သိုၵ်း TNLA ယိုဝ်းတၢႆဝူဝ်းၵူၼ်းမိူင်းယဝ်ႉ တဵၵ်းၸႂ်ႉႁႂ်ႈ ၵူၼ်းမိူင်း ၵႂႃႇဢဝ်ၼိူဝ်ႉဝူဝ်း ၵူႈႁိူၼ်း တီႈဝၢၼ်ႈႁူၺ်ႈလွတ်ႇ ဢိူင်ႇဝၢၼ်ႈၽၢႆႇၸေႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼႆၶႃႈ ။
မိူဝ်ႈဝၼ်းထီႉ 29-လိူၼ်ဢေႃးၵၢသ်ႉ -2021 ၶၢဝ်းယၢမ်း 12 :00 သိုၵ်း TNLA ဢၼ် တႃႉဢၢႆႈဢွင်ႇ ဢွၼ်ႁူဝ် ႁႅင်းၵူၼ်း မွၵ်ႈ 35 ၵေႃႉ ပၵ်းသဝ်း ဝႆႉတီႈဝၢၼ်ႈလွႆတုင်းၶမ်း ၼၼ်ႉ ပွႆႇၵူၼ်းလူင်းမႃးၸူး ဝၢၼ်ႈႁူၺ်ႈလွတ်ႇ မႃးယိုဝ်းၵိၼ်ဝူဝ်းၵူၼ်းမိူင်း ဝၢၼ်ႈႁူၺ်ႈလွတ်ႈ တူဝ်ၼိုင်ႈ တီႈႁိမ်းၽၢႆႇဢွၵ်ႇ ဝၢၼ်ႈ ယၢၼ်ၵႆဝၢၼ်ႈ မွၵ်ႈ 1 လၵ်း ၊ ဝၢႆးသေ ယိုဝ်းဝူဝ်းတၢႆယဝ်ႉၵေႃႈ ၶိုၼ်းၸႂ်ႉႁႂ်ႈ ၵူၼ်းဝၢၼ်ႈ လုၵ်းၽၵ်းႁႃႈ ၵႂႃႇဢဝ်ၼိူဝ်ႉမၼ်းၵူႈႁိူၼ်း ၵူၼ်းဝၢၼ်ႈၵမ်ႈၽွင်ႈ ဢမ်ႇၶႂ်ႈၵႂႃႇဢဝ်ပေႃးႁႆႈၵေႃႈမီး ယွၼ်ႉမီးၸႂ်ဢီးလူၵူၼ်းၵေႃႉ ဢၼ်လႆႈၶၢမ်ႇသုမ်းဝူဝ်းၼၼ်ႉ ၼႆၶႃႈ ။
ၸိုဝ်ႈၸဝ်ႈဝူဝ်း ဢၼ်ၶၢမ်ႇတၢင်းသိုၵ်း TNLA ယိုဝ်းၵိၼ်ၵႂႃႇၼႆႉ လုင်းဝီႉလိင်ႇ + ဢေးၼွႆႇ ဝၢၼ်ႈလုၵ်းၽၵ်းဝႃႈ ဢိူင်ႇဝၢၼ်ႈၽၢႆႇ ၸေႈဝဵင်းသီႇပေႃႉ ၊ ၼမ်ႉၼၵ်းၼိူဝ်ႉဝူဝ်း မီးမွၵ်ႈ 35 ၸွႆႉ ၼႆၶႃႈ ။
ၵဵဝ်ႇလူၺ်ႈ လွင်ႈယိုဝ်းၵိၼ်ဝူဝ်းၵူၼ်းမိူင်းၼႆႉသေ ယူႇတီႈ ၵေႃႉပဵၼ်ၸဝ်ႈဝူဝ်းတႄႉ ဢမ်ႇလႆႈႁပ်ႉ ၶိုၼ်း လွင်ႈၵႃႈသၢႆႈတႅၼ်းသင် တႃႇတေသၢႆႈတႅၼ်း ၶိုၼ်းၼၼ်ႉၵေႃႈ ဢမ်ႇႁၼ်ၶဝ်လၢတ်ႈသင် ၵူၼ်းဝၢၼ်ႈၵေႃႈ ဢမ်ႇႁတ်းၵႂႃႇယွၼ်း ၵႃႈသၢႆႈတႅၼ်းသင် တီႈၸုမ်းၶဝ် ဝႃႈၼႆ ။
ၵူၼ်းဝၢၼ်ႈ လၢတ်ႈၼႄႁဝ်းၶႃႈဝႃႈ “ သိုၵ်း TNLA ၶဝ်မႃးယိုဝ်း ဝူဝ်းႁဝ်းၶႃႈ ၽၢႆႇဢွၵ်ႇဝၢၼ်ႈ ႁူၺ်ႈလွတ်ႇ တီႈႁူၺ်ႈပႃႇႁဵဝ်ႈၵူၼ်းလွႆ ၼၼ်ႉ ယၢၼ်ၵႆၵၢၼ်တၢင်းဝၢၼ်ႈ ႁူၺ်ႈလွတ်ႇ မွၵ်ႈ 1 လၵ်း ဝၢႆးသေၶဝ်ယိုဝ်းတၢႆယဝ်ႉ ၸႂ်ႉႁႂ်ႈၵူၼ်းဝၢၼ်ႈ လုၵ်းၽၵ်းႁႃႈ ၵႂႃႇဢဝ်ၼိူဝ်ႉဝူဝ်းၼၼ်ႉ ၵူႈႁိူၼ်း ဢမ်ႇၵႂႃႇဢမ်ႇလႆႈၼႆ တဵၵ်းတဵင်ၼင်ႇၼႆၶႃႈ ” ဝႃႈၼႆ ။
ပူၼ်ႉမႃး မိူဝ်ႈဝၼ်းထီႉ -25 လိူၼ်ဢေႃးၵၢသ်ႉ -2021 ၼၼ်ႉၵေႃႈ ယူႇတီႈ သိုၵ်း TNLA ႁႅင်းၵူၼ်း 2 ၵေႃႉ ဢိင်ဢၢင်ႈဝႃႈ လူင်းၵူတ်ႇထတ်း ယႃႈမဝ်းၵမ်ၼႆသေ ၵႂႃႇတီႉၺွပ်း ပေႃႉထုပ်ႉ ၵူၼ်းမိူင်း ဝၢၼ်ႈၼမ်ႉပႃတိုင် ဢိူင်ႇၵုင်းဝႅတ်ႈ ၊ ၵူၼ်းဝၢၼ်ႈ ၵမ်ႈၽွင်ႈၵေႃႈ လႆႈဢဝ်ငိုၼ်းပၼ် တီႈသိုၵ်း TNLA ၶဝ် ၼပ်ႉႁူဝ်သႅၼ်မၼ်း ၸိူဝ်းၼႆႉၵေႃႈမီးမႃး ၼႆၶႃႈ ၊ လိူဝ်သေၼၼ်ႉ တဵၵ်းတဵင်ၸႂ်ႉႁႂ်ႈ ၽူႈမၢႆဝၢၼ်ႈ ၵဵပ်းသိုၵ်းမႂ်ႇပၼ် တႃႇ 8 ၵေႃႉၸိူဝ်းၼႆႉ ပေႃးဢမ်ပၼ် ဢမ်ႇလႆႈၼႆ ႁဵတ်းႁႂ်ႈ ၵူၼ်းဝၢၼ်ႈ ၵူဝ်ႁေဝႆႉယူႇ ဝႃႈၼႆ ။
