January 6,2021
By – SSPP/SSA
ၼႂ်းလိူၼ်ၸၼ်ႇဝႃႇရီႇ 5 ဝၼ်း တေႃႇထိုင် 6 ဝၼ်း ပီႊ 2021 ၼီႊ ၶၢဝ်းယၢမ်းၵၢင်ၼႂ် 9:00 မူင်း တေႃႇ ထိုင် ၶၢဝ်းယၢမ်းဝၢႆးဝၼ်း 4:00 မူင်းၼၼ်ႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) လႆႈၸတ်းႁဵတ်းပဵၼ် ပၢင်ၵႅဝ်ႈမၢႆတွင်းဝၼ်းၵေႃႇတင်ႈႁူင်းႁဵၼ်းၼေႃႇတႅၼ်းၶိူဝ်း ၶွပ်ႈ တဵမ်(20)ပီႊ လႄႈ ပၢင်ႁူပ်ႉထူပ်းလုၵ်ႈႁဵၼ်းၼေႃႇတႅၼ်းၶိူဝ်းၸုပ်ႈၵဝ်ႇတင်းၸုပ်ႈမႂ်ႇ၊ ႁူမ်ႈၵၼ်ႇတေႃး မေႃသွၼ် ဢွင်ႈတီႈႁူင်းႁဵၼ်းၼေႃႇတႅၼ်းၶိူဝ်း၊ ဝဵင်းမႂ်ႇဝၢၼ်ႈႁႆး၊ တူင်ႇဝဵင်းၵေႇသီႇ ၵႂႃႇယူႇ။
ၼႂ်းပၢင်ၵႅဝ်ႈၼၼ်ႉ ၸဝ်ႈႁၢၼ် ၽူးလူႇ ၵေႃႉပဵၼ်ၽူႈၸတ်းၵၢၼ်ႁူင်းႁဵၼ်းၼေႃႇတႅၼ်းၶိူဝ်း လႆႈ ဢွၼ်ႁူဝ် ၶဝ်ႈပႃးမေႃသွၼ်လူင် ၼၢင်းၸၢမ်ၶမ်း၊ မေႃသွၼ် ၸၢႆးတၢၼ်းဢူးလႄႈ လုၵ်ႈႁဵၼ်းၼေႃႇ တႅၼ်းၶိူဝ်း ၸုပ်ႈၵဝ်ႇဢိၵ်ႇတင်းၸုပ်ႈမႂ်ႇ(ယိင်း/ၸၢႆး) ဢၼ်လႆႈယူႇသဝ်းႁဵၼ်းသွၼ် တီႈႁူင်းႁဵၼ်း ၼေႃႇတႅၼ်းၶိူဝ်းမႃး တေႇပီႊ 2000 ၼီႊ တေႃႇထိုင် ပီႊ 2020 ၼီႊ ၶၢဝ်းတၢင်း(20)ပီႊၼၼ်ႉ လႆႈ ၶိုၼ်ႈႁွတ်ႈ(436) ၵေႃႉယူႇ။
ယိူင်းဢၢၼ်း ဢၼ်လႆႈၸတ်းပဵၼ်ပၢင်ၵႅဝ်ႈဝၼ်းမၢႆတွင်း ၵေႃႇတင်ႈႁူင်းႁဵၼ်းၼေႃႇတႅၼ်းၶိူဝ်း ၶွပ်ႈ တဵမ်(20)ပီႊၼႆႉ ပိူဝ်ႈတႃႇႁႂ်ႈလုၵ်ႈႁဵၼ်းၼေႃႇတႅၼ်းၶိူဝ်း ၵူႊသိုပ်ႇသိုပ်ႇ မီးလွင်ႈၸမ်ၸႂ်ၵၼ်၊ မီးလွင်ႈ ႁူမ်ႈသၢၼ်မိုဝ်းၵၼ်သေ ႁဵတ်းသၢင်ႈၼႃႈၵၢၼ် ၵမ်ႉယၼ်ပၼ် ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်း ၸိုင်ႈတႆး(SSPP/SSA) ၵႂႃႇဝၼ်းၶၢဝ်းမိူဝ်းၼႃႈ ၼႆယဝ်ႉ။
တီႈၼႂ်းပၢင်ၵႅဝ်ႈၼၼ်ႉ ၸဝ်ႈႁၢၼ် ၽူးလူႇ မွၵ်ႇလၢတ်ႈၶေႃႈၵႂၢမ်းတူၵ်ႇၼၢႆထိုင် လုၵ်ႈႁႅၼ်းတၢင်းသဵင်း ၵႂႃႇဝႃႈ “ ၵိၼ်ၼမ်ႉယႃႇလိုမ်းၵေႃႉၶုတ်းမေႃႇ၊ ၵိၼ်ၶဝ်ႈယႃႇလိုမ်းၵေႃႉၵေႃႇတေးၼႃး။ လွင်ႈဢၼ်ႁူဝ် ပဝ်ႈလူင်ႁဝ်းၶႃႈ ၵေႃႇတင်ႈႁူင်းႁဵၼ်းၼေႃႇတႅၼ်းၶိူဝ်းမႃးၼႆႉၵေႃႈ ပုၼ်ႈတႃႇႁႂ်ႈပဵၼ် သိူဝ်တၢႆသိူဝ် တႅၼ်း၊ လႅၼ်းတၢႆလႅၼ်းပုတ်ႈ။ ၸူဝ်ႈသိူဝ်ပႆႇတၢႆ လူဝ်ႇႁၢင်ႈႁႅၼ်းသိူဝ်ပႂ်ႉထႃႈ။ ယိူင်းဢၢၼ်းတႃႇ ၵိူတ်ႇ ဢွၵ်ႇသႅၼ်းႁုၼ်ႈမႂ်ႇ ႁႂ်ႈပဵၼ်ၽူႈဢွၼ်ႁူဝ်/ ၽူႈၵေႃႉဢၼ်ႁဵတ်းၵၢၼ်ၵမ်ႉယွင်ပၼ်ပုၼ်ႈတႃႇ မုၵ်ႉ ၸုမ်း ၼႂ်းဝၼ်းၶၢဝ်းမိူဝ်းၼႃႈ” ၼႆယူႇ။
လိူဝ်ၼၼ်ႉ မေႃသွၼ်လူင် ၼၢင်းၸၢမ်ၶမ်း သိုပ်ႇမွၵ်ႇလၢတ်ႈၶေႃႈၵႂၢမ်းၵႂႃႇထႅင်ႈဝႃႈ“ တေႇပီႊ 2000 ၼီႊ တေႃႇထိုင် 2020 ၼီႊၼႆႉ ႁဝ်းႁႃးလႆႈဢွၼ်ၵၼ်လတ်းၽၢၼ်ႇ လွင်ႈယၢပ်ႇၽိုတ်ႇမႃးၸွမ်းၵၼ်။ ၸုမ်းမေႃသွၼ်ၵဝ်ႇ၊ မေႃသွၼ်မႂ်ႇႁဝ်းၶဝ် လႆႈဢွၼ်ၵၼ် တီႇၽဵဝ်ႈပႅတ်ႈယုမ်းၼၢမ်လူင်မႃး ။ ၽူႈၵေႃႉ ဢၼ်ဢွၼ်ႁူဝ်ပူၵ်းတင်ႈ ႁူင်းႁဵၼ်းၼေႃႇတႅၼ်းၶိူဝ်းၼႆႉ ပဵၼ်တူဝ်ၸဝ်ႈပၢင်ႇၾႃႉ ၸဵမ်မိူဝ်ႈပၢၼ်ပဵၼ် ၽူႈၵွၼ်းတပ်ႉၸုမ်းမၢႆ(1)။ ၵွပ်ႈၼၼ် ယုမ်ႇယမ်ဝႃႈ လုၵ်ႈႁဵၼ်းႁဝ်းၶဝ်ၵူႊၵေႃႉ တေပဵၼ်ၽူႈဢွၼ် ႁူဝ်လီၵႂႃႇ ႁင်းၽႂ်မၼ်း” ၼႆယူႇ။
