ၵူၼ်းႁေႃႈႁိူဝ်း တီႈၶၢမ်ႈတႃႈ ၼမ်ႉမၢဝ်း တီႈၼိုင်ႈ ထုၵ်ႇၵူၼ်းဢမ်ႇႁူႉၸၵ်း သွင်ၵေႃႉ ၶီႇလူတ်ႉၶိူင်ႈ မႃးဢဝ်ၵွင်ႈယိုဝ်းတိူဝ်ႉၺႃး လူႉတၢႆ လႄႈ လႆႈသူင်ႇႁူင်းယႃဝႆႉယူႇ။
မိူဝ်ႈဝႃး ဝၼ်းထီႉ 01-လိူၼ်ၵျူၼ်ႇလၢႆႇ 2021 ၶၢဝ်းယၢမ်း 7:30 ၼၼ်ႉ မီးၵူၼ်းဢမ်ႇႁူႉၸၵ်း သွင်ၵေႃႉ ၶီႇလူတ်ႉၶိူင်ႈလမ်းၼိုင်ႈသေ မႃးႁွတ်ႈတီႈတႃႈႁိူဝ်းယဝ်ႉ ဢဝ်ၵွင်ႈပွတ်းယိုဝ်းသႂ်ႇ ၸဝ်ႈၵူၼ်းႁေႃႈႁိူဝ်း ဝၢၼ်ႈၼွင်တိူၼ်း ဝဵင်းၼမ်ႉၶမ်း ၵေႃႉၼိုင်ႈ ယိုဝ်းသႂ်ႇ 11 ၵမ်း တိူဝ်ႉၺႃး တီႈႁူဝ် ၊ တီႈၶႃလူင် လႄႈ တီႈၶႅၼ် လႆႈလူမ်ႉတၢႆထင်တီႈၵႂႃႇသေ ၵူၼ်းၵေႃႉဢၼ်ယိုဝ်း ၼၼ်ႉ ၵေႃႈ ၶိုၼ်းပိၼ်ႇႁူဝ်လူတ်ႉႁေႃႈဢွၵ်ႇၵႂႃႇ ပႅတ်ႈ ဢမ်ႇႁူႉၸၵ်းဝႃႈပဵၼ် ၸုမ်းလႂ် ပဵၼ်ၽီမိုဝ်းၽႂ် ၼႆၶႃႈ ။
ၵူၼ်းၵေႃႉဢၼ်ထုၵ်ႇၺႃးယိုဝ်းၼၼ်ႉ ပဵၼ်ၸၢဝ်းၶိူဝ်းမၢၼ်ႈ ၸိုဝ်ႈႁွင်ႉ ၵူဝ်ႇမဵဝ်းလုၼ်ႇ ဢႃႇယူႉ 34 ပီႊ ၊ ၸိုဝ်ႈပေႃႈ ဢူးၵျေႃႇၸဵင်ႇ ၊ တီႈယူႇ သိၼ်ႇၶျွင်း ဝဵင်းယေႇၸၵျူဝ်ႇ ၸေႈတွၼ်ႈ ပၶူၵ်ႉၵူႇ တိူင်းပႃႇၵိူဝ်ႇ မိူဝ်ႈၽွင်းထုၵ်ႇၺႃးယိုဝ်းၼၼ်ႉ တိုၵ်ႉၼင်ႈသေၵိၼ်ၶဝ်ႈဝႆႉယူႇ ၊ တီႈသုမ်ႉ တႃႈႁိူဝ်း ၼႆႉ မီးၸုမ်းႁေႃႈႁိူၼ်းယူႇၵိၼ်ၸွမ်းၵၼ် 5 ၵေႃႉ ၼႆၶႃႈ ။
ၵူၼ်းၵေႃႉဢၼ်မႃးယိုဝ်းၼၼ်ႉ ပဵၼ်ၵူၼ်းၽိဝ်ၼိူဝ်ႉၼင်ၶၢဝ် ၊ သုင် ၊ ၶၢတ်ႈလၢမ်းဢႃႇယူႉ တေမီး မွၵ်ႈ 30 ပီႊ ၵူၼ်းႁေႃႈလူတ်ႉတႄႉ ပဵၼ်ၵူၼ်းတူဝ်ၶိင်းယွမ်ၵႅင်း ဢွၼ်ၵူၺ်းၼႆ ၵူၼ်းပိုၼ်ႉတီႈ ႁိမ်းတႃႈႁိူၼ်းၵေႃႉၼိုင်ႈ ဢၼ်ႁၼ်တႂ်ႈတႃ လၢတ်ႈၼႄၼင်ႇ ၼႆၶႃႈ ။
ၵူၼ်းပႂ်ႉႁေႃႈႁိူဝ်းၼႆႉ မီးဝႆႉၸွမ်းၵၼ် 5 ၵေႃႉ ၊ မိူဝ်ႈဢဝ်ၵွင်ႈယိုဝ်းၵႂႃႇၼၼ်ႉ တိူဝ်ႉၺႃး ၵူဝ်ႇမဵဝ်း လုၼ်ႇ ၵူၺ်းထႅင်ႈဢၼ်ပႂ်ႉၸွမ်း ၵၼ်တႄႉ ဢမ်ႇတိူဝ်ႉၺႃး ၊ မိူဝ်ႈလဵဝ် တူဝ်တၢႆၵူၼ်းတႄႉ ယူႇတီႈ ၸုမ်းၽၢႆႇၸွႆႈထႅမ် ၶဝ်မႃးဢဝ်တူဝ်ၵႂႃႇသူင်ႇဝႆႉ တီႈႁူင်းယႃၼမ်ႉၶမ်းယဝ်ႉ ၼႆၶႃႈ ။
ဝၢႆးသေပၼ်ႁႃလွင်ႈပိုတ်းယိုဝ်းၵူၼ်းၵေႃႉၼႆႉ ၵိူတ်ႇၶိုၼ်ႈယဝ်ႉၵေႃႈ ၽၢႆႇၼိုင်ႈသိုၵ်းမၢၼ်ႈ ၵေႃႈဢဝ်ႁႅင်းသိုၵ်း ဢဵၼ်ႁႅင်း မွၵ်ႈႁိမ်း 200 ၽေႁဵတ်းသွင်ငႃးသိုၵ်းသေ ၶဝ်ႈၵူတ်ႇသွၵ်ႈ
ၸွမ်းပိုၼ်ႉတီႈ ဢိူင်ႇ 19 ဝၢၼ်ႈ ၸေႈဝဵင်းၼမ်ႉၶမ်း ဝႆႉယူႇ သင်ၸိူဝ်ႉသိုၵ်းမၢၼ်ႈယဵပ်ႇၶဝ်ႈထိူၼ်ႇ လိုၵ်ႉၸိုင် သဵင်ၵွင်ႈတေၸၢင်ႈတႅၵ်ႇ ယွၼ်ႉႁိမ်းႁွမ်း ဢၼ်သိုၵ်းမၢၼ်ႈ ၵူတ်ႇလၢင်ႉယူႇၼႆႉ မီးသၢႆသိုၵ်းတူင်ႉၼိုင် SSPP/SSA တူင်ႉၼိုင်ယူႇသဝ်းဝႆႉယူႇ ၼႆၶႃႈ ။
