December 9,2020
By – SSPP/SSA
ၼႂ်းလိူၼ်တီႇၸိမ်ႇပႃႇ 8 ဝၼ်း ပီႊ 2020 ၼီႊ ၶၢဝ်းယၢမ်းၵၢင်ဝၼ်း 10:45 မူင်း တေႃႇထိုင် ၶၢဝ်း ယၢမ်းတဵင်ႈဝၼ်း 12:30 မူင်းၼၼ်ႉ ႁူဝ်ပဝ်ႈလူင်ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/SSA) လႆႈႁူပ်ႉထူပ်း ၵိၼ်ၶဝ်ႈႁူမ်ႈမူႇ ဢုပ်ႇဢူဝ်းပိၼ်ႇပၢႆႇၵၼ်တင်း ၵေႃႇမတီႇဢုပ်ႉပိူင်ႇ ဢိူင်ႇၼႃးၵွၼ်လႄႈ ဢိူင်ႇၵွင်းႁၵ်ႉ တီႈထုင်ႉသူၼ်ၼမ်ႉဢုၼ်ႇ၊ ႁိမ်းၽင်ႇမေႈၼမ်ႉငႃႉ၊ တူင်ႇဝဵင်းမိူင်း သူႈၵႂႃႇယူႇ။
တီႈပၢင်ၵိၼ်ၶဝ်ႈသုမ်လီၵၼ်ၼၼ်ႉ ႁူဝ်ပဝ်ႈလူင် တူၵ်ႇၼၢႆႇၶေႃႈၵႂၢမ်း ပၼ်တီႈၵေႃႇမတီႇဢုပ်ႉပိူင်ႇ ၵႂႃႇဝႃႈ “ ၼႂ်းၼႃႈတီႈဢုပ်ႉပိူင်ႇႁဝ်းၼႆႉ ထၢၼ်ႈၵူၼ်း၊ ၶိူဝ်းၵူၼ်း ဢမ်ႇမိူၼ်ၵၼ်ၵေႃႈ ႁႂ်ႈမေႃယူႇႁူမ်ႈ ႁွမ်းၸွမ်းၵၼ်ၵႂႃႇ။ ၵၢၼ်ၵေႃႇသၢင်ႈတွၼ်ႈလိၼ်ၶိုၼ်ႈယႂ်ႇလႄႈ ၵၢၼ်ပူၵ်းပွင်ၽဝၵူၼ်းမိူင်း ႁႂ်ႈၶိုၼ်ႈ ယႂ်ႇမႂ်ႇသုင်ၼႆႉ ႁဝ်းဢမ်ႇပႆႇႁဵတ်းလႆႈထိုင် ၸၼ်ႉၸႄႈမိူင်းၵေႃႈ လူဝ်ႇလႆႈႁဵတ်းၵႂႃႇ ၼႂ်းၼႃႈတီႈတွၼ်ႈ လိၼ်ဢုပ်ႉပိူင်ႇႁဝ်းၵမ်းသၢင်ႉသၢင်ႉ။ ၽၢႆႇဢုပ်ႉပိူင်ႇ ၸႄႈတွၼ်ႈလႄႈ ၸႄႈဝဵင်းႁဝ်းၶဝ် လူဝ်ႇလႆႈ ၸႂ်ႉတိုဝ်းဢႃႇၼႃႇဢၼ်တြႃးသေ တၢင်တူဝ်ပႃႇတီႇလႄႈ တပ်ႉသိုၵ်းႁဝ်း ၶဝ်ႈဢွၵ်ႇၵပ်းသိုပ်ႇၵၼ် တင်းပေႃႈမႄႈၵူၼ်းမိူင်း။ ၼႂ်းၼႃႈတီႈဢုပ်ႉပိူင်ႇၼႆႉ လူဝ်ႇလႆႈမီးလုမ်း ၸႄႈတွၼ်ႈလႄႈ ၸႄႈဝဵင်း ႁႂ်ႈ ပဵၼ်ဢွင်ႈတီႈၶွၼ်ႈတုမ် ဢုပ်ႇဢူဝ်းပိၼ်ႇပၢႆႇၼႃႈၵၢၼ်ၵႂႃႇ။ တီႈၵၢၼ်ထတ်းသၢင်ႈ လွင်ႈတူင်ႉၼိုင် ႁဵတ်းသၢင်ႈၼႃႈၵၢၼ် ၶွင်ၽူႈဢွၼ်ႁူဝ်ၼိုင်ႈၵေႃႉၼၼ်ႉၵေႃႈ တေလႆႈထတ်းတူၺ်းဢတိၵ်ႉ ၶၢဝ်း ယၢမ်းဢၼ်ပူၼ်ႉမႃး၊ ပိတ်ႉၸူၵ်ႉပၢၼ်ႇ ဢၼ်ၶိုင်ပွင်ႁဵတ်းသၢင်ႈယူႇယၢမ်းလဵဝ်လႄႈ ဢႃႊၼႃႇၵၢတ်ႈ ဝၢၼ်ႈမိူဝ်းၼႃႈ ” ၼႆယဝ်ႉ။
