ပွင်ႇလႅင်းထိုင် ၵူၼ်းမိူင်းႁဝ်းၶႃႈ တင်းသဵင်ႈ ယၢမ်းလဵဝ် မီးၶၢဝ်ႇပွမ် တီႈၵူၼ်းၵၢင်လၢႆ ၵူၼ်းၵဝ်း ဢဝ်ၶၢဝ်ႇငၢဝ်းဢမ်ႇၸိုဝ်ႈဢမ်ႇၸႂ်ႈ ၶၢဝ်ႇၽၢင်းလႅၼ်တႃၵူၼ်းမိူင်း ႁဝ်းဝႆႉသေ မၢပ်ႇၸီႉၼႄး ၼိူဝ်မုၵ်ႉၸုမ်း SSPP/SSA ယူႇ ။
ယွၼ်ႉပိူဝ်ႈတၢင်းပဵၼ် ၶူဝ်ႊဝိသ်ႉ 19 တုမ်ႉတိူဝ်ႉၵူၼ်းမိူင်းလႆႈလူႉတၢႆ မႃးလိူဝ်ႁႅင်းၵူႈမိုဝ်ႉၵူႈဝၼ်း လႄႈ ၼင်ႇႁိုဝ် တေႁေႉၵင်ႈလႆႈ တၢင်းပဵၼ် ယႃႇႁႂ်ႈတိတ်းၸပ်းလၢမ်းၽေႈၵႂႃႇငၢႆႈၼၼ်ႉ ယူႇတီႈ ၵေႃႇမတီႇၵႅတ်ႇၶႄၶူဝ်ဝိသ်ႉ 19 မုၵ်ႉၸုမ်း SSPP/SSA ၸင်ႇလႆႈၸတ်းႁဵတ်း ပၢင်ၵုမ်ႇဢုပ်ႇဢူဝ်း တႃႇတေၸွႆႈထႅမ် ၵူၼ်းမိူင်း ႁႂ်ႈၵၢင်းလွတ်ႈတၢင်းပဵၼ်ၵႂႃႇၼၼ်ႉ ဢုပ်ႇဢူဝ်းႁႃလွၵ်းလၢႆးမၼ်း တႃႇတေႁဵတ်းသၢင်ႈၵႂႃႇယူႇ ။
ယူႇတီႈ ၸုမ်းပွင်ၵၢၼ် ၵႅတ်ႇၶႄတၢင်းပဵၼ်ၶူဝ်ႊဝိသ်ႉၼၼ်ႉ လႆႈဢုပ်ႇဢူဝ်းၵၼ်ဝႆႉသေတႃႉ တႃႇတေၸွႆႈထႅမ် ၵူၼ်းမိူင်းၼၼ်ႉ တေလႆႈၸွႆႈၸိူင်ႉႁိုဝ် တေႁဵတ်းႁိုဝ်ၸွႆႈထႅမ်ၵူၼ်းမိူင်းႁဝ်းၵႂႃႇ ၼႆၼၼ်ႉ ယူႇတီႈ ၸုမ်းပွင်ၵၢၼ် ၵႅတ်ႇၶႄၶူဝ်ႊဝိသ်ႉ ဢမ်ႇပႆႇလႆႈလၢတ်ႈဢွၵ်ႇၵႂၢမ်းၸိူင်ႉႁိုဝ် သေၵမ်း ။
ၵူၺ်းၵႃႈ မီးၸုမ်းဢမ်ႇႁူဝ်ဢမ်ႇႁၢင် ၸုမ်းၵၢင်လၢႆၵူၼ်းၵဝ်း ဢဝ်းၶၢဝ်ႇၽၢင်းသေ မၢပ်ႇၼႄး ၸီႉၸမ်ႈၼိူဝ် မုၵ်ႉၸုမ်း SSPP/SSA ဝႃႈ ယၢမ်းလဵဝ် ယူႇတီႈ ၽူႈမီးပုၼ်ႈၽွၼ်း SSPP/SSA ၵဵပ်း သဵၼ်ႈမၢႆၵူၼ်းမိူင်း ၼႂ်းၸေႈဝဵင်းသီႇပေႃႉ ၊ ၼမ်ႉတူႈ ၊ ၵျွၵ်ႉမေး ၊ ၸိူဝ်းၼႆႉသေ တေသမ်းပၼ် ယႃႈယႃၶူဝ်ႊဝိသ်ႉ 19 ပေႃးသမ်ႉယဝ်ႉ တေလႆႈပၼ်ငိုၼ်း ၼိုင်ႈၵေႃႉ 45000 ပျူး ၸိူဝ်းၼႆႉ ၽႄႈၵႂႃႇ Socail Online တင်းၼမ် ။
ၵဵဝ်ႇလူၺ်ႈလွင်ႈၵဵပ်းသဵၼ်ႈမၢႆၵူၼ်း လႄႈ ယွၼ်းငိုၼ်းတီႈၵူၼ်းမိူင်း ၼိုင်ႈၵေႃႉ 45000 ပျူး ၸိူဝ်းၼႆႉ ဢမ်ႇၸႂ်ႈလွင်ႈမၢၼ်ႇမႅၼ်ႈလႃးလႃး ၊ ယူႇတီႈ မုၵ်ႉၸုမ်း SSPP/SSA ၵေႃႈ ဢမ်ႇလႆႈႁဵတ်း ဢမ်ႇလႆႈယွၼ်း ၸိူင်ႉၼင်ႇၶၢဝ်ႇလိုဝ်းႁူင်ၼၼ်ႉလႃးလႃးၼႆႉ ၸင်ႇလႆႈပွင်ႇလႅင်းထိုင်မႃးယူႇၶႃႈ ။
ယၢမ်းလဵဝ် ယူႇတီႈငဝ်ႈငုၼ်း တမ်းဝၢင်းၽႅၼ်ၵၢၼ် တႃႇတေၵႅတ်ႇၶႄ ႁေႉၵင်ႈ ၵူၼ်းသိုၵ်း ၵူၼ်းမိူင်း ၼႂ်းၼႃႈတီႈၵုမ်းၵမ် ပႃႇတီႇမႂ်ႇသုင်ၸိုင်ႈတႆး ၸွမ်းၼင်ႇယိုၼ်းထိုင်ပွင်ပဵၼ်လႆႈၼၼ်ႉ တေၶတ်းၸႂ်ႁဵတ်းသၢင်ႈၵႂႃႇ ဢမ်ႇၵွမ်ႉၵူၺ်း တေၸွႆႈထႅမ်ၼႂ်းၼႃႈတီႈၵုမ်းၵမ်ၵူၺ်း တၢင်ႇတီႈၵေႃႈ ၸွမ်းၼင်ႇပွင်ပဵၼ် တေၶတ်းၸႂ်ၸွႆႈထႅမ်ၵႂႃႇယူႇ ၊ ၵွပ်ႈၼၼ် ယၢမ်းလဵဝ် မီးၸုမ်းယႃႉၵဝ်း ဢၼ် လႂ် ၶဝ်ႈမႃးၵေႃႈ ႁႂ်ႈၵူၼ်းမိူင်းႁဝ်း တူၺ်းၵႂၢင်ႈၵႂၢင်ႈသေ ႁဵတ်းသၢင်ႈၵႂႃႇ ဢၼ်ထုၵ်ႇလီႁဵတ်းၵႂႃႇ ယႃႇပေၵႂႃႇယုမ်ႇ ၶၢဝ်ႇလိပ်ႈၶၢဝ်ႇၽၢင်း ၶၢဝ်ႇပွမ်ဢမ်ႇၸိုဝ်ႈဢမ်ႇၸႂ်ႈ ၼၼ်ႉသေၵမ်း ။
