မီးၶၢဝ်ႇဢွၵ်ႇမႃးဝႃႈ ၶႄႇလႄႈ ဢမေႇရိၵၢၼ်ႇ ဢမ်ႇပၼ် ၽူႈတၢင်တူဝ်ၶွင်ႇသီႇသိုၵ်းမၢၼ်ႈ မွၵ်ႇလၢတ်ႈၶေႃႈၵႂၢမ်း ၼႂ်းပၢင်ၵုမ်လူင် ၵူႈလွင်ႈလွင်ႈ ၸၢတ်ႈၸိုင်ႈလုမ်ႈၾႃႉၼႆ သွင်ၽၢႆႇၽွမ်ႉၸႂ်ၵၼ် ဝႆႉယဝ်ႉဝႃႈၼႆ ။

တႃႇတေႁၢမ်ႈတၢပ်ႈ ၶွင်ႇသီႇသိုၵ်းမၢၼ်ႈ ၼႂ်းပၢင်ၵုမ်လူင် ၵူႈလွင်ႈလွင်ႈ ၸၢတ်ႈၸိုင်ႈလုမ်ႈၾႃႉၼၼ်ႉ ယူႇတီႈ မိူင်းဢႅၼ်ႁႅင်းယႂ်ႇၼႂ်းၵမ်ႇၾႃႇ သွင်မိူင်း ဢဝ်ၶၢဝ်းယၢမ်းသေ ဢုပ်ႇဢူဝ်းၵၼ်ယူႇၼႆႉ ၽိုၼ်လိၵ်ႈ ၽေႃးရဵၼ်းပေႃႇလၸီႇ FP ဢၼ်ပၵ်းတမ်းဝႆႉ တီႈမိူင်းဢမေႇရိၵၢၼ်ႇ တႅမ်ႈဢွၵ်ႇဝႆႉၼင်ႇၼႆ ။

ၼႂ်းၶေႃႈဢုပ်ႇဢူဝ်း ဢမေႇရိၵၢၼ်ႇ လႄႈ ၶႄႇ ၶဝ်လႆႈၸႂ်ဝႆႉဝႃႈ ယူႇတီႈၽူႈတၢင်တူဝ် ဢူးၵျေႃႇမူဝ်းထုၼ်း တေဢမ်ႇလႆႈမီးသုၼ်ႇလၢတ်ႈၶေႃႈၵႂၢမ်း ၼႂ်းပၢင်ၵုမ်ၼႆႉပႃးဝႆႉယူႇၵူၺ်းၵႃႈ ယူႇတီႈ ၸုမ်းၶၢဝ်ႇ BBC တိုၵ်ႉၶတ်းၸႂ် ႁႂ်ႈလႆႈၶေႃႈမၵ်းမၼ်ႈၵႂႃႇယူႇဝႃႈၼႆ။

ၵဵဝ်ႇလူၺ်ႈၶေႃႈလႆႈၸႂ် ၶႄႇတင်း ဢမေႇရိၵၢၼ်ႇ တူၵ်းလူင်းၵၼ်ၼႆႉ ယူႇတီႈ လုမ်းၸၢတ်ႈၸိုင်ႈလုမ်ႈၾႃႉ၊ EU ၊ ဢႃႇသီႇယၢၼ်ႇ ၊ ရႃႉသျႃး ၸိူဝ်းၼႆႉ ဢွၼ်ၵၼ်ၽွမ်ႉလႆႈၸႂ်ယွမ်းႁပ်ႉယူႇၼႆ  FP လၢတ်ႈၵႂႃႇၼင်ႇၼႆ ။

တႃႇတေမၵ်းမၼ်ႈ ၶွင်ႇသီႇသိုၵ်းမၢၼ်ႈ ႁႂ်ႈပဵၼ်လူင်ပွင်ၸိုင်ႈ တြႃးဝၢင်ႇၼႆႉ တီႈဢႄႇသုတ်း တေလႆႈပႂ်ႉတေႃႇထိုင် လိူၼ် ၼူဝ်ႊဝုၼ်ႊပိူဝ်ႊၵွၼ်ႇဝႃႈၼႆ ။

ၶႂ်ႈဝႃႈၼႆႉ တေပႂ်ႉတူၺ်း လွင်ႈၼမ်ႉၵတ်ႉ ၵေႃႇမတီႇၶွင်ႇသီႇသိုၵ်းမၢၼ်ႈ  လွင်ႈၵမ်ႉထႅမ်ဢွၵ်ႇမႃး  ပိူင်လူင်မၼ်း ၸုမ်းဢၼ်ၶွင်ႇသီႇသိုၵ်းမၢၼ်ႈယုၵ်ႉဢၢပ်ႈၼႃႈၶိုၼ်ႈၸွင်ႇယွမ်းႁပ်ႉလႆႈ ၸဵမ်ၸိူဝ်းၼႆႉ ။

ၼမ်ႉၵတ်ႉဢၼ်တၢင်တူဝ်လႆႈ ၵေႃႇမတီႇသိုၵ်း မိူင်းလႂ် တေပႃးမႃးၼၼ်ႉ မုင်းမွင်းဝႃႈပေႃးဝၼ်းထီႉ 14 ဝၼ်းၼႆႉ တေပိုၼ်ၽၢဝ်ႇဢွၵ်ႇမႃးယူႇ ။

ၶေႃႈႁၢၵ်ႈငဝ်ႈၶၢဝ်ႇ ၸၢတ်ႈၸိုင်ႈလူင်ႈၾႃႉလၢတ်ႈဝႃႈ ၵေႃႇမတီႇဢုၵ်ႉၵထ သျွီၼ်ႇတိၼ်ႇ၊ ဢၼ်ယၢမ်ႈၶၢဝ်ပႃးၵေႃႈတေမီး မိူင်းၶေႇ၊ ရုသျႃး၊ ဢမေႇရိၵၢၼ်ႇ လိူဝ်ထႅင်ႈႁႃႈမိူင်းတႄႉ ပႃႇႁႃးမႃး၊ ၶီႇလီႇ၊ ပူႇတၢၼ်ႇ၊ သီႇယႃႇရလီႇယုၼ်း၊ ပဵၼ်မိူင်းဢႃႇၽရိၵ ပွတ်းၸၢၼ်း ဝႃႈၼႆ။  

Source News. DBV