ယူႇတီႈႁွင်ႈၵၢၼ် ၽၢႆႇဢုပ်ႉပိူင်ႇ ၼႂ်းၼႃႈတီႈၵုမ်းၵမ် SSPP/SSA ဢွၼ်ၵၼ် တူင်ႉၼိုင် ၸွႆႈထႅမ် ၶဝ်ႈပိူၵ်ႇ တီႈသိုၵ်းၵူၼ်းမိူင်း ဢၼ်မီးယူႇၼႂ်းၼႃႈတီႈၸေႈဝဵင်းၽႂ်မၼ်း ။
မိူဝ်ႈဝၼ်းထီႉ 13 ဝၼ်း လိူၼ်ၵျူၼ်ႇလၢႆႇ 2021 ၼၼ်ႉ ယူႇတီႈ ၽူႈၸတ်းၵၢၼ် ၸေႈဝဵင်း လၢႆလၢႆ ၸေႈဝဵင်း မိူၼ်ၼင်ႇ ၸေႈဝဵင်း မၢႆ 9 ၊ ၸေႈဝဵင်း မၢႆ 10 ၊ ၸေႈဝဵင်း 25 ၊ ၸေႈဝဵင်း 26 ၊ ၸေႈဝဵင်း မၢႆ 8 ၊ ဢၼ်မီးၼႂ်းၸေႈဝဵင်း မိူင်းယႆ ၊ သီႇပေႃႉ ၊ ၼမ်ႉလၼ်ႈ ၊ ၸိူဝ်းၼႆႉ ႁူမ်ႈၵၼ် ဢဝ်ၶဝ်ႈပိူၵ်ႇ ဢၼ် လုၵ်ႉတီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ၸွႆႈထႅမ် တႃႇ 4000 ထူင်ၸႅၵ်ႇပၼ် သိုၵ်းၵူၼ်းမိူင်း ၼႂ်းၼႃႈတီႈၽႂ်မၼ်း ႁႂ်ႈပဵၼ်ဢၼ်ၵမ်ႉၸွႆႈထႅမ်ၵႂႃႇ ၼႆၶႃႈ ။
ပူၼ်ႉမႃး မိူဝ်ႈဝၼ်းထီႉ 06-07 လိူၼ်ၵျုၼ်ႇလၢႆ 2021 ၼၼ်ႉၵေႃႈ ယူႇတီႈၽူႈၸတ်းၵၢၼ် ၸေႈဝဵင်း မၢႆ 10 တင်းၸေႈဝဵင်း မၢႆ 6 ဢၼ်မီးၼႂ်းၸေႈဝဵင်းမိူင်းယႆ ၊ သီႇပေႃႉ လႆႈၸွႆႈထႅမ် ၶဝ်ႈပိူၵ်ႇ သိုၵ်း ၵူၼ်းမိူင်း 380 ထူင်ယူႇၶႃႈ ။
သိုၵ်းၵူၼ်းမိူင်းၼႆႉ ၵွပ်ႈပိူဝ်ႈမီးပုၼ်ႈၽွၼ်း သွင်ၽၢႆႇ ၽၢႆႇၼိုင်ႈယူႇၸွမ်းၵူၼ်းမိူင်း ၸွႆႈထႅမ် ၵူၼ်းမိူင်းၵႅတ်ႇၶႄပၼ်ၵူၼ်းမိူင်း ၼႂ်းဝၢၼ်ႈၼႂ်းဢိူင်ႇၽႂ်မၼ်း ၊ ထႅင်ႈၽၢႆႇၼိုင်ႈ သင်ဝႃႈမုၵ်ႉၸုမ်း ပႃတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး မီးၼႃႈၵၢၼ်သင်မႃးၵေႃႈ ၶဝ်ႈႁၢပ်ႇၸွႆႈထႅမ်ၵႂႃႇယူႇ ၊ ၵွပ်ႈၼၼ် သိုၵ်းၵူၼ်းမိူင်း ၸိူဝ်းဢၼ်လႆႈႁၢပ်ႇၵၢၼ်ဝႆႉၸိူဝ်းၼႆႉ ၸွမ်းၼင်ႇပွင်ပဵၼ်လႆႈၼၼ်ႉ ယူႇတီႈ SSPP/SSA ၶတ်းၸႂ်ၸွႆႈထႅမ် ၵႂႃႇယူႇ ၼၶႆၶႃႈ ။
