ၽူႈၸွႆႈၵၢၼ် ၼႂ်း SSPP/SSA ထႅင်ႈၵေႃႉၼိုင်ႈ ထုၵ်ႇၺႃးယိုဝ်း တီႈၼႃႈႁိူၼ်းတီႈဝဵင်းၼမ်ႉၶမ်း ၸိုင်ႈတႆး ပွတ်းႁွင်ႇ ။
မိူဝ်ႈဝၼ်းထီႉ 26 လိူၼ်ၵျူၼ်ႇ ပီႊ 2021 ယၢမ်းတၢမ်းၶမ်ႈ မွၵ်ႈ 7:30 ၶိုင်ႈ မီးၵူၼ်းသွင်ၵေႃႉ ၶီႇလူတ်ႉၶိူင်ႈမႃး ထၢမ်ႁႃ ၸၢႆးၵျၢၼ်ႇ တီႈႁိူၼ်း မၼ်းၸၢႆးသေ ယွၼ်ႉၸၢႆးၵျၢၼ်ႇ ဢမ်ႇယူႇႁိူၼ်း လႄႈ ဢွၵ်ႇၵႂႃႇပႂ်ႉၼႃႈႁိူၼ်းဝႆႉယူႇ ၊ ၽွင်းမိူဝ်ႈၸၢႆးၵျၢၼ်ႇ ပွၵ်ႈၶိုၼ်းႁိူၼ်းၼၼ်ႉယဝ်ႉ ထုၵ်ႇၺႃး ၵူၼ်းသွင်ၵေႃႉဢဝ်ၵွင်ႈပွတ်းယိုဝ်းသႂ်ႇတီႈႁူဝ် ၊ တီႈပုမ်ႇမၼ်းၸၢႆးသေ မၼ်းၸၢႆးလႆႈလူမ်ႉ ၵႂႃႇတီႈၼၼ်ႈၵမ်းလဵဝ်သေ ၸိူဝ်းပဵၼ်ပီႈၼွင်ႉ လႆႈဢွၼ်ၵၼ်ဢွၵ်ႇမႃးတူၺ်း ႁၼ်ၸၢႆးၵျၢၼ်ႇ ထုၵ်ႇၺႃးယိုဝ်း လႄႈ လႆႈဢဝ်သူင်ႇႁူင်း ယႃ ဝဵင်းၼမ်ႉၶမ်းယဝ်ႉ လႆႈလူႉသဵင်ႈၵႂႃႇ တီႈႁူင်းယႃ ၼမ်ႉၶမ်း ။
ၸၢႆးၵျၢၼ်ႇ ၵေႃႉထုၵ်ႇယိုဝ်းတၢႆၼႆႉ ဢႃႇယူႇလႆႈ 32 ပီႊ တႄႇၼႃႈႁိူၼ်းၸွမ်း ၼၢင်းဢေးၸၢမ် မီးလုၵ်ႈသၢဝ်ႁူမ်ႈၵၼ် 3 ၵေႃႉ ဢႃႇယူႉ 6 ၶူပ်ႇ ၽႃၽႄ 2 ၵေႃႉ၊ ၵေႃႉလဵၵ်ႉသုတ်း မီး 2 လိူၼ် ၊ ယူႇဝၢၼ်ႈ ႁွင်းလွႆ ဢိူင်ႇၼွင်လွင်း ၸေႈဝဵင်းၼမ်ႉၶမ်း ။
ၸၢႆးၵျၢၼ်ႇၼႆႉ ၶဝ်ႈႁၢပ်ႇထၢမ်းၵၢၼ် ၸွႆႈတပ်ႉသိုၵ်းၸိုင်ႈတႆး SSPP/SSA မႃးမိူဝ်ႈပီႊ 2015 ပီႊ 2018 ၵိုတ်းပေႃးလိုဝ်ႈယူႇတီႈႁိူၼ်း သေ ယၢမ်းလဵဝ်ထုၵ်ႇၺႃးယိုဝ်းလူႉတၢႆ ။
ၽူႈၸွႆႈၵၢၼ် ၼႂ်းၸုမ်း SSPP/SSA ၼႆႉထုၵ်ႇၺႃးလၵ်ႉယိုဝ်းတၢႆမႃးလၢႆလၢႆၵေႃႉ ၊ မိူဝ်ႈဝၼ်းထီႉ 26 လိူၼ်ၵျူၼ်ႇ ပီႊ 2021 ၵူၺ်းၼင်ႇၵဝ်ႇ ယၢမ်း မွၵ်ႈ 07:30 ၶိုင်ႈ မိူၼ်ၵၼ် ၸၢႆးယူင်ႇ ၵေႃႉဢၼ် ယၢမ်ႈ ပဵၼ်ၽူႈၸွႆႈၵၢၼ် SSPP/SSA ၵဝ်ႇၵိုတ်းလိုဝ်းပေႃးၼၼ်ႉၵေႃႈ ထုၵ်ႇၵူၼ်းသွင်ၵေႃႉ ၶီႇလူတ်ႉၶိူင်ႈ မႃးယိုဝ်းတၢႆပႅတ်ႈ တီႈႁိမ်း ၵၢတ်ႇၼွင်ပိင် မိူၼ်ၵၼ်ၼႆ ။
