09-12-2020
ၶၢဝ်-SSPPInfo

သၢႆသိုၵ်း RCSS ၶဝ်သူင်ႇႁႅင်းသိုၵ်းၶိုၼ်ႈၸူးၽၢႆႇ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆးလႄႈ သွင်ၽၢႆႇလႆႈပဵၼ် ပၢင်တိုၵ်းၵၼ် ၼႂ်းဢိူင်ႇဝၢၼ်ႈၸၢမ် ၸေႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။

မိူဝ်ႈဝၼ်းထီႉ 09-12-2020 ၼၼ်ႉ သၢႆသိုၵ်းတူင်ႉၼိုင် ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး တူင်ႉၼိုင်ၵူတ်ႇ ထတ်းၼႃႈတီႈ ၼႂ်းဢိူင်ႇဝၢၼ်ႈၸၢမ် ၸေႈဝဵင်းၼမ်ႉတူႈ မိူဝ်ႈၽွင်းသၢႆသိုၵ်းပႃႇတီႇမႂ်ႇသုင်ၸိုင်ႈတႆးတပ်ႉသိုၵ်း ၸိုင်ႈ တႆးတေၵႂႃႇတီႈဝၢၼ်ႈၼႃးၵႄးၼၼ်ႉ လႆႈပွင်ႇၶၢဝ်ႇပၼ်တီႈ တပ်ႉသိုၵ်း RCSS ဢွၼ်တၢင်းသေ ၽိူဝ်ႇထိုင်သၢႆသိုၵ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး ႁွတ်ႈၽႅဝ်တီႈ ဝတ်ႉၵျွင်းၼႃးၵႄးၼၼ်ႉ ၽၢႆႇတပ်ႉသိုၵ်း RCSS ၶိုၼ်ႈၸူး သၢႆသိုၵ်းပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆးဢွၼ်တၢင်းလႄႈ သွင်ၽၢႆႇလႆႈပဵၼ်ပၢင်တိုၵ်းၵၼ် တင်ႈတေႇ ယၢမ်းၵၢင်ၼႂ် 8 : 45 မူင်း ၼႆယဝ်ႉ။

ထိုင်မႃးယၢမ်းဝၢႆးၼႂ် 10 : 00 မူင်းၼၼ်ႉ တပ်ႉသိုၵ်းမၢၼ်ႈ တပ်ႉၶလယ 256 ႁူမ်ႈ ၶမယ 324 ႁႅင်းၵူၼ်းမွၵ်ႈ 70 လုၵ်ႉတၢင်းဝၢၼ်ႈၸၢမ်သေ မႃးထႅမ်ႁႅင်းၸွႆႈ RCSS တီႈဢၼ် ပဵၼ်ပၢင်တိုၵ်းၼၼ်ႉလႄႈ တေႃႇထိုင်မိူဝ်ႈ လဵဝ် ၽၢႆႇပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး လႆႈပဵၼ်ပၢင်တိုၵ်းၵၼ်တင်း သိုၵ်းမၢၼ်ႈႁူမ်ႈ RCSS သေ သဵင်ၵွင်ႈ သဵင်မၢၵ်ႇတိုၵ်ႉပၼ်းဝႆႉယူႇယဝ်ႉ။