ၶွမ်ႊပၼ်ႇၼီႇ ငူၺ်ႇယီႇပလႄး ဢွၵ်ႇတိုၼ်းလၢင်း တင်ႈၸၢၵ်ႈ ဢၼ်ထူၵ်းဢွၵ်ႇ ဢွၵ်ႇသီႇၵျိၼ်ႇ ပၼ်ၵူၼ်းမိူင်း ၼႂ်းပိုၼ်ႉတီႈမိူင်းယႆ ၸိုင်ႈတႆးပွတ်းႁွင်ႇ ၼႃႈတီႈၵုမ်းၵမ်ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ။
မိူဝ်ႈဝၼ်းထီႉ 14 လိူၼ် September 2021 ယူႇတီႈၸဝ်ႈၶွင် ၶွမ်ႊပၼ်ၼီႇ ငူၺ်ႇယီႇပလႄး တင်ႈၶူင်းၵၢၼ် ၸၢၵ်ႈထူၵ်ႈဢွၵ်ႇ ဢွၵ်ႇသီႇၵျိၼ်ႇ Oxygen ဢၼ်ပဵၼ်ၶွင် တီႈဝၢၼ်ႈသႅၼ်တေႃ ဢိူင်ႇၶူဝ်သၢႆး ၸေႈဝဵင်းမိူင်းယႆ ပိူင်လူင်မၼ်း တႃႇၸွႆႈထႅမ် ၵူၼ်းမိူင်း ၸိူဝ်းဢၼ်လူဝ်ႇ Oxygen ၸိူဝ်းၼၼ်ႉၵႂႃႇ ၊ ပေႃးပဵၼ်ႁူင်းယႃၵူၼ်းမိူင်း တေလူႇပၼ်လၢႆလၢႆ ဢမ်ႇဢဝ်ၵႃႈမၼ်း သင်ၸိူဝ်ႉပဵၼ်ႁူင်းယႃသုၼ်ႇတူဝ်သေ ပိုတ်ႇဝႆႉၸိုင် တေယွမ်း ၵႃႈမၼ်း သေၶၢႆပၼ်ၵႂႃႇ တႃႇႁႂ်ႈပေႃးၸၢင်ႈၸွႆႈထႅမ်ၵူၼ်းမိူင်းၵႂႃႇ ဝႃႈၼႆ ။
ၸၢၵ်ႈဢၼ်ထူၵ်းဢွၵ်ႇလူမ်း Oxygen ဢၼ်တမ်းဝႆႉ တီႈႁူင်းၸၢၵ်ႈၵိူဝ်ဝၢၼ် သႅၼ်တေႃၼၼ်ႉ ၼိုင်ႈၸူဝ်ႈမူင်း ထူၵ်းဢွၵ်ႇသီႇၵျိၼ်ႇ တႃႇတဝ်ႈလူမ်း 40 လီႇတႃႇ (10) တဝ်ႈၼႆယဝ်ႉ ။
ၵူၼ်းမိူင်းပိုၼ်ႉတီႈ မိူင်းယႆတေႉလၢတ်ႈဝႃႈ – ၸႂ်ႈၶႃႈဢေႃႈ ဢၼ်ၶွမ်ႊပၼ်ၼီႇ ႁူင်းၸၢၵ်ႈၵိူဝ်ဝၢၼ် ၶဝ်တေတင်ႈၸၢၵ်ႈထူၵ်းဢွၵ်ႇ Oxygen ၼႆတႄႉမၢၼ်ႇမႅၼ်ႈယူႇၶႃႈ တီႈၶဝ်ထူၵ်းဢွၵ်ႇၼၼ်ႉတႄႉ တႄႇထူၵ်းဢွၵ်ႇလူမ်းပၼ် မိူဝ်ႈဝႃးဝၼ်းထီႉ – 14-09-2021 ယဝ်ႉၶႃႈ ႁဝ်းၶႃႈၵူၼ်းမိူင်းၵေႃႈ ၸူမ်းတႄႉဢေႃႈ ပေႃးဝႃႈမီးၵူၼ်းၸွႆႈထႅမ်မႃးၸိူင်ႉၼႆ တႃႇတေၵႂႃႇႁႃတဝ်ႈလူမ်းၵေႃႈၼႂ်းဝဵင်းဢၼ်ဝႃႈၼႆႉ မၼ်းဢမ်ႇငၢႆႈငၢႆႈ ၶႃႈပေႃးဢဝ်ငၢဝ်းလၢႆးယၢမ်းလဵဝ်ႈဝႃႈ “ ဝႃႈၼႆ ။
ၵွၼ်းဢိူင်ႇ ၵွၼ်းၸုမ်း ဝဵင်းမိူင်းယႆၵေႃႈ လႆႈဢွၼ်ၵၼ်ၵႂႃႇလႄႇတူၺ်း ဢွင်ႈတီႈမၼ်းသေလႆႈဝႃႈ ပဵၼ်ဢၼ်ၵမ်ႉယွင်ပၼ် ၵူၼ်းၸိူဝ်းတိတ်းၸပ်း တၢင်းပဵၼ်ၵူဝ်ဝိသ်ႉ 19 လႄႈ ၵူၼ်းမိူင်း ၸိူဝ်းဢၼ် လူဝ်ႇတဝ်ႈလူမ်း Oxygen ၼၼ်ႉတႄႉတႄႉ လႄႈ ၶွပ်ႈၸႂ်ထိုင် တီႈၸဝ်ႈၶွင်ၶွမ်ႇပၼ်ၼီႇၶဝ် မႃးၸွႆႈထႅမ်ပၼ် ၵႂႃႇယူႇၶႃႈ ဝႃႈၼႆ ။
တီႈဝဵင်းမိူင်းယႆၼႆႉ ၸူဝ်ႈတၢင်းပဵၼ်ၶူဝ်ႊဝိသ်ႉ ပွၵ်ႈၵမ်း 3 မႃးၼႆႉ ၵူၼ်းတိတ်းၸပ်းၵူဝ်ႇဝိသ်ႉ 19 မီးထိုင်ၵႂႃႇ 197 ၵေႃႉ၊ ၵူၼ်းၶႅၼ်းသေလႆႈလူင်းႁူင်းယႃမီး 176 ၵေႃႉ၊ ၵူၼ်းလူႉတၢႆမီး 3 ၵေႃႉ လႄႈ ၵူၼ်းဢၼ်တိုၵ်ႉ ၶိုၼ်ႈႁူင်းယႃဝႆႉမီးယူႇ 18 ၵေႃႉ လႆႈႁူႉဝႆႉၼင်ႇၼႆ ။
