SSPP/SSA 29.09.2021

မိူဝ်ႈဝၼ်းထီႉ 27 ဝၼ်းလိူၼ် September 2021 ၼၼ်ႉ ၵူၼ်းဝၢၼ်ႈၼွင်တဝ်း၊ ဢိူင်ႇႁၢမ်းငၢႆး၊ ၸေႈဝဵင်းမိူင်းၵိုင် ၽႃႇၺႃးမၢၵ်ႇ ဢၼ်သိုၵ်း RCSS ၶဝ်ႁၢင်ႈဝႆႉ ၼႂ်းသူၼ်ၶဝ်ႈၵၢပ်ႇ။

ၵူၼ်းဝၢၼ်ႈၼွင်တဝ်း သၢမ်ၵေႃႉ မိူဝ်ႈၽွင်းၵႂႃႇသူၼ်ၶဝ်ႈၵၢပ်ႇ ၵႂႃႇၽႃႇၺႃးမၢၵ်ႇဢၼ် သိုၵ်း RCSS ၶဝ်ႁၢင်ႈဝႆႉၼၼ်ႉသေ လႆႈမီးလွင်ႈမၢတ်ႇၸဵပ်း 3 ၵေႃႉ တႃႇၼိုင်ႈၵေႃႉ မၢတ်ႇၸဵပ်းတီႈၶႃ ႁၢဝ်ႉႁႅင်း တႃႇ 2 ၵေႃႉတႄႉ ဢမ်ႇပေႃးတိူဝ်ႉၺႃးႁႅင်းၵႃႈႁိုဝ် ဝႃႈၼႆ ။

ၵူၼ်းၵေႃႉဢၼ်တိူဝ်ႉမၢတ်ႇၸဵပ်းႁၢဝ်ႈႁႅင်းၼၼ်ႉ  ၸိုဝ်ႈႁွင်ႉ လုင်းမွင်ႇ ဢႃႇယူႉ 68 ပီႊ ယူႇဝၢၼ်ႈၼွင်တဝ်း ဢိူင်ႇႁၢမ်းငၢႆး တိူဝ်ႉၺႃး တီႈတိၼ်တင်းသွင်ၶွၼ်သေ ယူႇတီႈ ၸုမ်းၽၢႆႇပၢႆးယူႇလီ မေႃယႃၽၢႆႇသိုၵ်း SSPP/SSA ၶဝ် ၸွႆႈယူတ်းယႃပၼ်ႁႂ်ႈလိူတ်ႈထၢတ်ႇသေ သူင်ႇပၼ်တီႈႁူင်းယႃငဝ်ႈငုၼ်းဝႆႉယူႇ ။ တႃႇသွင်ၵေႃႉတႄႉ ၵေႃႉၼိုင်ႈသမ်ႉတိူဝ်ႉ ၺႃးတီႈပုမ်၊ တီႈၶႅၼ် သေ ထႅင်ႈၵေႃႉၼိုင်ႈသမ်ႉ တိူဝ်ႉၺႃး တီႈၶႃလူင် ၼႆႉတႄႉ မေႃယႃ SSPP/SSA ၸွႆႈယူတ်းယႃပၼ်သေ ယူႇဝႆႉၶိုၼ်းတီႈဝၢၼ်ႈၵူၺ်း ဝႃႈၼႆ။

ၵူၼ်းၵေႃႉဢၼ်ၺႃးၸၢၵ်ႇမၢၵ်ႇၼၼ်ႉ လၢတ်ႈဝႃႈ“ ၸႂ်ႈၶႃႈဢေႃႈ ၵူၼ်းၽႃႇၺႃးတႄႉ ပဵၼ်လုင်းမွင်ႇ ႁဝ်းၶႃႈဢေႃႈ၊ ၺႃးမိူဝ်ႈႁဝ်းတိုၵ်ႉဢၢင်ႇၵႂႃႇၵၢၼ်ႉၶဝ်ႈၵၢပ်ႇယူႇၶႃႈ၊ ၼႂ်းသူၼ်ၼႆႉ မိူဝ်ႈဢွၼ်တၢင်း သိုၵ်း RCSS ၶဝ်ယၢမ်ႈယူႇဝႆႉ လႄႈ  ၵႆႉၽႅတ်ႈၵႂႃႇၽႅတ်ႈမႃးဝႆႉၶႃႈ ၊ မိူဝ်ႈလဵဝ် တီႈသူၼ်ၸိူဝ်းၼႆႉ ယွၼ်ႉဢမ်ႇႁၼ်ၶဝ် ယဝ်ႉ လႄႈ  ႁဝ်းၶႃႈၵေႃႈဢၢင်ႈၵႂႃႇၵၢၼ်ႉၶဝ်ႈၵၢပ်ႇ ဢမ်ႇထၢင်ႇဝႃႈ ၶဝ်တေႁၢင်ႈမၢၵ်ႇဝႆႉ ႁဝ်းၶႃႈၵႂႃႇသူၼ် ၵႂႃႇၽႃႇၺႃးဢေႃႈ ၊ ပေႃးပဵၼ်ၼႆတႄႉ တႃႇတေၵႂႃႇၵၢၼ်ႉထႅင်ႈၵေႃႈ ဢမ်ႇႁတ်းၶႃႈယဝ်ႈ” ဝႃႈဝႆႉၼင်ႇၼႆၶႃႈ။

ဢွင်ႈတီႈၸိူဝ်းၼႆႉ မိူဝ်ႈဢွၼ်တၢင်း သိုၵ်း RCSS ၶဝ်ယၢမ်ႈယူႇဝႆႉ လႄႈ ဝၢႆးသေ သိုၵ်းSSPP/SSA တင်းသိုၵ်း RCSS လႆႈပဵၼ်ပၢင်တိုၵ်းၵၼ်ယဝ်ႉ ၽၢႆႇသိုၵ်း RCSS သုတ်ႉထွႆပၼ်ယဝ်ႉ သမ်ႉႁၢင်ႈၵၢင်မၢၵ်ႇဝႆႉ တီႈၼႂ်းသူၼ် ၵူၼ်းမိူင်းဝႆႉ လႄႈ ၵူၼ်းဝၢၼ်ႈၶဝ်ၵေႃႈ လႆႈၵူဝ်ႁေ ဢမ်ႇႁတ်းၵႂႃႇသူၼ်ၵႂႃႇႁႆႈ ၶၢဝ်းၼႆႉ ပဵၼ်ၶၢဝ်းဢၼ် လူဝ်ႇဢဝ်ၶဝ်ႈၵၢပ်ႇၵေႃႈ ပိူင်ၼိုင်ႈသေ ၵူၼ်းဝၢၼ်ႈ  ၵူဝ်ၵႂႃႇၽႃႇၺႃး မၢၵ်ႇဢၼ်ႁၢင်ႈၵၢင်ဝႆႉ ၸိူဝ်းၼၼ်ႉ ဝႃႈၼႆ ။

Source : Local