ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး လႆႈလူႇတၢၼ်းငိုၼ်း တႃႇတေၶိုၼ်းၵေႃႇၵုမ်း လုမ်းလႃး ဝတ်ႉၵျွင်း ဢၼ်လႆႈလူႉၵွႆၵႂႃႇ ယွၼ်ႉၸၢၵ်ႇမၢၵ်ႇၵွင်ႈ တိူဝ်ႉၺႃးၸိူဝ်းၼၼ်ႉ ။
မိူဝ်ႈဝႃးဝၼ်းထီႉ 01-07-2021 ၶၢဝ်းယၢမ်း 09 : 00 မူင်း ယူႇတီႈ ၸဝ်ႈႁၢၼ်တၢၼ်းဢွင်ႇ ဢိၵ်ႇတင်း ၵေႃႇမတီႇ ၸေႈတွၼ်ႈ မၢႆ – 8 လႆႈတၢင်တူဝ်ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လႆႈၵႂႃႇၸွႆႈထႅမ်ငိုၼ်း သၢင်ႉငိုၼ်း 150 သႅၼ်ပျႃး တီႈဝတ်ႉၵျွင်းပၢင်လူင်ပွၵ်းၸၢၼ်း ၸေႈဝဵင်းၼမ်ႉ တူႈ တႃႇတေၶိုၼ်းမႄး ၵေႃႇၵုမ်းလုမ်းလႃးၶိုၼ်း ၊ လိူဝ်ၼၼ်ႉ လႆႈလူႇတၢၼ်းတီႈဝတ်ႉ ၵျွင်းယေႇဢူဝ်း သၢင်ႉငိုၼ်း 150 သႅၼ်ပျူး တႃႇၶိုၼ်းမႄးၵုမ်းလုမ်းလႃး ႁူမ်ႈသၢင်ႉငိုၼ်း 300 သႅၼ်ပျူး ယူႇၶႃႈ ။
ဝတ်ႉၵျွင်းၸိူဝ်းၼႆႉ မိူဝ်ႈပၢင်တိုၵ်း ၸုမ်းဢူၺ်းလီပွတ်းႁွင်ႇ တင်း ၸုမ်းသိုၵ်း RCSS လႆႈပဵၼ်ပၢင် ပိုတ်းယိုဝ်းၵၼ်ၼၼ်ႉ လႆႈတိူဝ်ႉၺႃး ၸၢၵ်ႇမၢၵ်ႇ လူႉၵွႆၵႂႃႇၵမ်ႈၽွင်ႈသေ တႃႇတေၶိုၼ်း မႄးၵုမ်း လုမ်းလႃးၼၼ်ႉ ယူႇတီႈ ၽၢႆႇတပ်ႉ ၽၢႆႇဢုပ်ႉပိူင်ႇ လႆႈတၢင်တူဝ် မုၵ်ႉၸုမ်း SSPP/SSA ၵႂႃႇၸွႆႈထႅမ် လူႇတၢၼ်းၸွႆႈ ၼႆၶႃႈ ။
ၸွမ်းၼင်ႇပိုၼ်ႉတီႈ ၼႂ်းထုင်ႉၼမ်ႉတူႈၸိူဝ်းၼႆႉ လႆႈၺႃးတၢမ်ႇ ပၢင်တိုၵ်းၸုမ်းဢူၺ်းလီ ပွတ်းႁွင်ႇ တင်း ၸုမ်းသိုၵ်း RCSS ပဵၼ်ပၢင်တိုၵ်းၵၼ်သေ ၾႆးမႆႈႁိူၼ်းၵူၼ်းမိူင်း ထုင်ႉၼမ်ႉတူႈ လင်ႁိူၼ်း ၵူၼ်းမိူင်း 100 ပၢႆ ထုၵ်ႇၾႆးမႆႈၵႂႃႇသေ ယူႇတီႈ မုၵ်ႉၸုမ်း SSPP/SSA လႆႈၸွႆႈထႅမ် ငိုၼ်း 630 သႅၼ်ပျူး၊ ၼင်ႇႁိုဝ် တေၸၢင်ႈၶိုၼ်းပူၵ်းပွင်ၶိုၼ်းၵႂႃႇၼၼ်ႉ ၸွမ်းၼင်ႇပွင်ပဵၼ်လႆႈ ယူႇတီႈ ပႃႇတီႇမႂ်ႇသုင်ၸိုင်ႈ တႆး တပ်ႉသိုၵ်းၸိုင်ႈတႆး တေၶတ်းၸႂ်ၸွႆႈထႅမ်ပူၵ်းပွင်ပၼ်ၵူၼ်းမိူင်း ၵႂႃႇယူႇ ၼႆၶႃႈ ။
