04-12-2020
ၶၢဝ်ႇ- SSPP Info
ယွၼ်ႉလုၵ်ႈဢွၼ်ႇၸုတ်ႇလဵၼ်ႈၾႆးသေ ဢဝ်ၶႆႇၾႆးတႅၵ်ႇတူၵ်းသႂ်ႇပုမ်ႇၶဝ်ႈလႄႈ ႁဵတ်းႁႂ်ႈၾႆးလမ်းမႆႈပုမ်ႇၶဝ်ႈၵူၼ်း မိူင်းၸေႈဝဵင်းသီႇပေႃႉ ပုမ်ႇၼိုင်ႈဝႃႈၼႆ။
မိူဝ်ႈဝၼ်းထီႉ 02-12-2020 ၶၢဝ်းယၢမ်း ဝၢႆးဝၼ်း 03:15 ၼၼ်ႉ ၾႆးမႆႈပုမ်ႇၶဝ်ႈႁႆႈ လုင်းမိၼ်ႉလႄႈပႃႈထူၺ်း ၵူၼ်းဝၢၼ်ႈ ၼမ်ႉမေႃႇၶႆႉ ဢိူင်ႇသီႇထွၵ်ႈ တူင်ႇဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈ ၼႂ်းဢိူင်ႇသီႇထွၵ်ႈ ၵေႃႉၼိုင်ႈလၢတ်ႈဝႃႈ “လွင်ႈၾႆးလႆႈမႆႈပုမ်ႇၶဝ်ႈၼႆႉပဵၼ်ယွၼ်ႉလုၵ်ႈၸၢႆး ဢွၼ်ႇလုင်း မိၼ်ႉလႄႈပႃႈထူၺ်း ၶဝ်ၸုတ်ႇၾႆးလဵၼ်ႈ တီႈႁိမ်းၸမ်ပုမ်ႇၶဝ်ႈသေ ဢဝ်ၶႆႇၾႆးတူၵ်း သႂ်ႇ ပုမ်ႇၶဝ်ႈၶဝ် လႄႈၾႆးၸွင်ႇ လႆႈလၢမ်းမႆႈပုမ်ႇၶဝ်ႈယဝ်ႉ” ဝႃႈၼႆ။
ပုမ်ႇၶဝ်ႈဢၼ်ၾႆးလႆႈမႆႈၵႂႃႇၼႆႉ ၵူၼ်းဝၢၼ်ႈၼႂ်းပိုၼ်ႇတီႈၶဝ် လၢမ်းၶၢတ်ႈဝႆႉဝႃႈ တေလႆႈၶဝ်ႈပိူၵ်ႇဢမ်ႇယွမ်း 40 ထူင် မိူဝ်ႈၽွင်းၾႆးမႆႈၼၼ်ႉ ယွၼ်ႉၵူၼ်းဝၢၼ်ႈႁိမ်းႁွမ်းၶဝ် ဢွၼ်ၵၼ်မႃးၸွႆႈၶႄလႄႈ ၾႆးဢမ်ႇတၼ်းမႆႈမူတ်း တေလႆႈ ၶိုၼ်းယူႇတႃႇၶဝ်ႈပိူၵ်ႇ မွၵ်ႈ 20 ထူင်ၼၼ်ႉ ၼႆယဝ်ႉ။
