ပူၼ်ႉမႃး မိူဝ်ႈဝၼ်းထီႉ 20 လိူၼ် January 2021ၼၼ်ႉ လုင်းၵေႃးလီႇ ၵူၼ်းဝၢၼ်ႈ တွင်ႇပလူဝ်ႉ ၸေႈဝဵင်းၵျွၵ်ႉမေး ထုၵ်ႇၸုမ်းသိုၵ်း ၶွင်ႇသီႇဢဝ်ၶိုၼ်းၸိုင်ႈတႆး RCSS တီႉၺွပ်းၵႂႃႇသေ ၶိုၼ်းမိူဝ်း မွၵ်ႇလၢတ်ႈပီႈၼွင်ႉၵူၼ်းတင်းႁိူၼ်းၶဝ်ၶိုၼ်းဝႃႈ လူႉတၢႆယဝ်ႉ ဝႃႈၼႆ ။
လုင်းၵေႃးလီႇ ၼႆႉ ပဵၼ်ၵူၼ်းၽုၵ်ႇသွမ်ႈၶၢႆၵိၼ်ၼဵင်ႈ လႄႈ ပဵၼ်ပႃးၽူႈၶဝ်ႈၸုမ်း TNP ၵေႃႉၼိုင်ႈၵေႃႈၸႂ်ႈဝႃႈၼႆ ။
“ မိူဝ်ႈတႄႇမၼ်း ၼွင်ႉၸၢႆးမၼ်းမႃးတီႈၶႃႈ မႃးလႄႇၶႃႈသေ ၶႃႈထၢမ် လွင်ႈတၢင်း လုင်းၵေႃးလီႇ ၼွင်ႉၸၢႆးမၼ်းလၢတ်ႈဝႃႈ မၼ်းတၢႆယဝ်ႉ သမ်ႉပေႃးၵၢပ်ႈသွမ်းယဝ်ႉၵႂႃႇယဝ်ႉၼႆ ” ၵူၼ်းဢမ်ႇၶႂ်ႈ ဢွၵ်ႇၸိုဝ်ႈ လၢတ်ႈတီႈ ၸုမ်းၶၢဝ်ႇ သူၺ်ႇၽီႇမေႇၵႂႃႇ ဝႃႈၼႆ။
“ လုင်းၵေႃးလီႇၼႆႉ ထုၵ်ႇသိုၵ်း RCSS တီႉၺွပ်းၵႂႃႇႁိုင်ယဝ်ႉ ၵမ်ႈၽွင်ႈၵေႃႈ ပေႃးလိုမ်းယဝ်ႉ ၊ ၵူၺ်းၵႃႈ ၵူၼ်းႁိူၼ်းၶဝ်တႄႉ ႁိုဝ်တေလိုမ်း ၊ ၵွပ်ႈၼၼ် လမ်းၸွပ်ႇတူၺ်းသေ လႆႈႁူႉဝႃႈ မၼ်းလူႉတၢႆ ၵႂႃႇယဝ်ႉ မိူဝ်ႈလဵဝ် တိုၵ်ႉႁဵတ်းတၢင်းလူႇတၢၼ်းပၼ်ၸွမ်းမၼ်းယူႇၼႆ ” ၵူၼ်းၽၢႆႇ ၸုမ်းၸွႆႈထႅမ် ဢၼ်ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈၼႆ ။
ၵဵဝ်ႇၵပ်းလူၺ်ႈ လွင်ႈဢၼ် သိုၵ်း RCSS တီႉၺွပ်း လုင်းၵေႃးလီႇၵႂႃႇၼႆႉၵေႃႈ ၵွပ်ႈသင်လႄႈ တီႉၺွပ်း မီးတၢင်းၽိတ်းသင်ၼၼ်ႉ ၵူၼ်းႁိူၼ်းပီႈၼွင်ႉၶဝ်ၵေႃႈဢမ်ႇလႆႈႁူႉၸွမ်းသင် ဝႃႈၼႆ ။
ၵူၺ်းၵႃႈ ၵဵဝ်ႇလူၺ်ႈ သိုၵ်း RCSS တီႉၺွပ်းၵႂႃႇသေ လုင်းၵေႃးလီႇ လႆႈလူႉတၢႆၵႂႃႇၼႆႉ လႆႈၵပ်းသိုပ်ႇ တွင်ႈထၢမ် ၸဝ်ႈႁၢၼ်ၶမ်းၸၢမ်ႇ ၽူႈၶၢၼ်ပၢၵ်ႇ ၶွင်ႇသီႇဢဝ်ၶိုၼ်းၸိုင်ႈတႆး RCSS တႄႉ တွပ်ႇ လၢတ်ႈဝႃႈ ၵဵဝ်ႇလွင်ႈၼႆႉ ဢမ်ႇလႆႈႁူႉၸွမ်းႁူဝ်ယွႆႈမၼ်း ၼႆတွပ်ႇလၢတ်ႈၸိူင်ႉၼႆၵူၺ်း ဝႃႈၼႆ။
မိူၼ်ၼၼ်ၼင်ႇၵဝ်ႇ ၵဵဝ်ႇလူၺ်ႈသိုၵ်း RCSS တီႉၺွပ်းၵႂႃႇၼႆႉ ၵူၼ်းဝၢၼ်ႈတေႃႉသၢင်ႇ 2 ၵေႃႉ ၊ ဝၢၼ်ႈၵႅတ်ႉတေႇ ၸေႈဝဵင်းၼမ်ႉသၼ်ႇ 2 ၵေႃႉ ၊ ၵူၼ်းဝၢၼ်ႈသႃႇ ၸေႈဝဵင်းၼမ်ႉတူႈ 2 ၵေႃႉ ၊ ၵူၼ်းဝၢၼ်ႈ ယေႇဢူဝ်း 3 ၵေႃႉ ႁူမ်ႈသဵင်ႈ 9 ၵေႃႉၼႆႉ တေႃႇထိုင်မိူဝ်ႈလဵဝ် ဢမ်ႇပႆႇပွႆႇတူဝ်မႃးၶိုၼ်း ၼႂ်း 9 ၵေႃႉၼၼ်ႉ ပႃးတင်း လုၵ်ႈဢွၼ် 12 ၶူပ်ႇ လႄႈ 15 ၶူပ်ႇ 2 ၵေႃႉ ဢၼ်ထုၵ်ႇသိုၵ်း RCSS တီႉၺွပ်းၵႂႃႇပႃး ဝႃႈၼႆ ။
Information – Shwe Phee Myay News Agency
Information – shannews.org
