သိုၵ်း RCSS ၶၢၼ်းၵဵပ်းငိုၼ်း တီႈၵူၼ်းဝၢၼ်ႈ ၵူၼ်းမိူင်း ၼႂ်းဢိူင်ႇၵုၼ်ႁႅၼ် ၸေႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၵူၼ်းမိူင်းဢွၼ်ၵၼ်ၶၢင်းလွင်ႈယၢပ်ႇၽိုတ်ႇ ၵွပ်ႈပဵၼ်ၶၢဝ်းႁဵတ်းၵၢၼ်ႁႃငိုၼ်းယၢပ်ႇ ဝႃႈၼႆ ။
မိူဝ်ႈဝၼ်းထီႉ 14 September 2021 ၼၼ်ႉ သိုၵ်း RCSS ၸီႉသင်ႇ ပူႇႁဵင် ပူႇၵၢင်ႉၼႃႈဝၢၼ်ႈ ႁႂ်ႈၵဵပ်းပၼ် ငိုၼ်းတႃႇ (30) သႅၼ် တီႈၼႂ်းဢိူင်ႇၵုၼ်ႁႅၼ် ၸေႈဝဵင်းၵျွၵ်ႉမႄး လၢတ်ႈဝႃႈ ပိူဝ်ႈတႃႇတေသိုဝ်ႉ ၶဝ်ႈသိုဝ်ႉၽၵ်းၵိၼ် ဝႃႈၼႆ ။
ၸွမ်းၼင်ႇသဵၼ်ႈမၢႆဝၢၼ်ႈၵူၼ်း ၼႂ်းဢိူင်ႇၵုၼ်ႁႅၼ် ဢၼ်ထုၵ်ႇသိုၵ်း RCSS ယွၼ်းငိုၼ်းတႃႇတေသိုဝ်ႉ ၶဝ်ႈၽၵ်းၼၼ်ႉ ဝၢၼ်ႈၵုၼ်ႁႅၼ် ၊ ဝၢၼ်ႈၵုင်းၺွင်ႇ ၊ ဝၢၼ်ႈထမ်ႈ ဝၢၼ်ႈတၢင်းဢွၵ်ႇ ၊ ဝၢၼ်ႈၼမ်ႉၵိၼ်လီ ၊ ဝၢၼ်ႈပဵင်းထွၼ်ႇ ၊ ဝၢၼ်ႈႁၢင်ၼွင် ၊ ဝၢၼ်ႈတေႃလိူဝ် ၸိူဝ်းၼႆႉ ယူႇတီႈသိုၵ်း RCSS မၵ်းတတ်းၶၢဝ်းယၢမ်းပၼ် ၵူၼ်းဝၢၼ်ႈ ၶၢဝ်းတၢင်းသၢမ်ဝၼ်း ႁႂ်ႈၵဵပ်းယဝ်ႉတူဝ်ႈသူင်ႇပၼ် တပ်ႉသိုၵ်းၶဝ်ဝႃႈၼႆ ။
ၵူၼ်းပိုၼ်ႉတီႈတႄႉ လၢတ်ႈဝႃႈ – သိုၵ်း RCSS ၶဝ်ယွၼ်းမႃး ငိုၼ်းၼႂ်းဢိူင်ႇၵုၼ်ႁႅၼ်ႁဝ်းၼႆႉ တင်းမူတ်း တႃႇ 30 သႅၼ်ၶႃႈဝႃႇ သူပ်းၶဝ်လၢတ်ႈတႄႉ ပဵၼ်တႃႇသိုဝ်ႉၵိၼ်ၶဝ်ႈ ၵိၼ်ၽၵ်းၼႆၶႃႈဢေႃႈ ၵူၼ်းဝၢၼ်ႈႁဝ်းၶႃႈၵေႃႈ ဢွၼ်ၵၼ်ၶၢင်းဢေႃႈ ၵွပ်ႈပိူဝ်ႈၶၢဝ်းယၢမ်းမိူဝ်ႈလဵဝ်ၼႆႉ ၵႂႃႇလႂ်ၵေႃႈဢမ်ႇလႆႈ ႁႃႈငိုၼ်းၵေႃႈယၢပ်ႇ ၵူၺ်းၵႃႈႁဝ်းၶႃႈၵူၼ်းဝၢၼ်ႈတႄႉ ဢမ်ႇလိူဝ်လႆႈၶႃႈလႂ် တၢင်းလႂ်ယွၼ်းမႃးၵေႃႈ ၵႃႈလႆႈသႂ်ႇပၼ်ယဝ်ႉၶႃႈၼေႃႈ ဢမ်ႇမီးၵေႃႈၵႃႈလႆႈႁႃပၼ်ၶဝ်ယဝ်ႉဢေႃႈ” ဝႃႈၼႆ ။
