ယူႇတီႈပႃႇတီႇမႂ်ႇသုင်ၸိုင်ႈတႆး SSPP/SSA ၸွႆႈထႅမ်ငိုၼ်းတွင်းၵႃႈယူတ်းယႃ တီႈၵူၼ်းမိူင်း ဢၼ်ပၢႆႈၽေးပၢင်တိုၵ်းသေ ပဵၼ်ၽေးၵိုင်ႉၵၢင်ႉ လႆႈၶိုၼ်ႈႁူင်းယႃ ယူတ်းယႃတူဝ်ဝႆႉယူႇ ၸိူဝ်းၼၼ်ႉ ဝႃႈၼႆ ။
မိူဝ်ႈၼႆႉဝၼ်းထီႉ 23-လိူၼ်Septeber 2021 ၼၼ်ႉ ယူႇတီႈ ငဝ်ႈငုၼ်း SSPP/SSA လႆႈၸွႆႈထႅမ် ၵူၼ်းမိူင်းတႃႇ 3 ၵေႃႉ ဢၼ်ပဵၼ်ၽေးၵိုင်ႉၵၢင်ႉ ထေႃႈၵႃးပိၼ်ႈ မိူဝ်ႈၽွင်းပၢႆႈပၢင်တိုၵ်း ၼႂ်းၵႄႈ SSPP/SSA တင်း RCSS ပိုတ်းယိုဝ်းၵၼ် တီႈႁိမ်း ဝၢၼ်ႈၼွင်လႅဝ် ဢိူင်ႇႁူဝ်ၶၢႆး ၸေႈဝဵင်းမိူင်ၵိုင် ၊ ၵူၼ်းမိူင်းတူၵ်းၸႂ် ဢွၼ်ၵၼ်ပၢႆႈ လႄႈ ပဵၼ်ၽေးၵိုင်ၵၢင်ႉ ထေႃႈၵႃးပိၼ်ႈသေ ၼၢင်းယိင်း 3 ၵေႃႉ လႆႈမၢတ်ႇၸဵပ်း ၶိုၼ်ႈႁူင်းယႃ ယူတ်းယႃတူဝ် ဝႆႉယူႇ ။
မႄႈထဝ်ႈၼူႉ ဢႃႇယူႉ 86 ပီႊ ဢၼ်တိူဝ်ႉမၢတ်ႇၸဵပ်းႁႅင်းၼၼ်ႉ ၵွပ်ႈတေလႆႈၽႃႇတတ်း ၼႆလႄႈ ယူႇတီႈ ငဝ်ႈငုၼ်း SSPP/SSA လႆႈၸွႆႈထႅမ် ၵႃႈယႃႈယႃ တႃႇငိုၼ်း 20 သႅၼ်ပျႃး ၊ လိူဝ်ၼၼ်ႉ ၵူၼ်း မိူင်း ဢၼ်ယူတ်းယႃတူဝ်ဝႆႉယူႇ တီႈႁူင်းယႃမိူင်းၵိုင်ၼၼ်ႉၵေႃႈ လႆႈၸွႆႈထႅမ် ၼိုင်ႈၵေႃႉ 5 သႅၼ်ပျႃး ဝႃႈၼႆ ။
ၸဝ်ႈႁၢၼ်ၽုင်းႁၢၼ် ၽူႈၶၢၼ်ပၢၵ်ႇ လၢတ်ႈဝႃႈ – ၵွပ်ႈလႆႈႁူႉငိၼ်းဝႃႈ မႄႈထဝ်ႈမွၼ်ႇၼူႉႁဝ်းၶႃႈ ၵေႃႉဢၼ်လႆႈပဵၼ်ၽေးၵိုင်ႉၵၢင်ႉ ၽွင်းပၢႆႈၽေးပၢင်တိုၵ်းၼၼ်ႉ တိူဝ်ႉမၢတ်ႇၸဵပ်းႁႅင်း တေလႆႈ ၶဝ်ႈႁွင်ႈၽႃႇတတ်းၼႆလႄႈ ယူႇတီႈငဝ်ႈငုၼ်းႁဝ်းၶႃႈၵေႃႈ လႆႈၸွႆႈထႅမ်ငိုၼ်းတွင်း ၵႃႈယႃႈယႃ တႃႇ 20 သႅၼ် ၊ လိူဝ်ၼၼ်ႉၵေႃႈၼၢင်းယိင်းထႅင်ႈသွင်ၵေႃႉ ဢၼ်ယူတ်းယႃတူဝ်ဝႆႉ ယူႇတီႈ ႁူင်း ယႃမိူင်းၵိုင်ၼၼ်ႉ တိူဝ်ႉႁူဝ်တႅၵ်ႇ လွၵ်ႈၵူၺ်းဢိတ်းဢွတ်း လႄႈ ယူႇတီႈ ႁဝ်းၶႃႈ လႆႈၸွႆႈထႅမ် ၵႃႈယႃႈယႃ ၼိုင်ႈၵေႃႉ 5 သႅၼ်ပျႃးၵႂႃႇ ဝႃႈၼႆ ။
သိုပ်ႇလၢတ်ႈထႅင်ႈဝႃႈ ဢၼ်ၼႆႉတႄႉ မၼ်းၵေႃႈဢမ်ႇၸႂ်ႈဢီႈသင် မၼ်းပဵၼ်ပိူင်ၵၢၼ်ဢၼ်ႁဝ်း ဝူၼ်ႉတေႃႇထိုင်ၵူၼ်းမိူင်းႁဝ်း လႆႈတုၵ်ႉလႆႈယၢၵ်ႈသေ ၸွႆႈထႅမ်မႃးယူႇတႃႇသေႇၸိူဝ်းၼၼ်ႉၵူၺ်း ဢမ်ႇၸႂ်ႈဝႃႈႁဝ်းႁူႉၸၵ်းၵၼ် ပဵၼ်ပီႈၼွင်ႉၵၼ်လႄႈ ၸွႆႈဢမ်ႇၸႂ်ႈ တိုၼ်းပဵၼ်ပိူင်ႁဝ်းၶႃႈ ဢၼ် ယၢမ်ႈၸွႆႈထႅမ်ၵူၼ်းမိူင်း ၵႃႈပူၼ်ႉမႃးၵေႃႈ လွင်ႈၸွႆႈထႅမ်ၵူၼ်းမိူင်းၼႆႉ ႁဝ်းၶႃႈတိုၼ်း ႁဵတ်းသၢင်ႈ မႃးယူႇ ဝႃႈၼႆ ။
မိူဝ်ႈဝၼ်းထီႉ 20 လိူၼ် September 2021 သိုၵ်း RCSS တင်းသိုၵ်း SSPP/SSA ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၼွင်လႅဝ် ဢိူင်ႇႁူဝ်ငၢႆး လႄႈ ၵူၼ်းမိူင်းဢွၼ်ၵၼ်ပၢႆႈၽေးပၢင်တိုၵ်းသေ လႆႈပဵၼ် ၽေးၵိုင်ႉၵၢင်ႉ ထေႃႈၵႃးပိၼ်ႈတီႈ တၢင်းၽေ ႁူဝ်ၶၢႆး လႄႈ ၶူဝ်သႃးတေ ဢၼ်မီးႁိမ်း ပၢင်ႇၵေႇတူႉ ၸေႈဝဵင်းမိူင်းၵိုင် ၼၢင်းယိင်း သၢမ်ၵေႃႉ လႆႈတိူဝ်ႉမၢတ်ႇၸဵပ်း မႄႈထဝ်ႈၵေႃႉၼိုင် မၢတ်ႇၸဵပ်း ႁၢဝ်ႈႁႅင်းသေ လႆႈသူင်ႇယူတ်းယႃတူဝ် တီႈဝဵင်းလူင် တူၼ်ႈတီး ဝႃႈၼႆ ။
