ်ၵိုတ်းလိူဝ်ထႅင်ႈ (10) ပႃး တေႉ လႆႈပိၵ်ႉဢိုတ်းဝႆႉလွင်ႈၵႂႃႇမႃးပႆ တႃႇၼိုင်ႈပၢတ်ႈ ပေႃးတဵမ်မႃးၼိုင်ႈပၢတ်ႈၸိုင် ယူႇတီႈၽၢႆႇယူႇလီ လႄႈၽူႈမီးပုၼ်ႈၽွၼ်း တေၶိုၼ်း ဢဝ်ၶိုၼ်ႈၵႂႃႇၵူတ်ႇထတ်းတီႈဝဵင်းလႃႈသဵဝ်ႈထႅင်ႈ ၼႆၶႃႈဢေႃႈ ”ဝႃႈၼႆ ။
ၵူၼ်းၼႂ်းပိုၼ်ႉတီႈ လၢတ်ႈၼေႁဝ်းၶႃႈဝႃႈ-“ ဝၼ်းထီႉ12/09/2021 -ဝၢႆးသေၵူတ်းထတ်းႁၼ်မႅၼ်ႈၵူၼ်း တိတ်းၸပ်းၸိူဝ်ႉမႅင်းၶူဝ်ႊဝိတ်ႉ-19 တီႈၸဝ်ႈၶၢဝ် (45) ပႃးၼၼ်ႉ သေ ယူႇတီႈၸုမ်း ၽၢႆႇယူႇလီ ဢိူင်ႇ ၼွင် မွၼ် ၵေႃႈလႆႈႁွင်ႉဢဝ်ႁဝ်း ၵူၼ်းဝၢၼ်ႈဢၼ်မီးၸိူဝ်းႁိမ်းႁွမ်း ဝၢၼ်ႈၶိူဝ်းၼိမ်းတၢင်းသဵင်ႈသေ ၶိုၼ်းလႆႈ ၵူတ်ႇထတ်းၸႅတ်ႈပၼ်ၶႃႈဢေႃႈ ၸွမ်းလူၺ်ႈမီးလွင်ႈမႆႈၸႂ်ၵူဝ်ဝႃႈ ၵူၼ်းမိူင်းၵေႃႈတေမီးလွင်ႈတိတ်းၸပ်းပႃးၼႆလႄႈ ၸင်ႇလႆႈၵူတ်ႇထတ်းဝႃႈၼႆ မိူဝ်ႈၼႆႉတီႈၸုမ်း (ဢုၵ်ႉၸု ) ၶိူဝ်းၼိမ်းႁဝ်းၶႃႈ မႃးၵူတ်ႇထတ်းတၢင်းပဵၼ် မီးယူႇ(185) ၵေႃႉၶႃႈ ၼႂ်းပၢၵ်ႇပႅတ်ႇသိပ်းႁႃႈၵေႃႉၼႆႉတႄႉ ဢမ်ႇမီးလွင်ႈတိတ်းၸပ်းသေၵေႃႉ ၼင်ႇၵဝ်ႇၶႃႈ ဝႃႈၼႆ ။
တီႈၼႂ်းဝၢၼ်ႈၶိူဝ်းၼိမ်း ႁဝ်းၶႃႈတႄႉႁဝ်းၶႃႈႁေႉႁၢမ်ၵၼ်ဝႆႉယဝ်ႉဢေႃႈ၊ ႁဝ်းၶႃႈၶဝ် လႆႈပိၵ်ႉဢိုတ်းဝႆႉ လွင်ႈၵႂႃႇမႃးပႆ ၸဵမ်မိူဝ်ႈတၢင်းပဵၼ်ၶူဝ်ႊဝိသ်ႉ-19 ၶိုၼ်းၽႄႈလၢမ်းမႃးႁၢဝ်ႈႁႅင်းၼႆႉယူႇၶႃႈ ၊ ႁဝ်းၶႃႈလႆႈ တမ်းဝၢင်း ၶၢဝ်းယၢမ်းပၼ်ၵႂႃႇမႃး ယၢမ်းၵၢင်ၼႂ်(06:00 တေႃႇ 06:30)ၵၢင်ၶမ်ႈ ၵူၺ်းဢေႃႈ ၵဵဝ်ႇလူၺ်ႈလွင်ႈပိၵ်ႉဢိုတ်းၼႆႉတႄႉ တေႁိုင်ၵႃႈႁိုဝ်တေႉဢမ်ႇပႆလႆႈႁူႉၶႃႈၼႆ” ၵူၼ်းၼႂ်းပိုၼ်ႉတီႈ သိုပ်ႇလၢတ်ႈၼႄထႅင်ႈၼင်ၼႆ။
