သိုၵ်းRcss ယိုဝ်းၵႃးၵူၼ်းမိူင်း ႁူဝ်ၼႃႈဝၢၼ်ႈႁူးၵွတ်ႈ တိူဝ်ႉမၢတ်ႇၸဵပ်းႁၢဝ်ႈႁႅင်း ၼႂ်းၸေႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ
မိူဝ်ႈဝၼ်းထီႉ 16 လိူၼ် September 2021 ယၢမ်း 4:30 တၢမ်းၶမ်ႈၼၼ်ႉ ယူႇတီႈၸုမ်းသိုၵ်း Rcss ယိုဝ်းၵႃးၵူၼ်းမိူင်း ဢၼ်ပဵၼ်ႁူဝ်ၼႃႈဝၢၼ်ႈႁူးၵွတ်ႈ ဢိူင်ႇႁူးသူၼ် ၽွင်းတိုၵ်ႉၵႂႃႇသူင်ႇၵူၼ်းပဵၼ် တီႈႁူင်းယႃ ၶိုၼ်းပွၵ်ႈမႃး တီႈဝၢၼ်ႈၶိုၼ်း မိူဝ်ႈၽွင်းၸမ်တေၽႅဝ်ဝၢၼ်ႈၼၼ်ႉ ထုၵ်ႇသိုၵ်း Rcss ယိုဝ်းသႂ်ႇၵႃး ၸိုဝ်ႈႁွင်ႉ လုင်းၵျေႃႇယဵၼ်ႇ ဢႃႇယူႉ 47 ပီႊ ပဵၼ်ႁူဝ်ၼႃႈ ဝၢၼ်ႈႁူးၵွတ်ႈ ၸၢႆးတဵင်းၸေႃႇ ပဵၼ်ၵူၼ်းႁေႃႈၵႃးၸုမ်းၸွႆႈထႅမ် ပရႁိတ ယူႇဝၢၼ်ႈႁူးၵွတ်ႈၼင်ႇၵၼ်တင်းသွင်ၵေႃႉ လႆႈတၢင်းမၢတ်ႇၸဵပ်း ႁၢဝ်ႈႁႅင်း သူင်ႇတီႈႁူင်းယႃ ဝဵင်းၵျွၵ်ႉမႄးဝႆႉယူႇ ဝႃႈၼႆ ။
လုင်းၵျေႃႇယဵၼ်ႇ တင်း ၸၢႆးတဵင်းၸေႃႇၼႆႉ ၶႃသွင်ၵေႃႉၼႆႉ လႆႈၵႂႃႇသူင်ႇၵူၼ်းဝၢၼ်ႈႁူးၵွတ်ႈ ဢၼ်ယဵပ်ႇၺႃးမၢၵ်ႇ သိုၵ်း Rcss ႁၢင်ႈၵၢင်ဝႆႉ တီႈႁူင်းယႃဝဵင်းၵျွၵ်ႉမႄးသေ ဝၢႆးပွၵ်ႈၶိုၼ်းႁိူၼ်းၸမ်တေၽႅဝ်ဝၢၼ်ႈ တီႈႁိမ်းပႃႇႁဵဝ်ႈ ၽၢႆႇတူၵ်းဝၢၼ်ႈႁူးၵွတ်ႈၼၼ်ႉ ထုၵ်ႇၸုမ်းသိုၵ်း Rcss ယိုဝ်းသႂ်ႇၵႃး ၶႃသွင်ၵေႃႉ လႄႈ လုင်းၵျေႃႇယဵၼ်ႇ တိူဝ်ႉၺႃးၵႂႃႇတီႈ ပွင်ႇၶႃလူင်မၼ်း ဢဝ်လုပ်ႇမၼ်းႁၢၵ်းၵႂႃႇ ယၢမ်းလဵဝ်းၸိူဝ်းပဵၼ် ပီႈၼွင်ႉမၼ်း လႆႈဢွၼ်ၵၼ်ဢဝ်သူင်ႇၵႂႃႇႁူင်းယႃ ဝဵင်းၵျွၵ်ႉမႄးဝႆႉယူႇ ၸၢႆးတဵင်းၸေႃႇ တႄႉဢမ်ႇတိူဝ်ႉၺႃး ဝႃႈၼႆ ။
ၵူၼ်းဢၼ်ၵႂႃႇၸွႆႈထႅမ်ၸွမ်းၵေႃႉၼိုင်ႈ လၢတ်ႈၼႄႁဝ်းၶႃႈဝႃႈ – ” ၸႂ်ႈၶႃႈဢေႃႈ ၶႃသွင်ၵေႃႉၼႆႉပဵၼ်ၵူၼ်းဝၢၼ်ႈႁူးၵွတ်ႈၵူၺ်းၶႃႈ ၶႃသွင်ၵေႃႉ ၵႂႃႇသူင်ႇၵူၼ်းမၢတ်ႇၸဵပ်း ဢၼ်ၵႂႃႇယဵပ်ႇၺႃးမၢၵ်ႇသိုၵ်း Rcss ႁၢင်ႈၵၢင်ဝႆႉႁိမ်းဝၢၼ်ႈႁဝ်းၶႃႈၸိူဝ်းၼႆႉ သေ ၶိုၼ်းပွၵ်ႈမႃးတီႈဝၢၼ်ႈၶိုၼ်း မိူဝ်ႈတေထိုင်ဝၢၼ်ႈ ၶဝ်သမ်ႉတင်ႈၸႂ်ပႂ်ႉယိုဝ်းတီႈႁိမ်းပႃႇႁဵဝ်း ၽၢႆႇတူၵ်းဝၢၼ်ႈႁဝ်းၼၼ်ႉဢေႃႈ ” ဝႃႈၼႆ ။
“မိူဝ်ႈၶႃသွင်ၵေႃႉ ၵႂႃႇသူင်ႇၵူၼ်းယဵပ်ႇၺႃးမၢၵ်ႇတီႈႁူင်းယႃၵျွၵ်ႉမႄးယဝ်ႉ ၶိုၼ်းပွၵ်ႈမႃးၼၼ်ႉ ၶႃသွင်ၵေႃႉ ၵေႃႈပွင်ႇၶၢဝ်ႇထိုင်ၸူး တီႈၽူႈမီးပုၼ်ႈၽွၼ်း ၽၢႆႇသိုၵ်း Rcss ၶဝ်ယူႇ ၵူၺ်းၵႃႈ ၽိူဝ်ႇၽႅဝ်မႃးတီႈၼၼ်ႈ ႁဵတ်းသင်ၶဝ်ယိုဝ်းၵေႃႈဢမ်ႇႁူႉ တေဝႃႈဢမ်ႇႁူႉၵေႃႈ ႁဝ်းပေႃးပွင်ႇပၼ်ၶဝ်ယူႇဝႃႈတေမႃးၶိုၼ်းႁိူၼ်းၼႆ ” ပီႈၼွင်ႉၸမ်ၸႂ် လုင်းၵျေႃႇယဵၼ်ႇ လၢတ်ႈၼႄထႅင်ႈၼင်ႇၼႆ ။
တီႈဝၢၼ်ႈႁူးၵွတ်ႈ တင်းဝၢၼ်ႈႁူးသူၼ် ဢိူင်ႇႁူးသူၼ်ၼႆႉမိူဝ်ႈႁၢင်ႈလိူၼ် ဢေႃးၵၢသ်ႉၼၼ်ႉ ယူႇတီႈၸုမ်းသိုၵ်း Rcss ႁွင်ႉႁဵတ်းပၢင်ၵုမ် ၵူၼ်းမိူင်းသေ လၢတ်ႈဝႃႈႁၢမ်ႈၵူၼ်းဝၢၼ်ႈၵူၼ်းသူၼ် တေဢမ်ႇလႆႈၶဝ်ႈဢွၵ်ႇၵႂႃႇမႃး ၼွၵ်ႈဝၢၼ်ႈ ပေႃး ပေႃးတေၵႂႃႇလႂ် တေလႆႈပွင်ႇၶၢဝ်ႇပၼ် တီႈၽူႈမီးပုၼ်ႈၽွၼ်းၶဝ် ၼႆသေ ဢဝ်သိုၵ်းပႂ်ႉတၢင်းၶဝ်ႈ တၢင်းဢွၵ်ႇဝၢၼ်ႈဝႆႉ ႁဵတ်းႁႂ်ႈၵူၼ်းမိူင်းပိုၼ်ႉတီႈ ဢမ်ႇမီးသုၼ်ႇထၢင်ႇႁၢင်ႈ ၵႂႃႇမႃးလွတ်ႈလႅဝ်း လႄႈ ၵူၼ်းမိူင်းဢွၼ်ၵၼ်မီးလွင်ႈယၢပ်ႇ ယွၼ်ႉဢမ်ႇၸၢင်ႈၵႂႃႇႁဵတ်းၵၢၼ်ႁႃၵိၼ်လဵင်ႉတွင်ႉဝႃႈၼႆ ။
ယၢမ်းလဵဝ်ပိုၼ်ႉတီႈ ဝၢၼ်ႈႁူးၵွတ်ႈ ဝၢၼ်ႈႁူးသူၼ် ၸိူဝ်းၼႆႉ မီးၸုမ်းသိုၵ်း Rcss ၸုမ်းလဵဝ်ၵူၺ်း ဢၼ်ယူႇဝႆႉသေ ၵုမ်းထိင်းဢဝ်ၼႃႈတီႈပိုၼ်ႉတီႈ ၸိူဝ်းၼႆႉ ဝႆႉယူႇ ။
