မိူဝ်ႈဝၼ်းထီႉ 24.08.2021 ၵၢင်ၼႂ် 10:00 AM မွင်း ၽွင်းတပ်ႉသိုၵ်းမၢၼ်ႈ လိုဝ်ႈယူႇဝႆႉ တီႈၼႂ်းႁူင်းႁဵၼ်း ဝဵင်းမိူင်းၵူတ်ႈ ပွၵ်ႉဢွင်ႇၶျၢၼ်းတႃႇ ၼၼ်ႉ မီးၵူၼ်းၼုမ်ႇၵေႃႉၼိုင်ႈ ထုၵ်ႇသိုၵ်းမၢၼ်ႈဢဝ်ၵွင်ႈယိုဝ်း တိူဝ်ႉၺႃးတီႈတိၼ် မိူဝ်ႈၽွင်းၽႅတ်ႈၵႂႃႇၽၢႆႇၼႃႈႁူင်းႁဵၼ်းၼႆ လႆႈႁူႉတီႈ ၵူၼ်းမိူင်းပိူၼ်ႉတီႈ ၼိုင်ႈၵေႃႉ လၢတ်ႈၼႄ ဝႃႈၼႆ ။
ၵူၼ်းမိူင်း ပိူၼ်ႉတီႈၼိုင်ႈၵေႃႉ လၢတ်ႈဝႃႈ ‘’ ၽႂ်ၽႅတ်ႈၵႂႃႇ ႁိမ်းႁွမ်းတီႈၶဝ်ယူႇၼၼ်ႉၵေႃႈ ယိုဝ်းသႂ်ႇၵမ်းလဵဝ် ၊ တိူဝ်ႉၺႃးမၢၵ်ႇၵွင်ႈတီႈတိၼ်သေ လႆႈမၢတ်ႇၸဵပ်းဝႆႉ ၊ ၽၢႆႇသိုၵ်းမၢၼ်ႈ ၶဝ်ႈႁၢင်ႈႁႅၼ်းတူဝ်ႈတၼ်းဝႆႉသေ ပေႃးႁၼ်ၵူၼ်း ဢၼ်ၶဝ်မီးလွင်ႈ ထၢင်ႇထိူမ် ၽႅတ်ႈၼႃႈတီႈၶဝ်ၼႆၸိုင် ၸုမ်းၶဝ်ဢဝ်ၵွင်ႈယိုဝ်းလူင်ၵႂႃႇ ၵူႈတၢင်းယဝ်ႉ ‘’ ၼႆၶႃႈ။
ၵေႃႉဢၼ်ထုၵ်ႇၺႃးယိုဝ်းတိူဝ်ႉမၢတ်ႇၸဵပ်းၵႂႃႇၼၼ်ႉ ယၢမ်းလဵဝ် တိုၵ်ႉယူတ်းယႃဝႆႉ ယူႇဢမ်ႇလႆႈမႂ်ႈၸႂ်ႁႅင်း။ လိူဝ်ၼၼ်ႉ ၸုမ်းသိုၵ်း မၢၼ်ႈၵေႃႈၶဝ်ႈသွၵ်ႈႁႃၵူတ်ႇထတ်း ၼႂ်းပွၵ်ႉဢွင်ႇၶျၢၼ်းတႃႇ ဝႆႉယူႇ ဝႃႈၼႆ ။
မိူဝ်ႈဝၼ်းထီႉ 13.08.2021 ဝၢႆးဝၼ်းၼၼ်ႉ ယွၼ်ႉၸုမ်းသိုၵ်းမၢၼ်ႈၶဝ် ထုၵ်ႇၵူၼ်းဢမ်ႇႁူႉၸၵ်း ၼႂ်းပွၵ်ႉ ဢွင်ႇၶျၢၼ်းတႃႇ ဢဝ်မၢၵ်ႇမႃးထိုမ်ႈသႂ်ႇ ႁူင်းႁဵၼ်း ဢၼ်ၸုမ်းၶဝ်ယူႇသဝ်းဝႆႉယၢမ်းလဵဝ်ၼႆႉ ၽၢႆႇသိုၵ်းမၢၼ်ႈၶဝ် မီးလွင်ႈမၢတ်ႇၸဵပ်း လႆႈလူႉတၢႆ လႄႈ ၵွပ်ႈၼၼ် ယၢမ်းလဵဝ် ပေႃးမီးၵူၼ်း ဢၼ်ၶဝ် ထၢင်ႇထိူမ်ၽႅတ်ႈၵႂႃႇၸိုင် ၶဝ်တိုၼ်းလမ်းယိုဝ်းလူင်ၵႂႃႇၵူႈ ၽၢႆႇယဝ်ႉ ဝႃႈၼႆ။
