ၶၢဝ်ႇ- SSPP info
December,20,2020
သိုၵ်းမၢၼ်ႈတပ်ႉၵွင် ၶလရ 79 ၽၢႆႇတႂ်ႈၵုမ်းၵမ် တပ်ႉမ 99 ႁႅင်းၵူၼ်း(60) ၶိုၼ်ႈလေႃႇတိုၵ်း တပ်ႉဢူၺ်း လီတီႈလွႆၵွင်းတုၺ် ဢိူင်ႇမိူင်းပေႃႈ ၸေႈဝဵင်းပၢင်သၢႆး ၸိုင်ႈတႆးပွတ်းႁွင်ႇ။
ဝၼ်းထီႉ 19.12.2020 ၶၢဝ်းယၢမ်း 5:56မူင်းၼၼ်ႉ သိုၵ်းမၢၼ်ႈတပ်ႉၶလရ (79)လုၵ်ႉတၢင်းၼွင်ၶမ်း ၵႂႃႇ တၢင်းပဵင်းဢွႆႈသေ ၶိုၼ်ႈလေႃႇတိုၵ်းတပ်ႉပၢင်သဝ်း ၸုမ်းဢူၺ်းလီ(3)ၸုမ်း ဢၼ်ပၵ်းသဝ်းဝႆႉ ၼိူဝ်လွႆၵွင်းတုၺ်ၼၼ်ႉ သွင်ၽၢႆႇလႆႈပဵၼ်ပၢင်တိုၵ်းၵၼ် တေႃႇထိုင်ယၢမ်း 8:15 မူင်းၼၼ်ႉသဵင်ၵွင်ႈ ၸင်ႇယဵၼ်ၵႂႃႇ၊ ၽွင်းသွင်ၽၢႆႇပဵၼ်ပၢင်တိုၵ်းၵၼ်ယူႇၼၼ်ႉ သိုၵ်းမၢၼ်ႈၶဝ် လုၵ်ႉတီႈၵွင်းတပ်ႉ 105 လၵ်းၼၼ်ႉသေ ဢဝ်ၶိူင်ႈလူင် 120 ယိုဝ်းၸွႆႈၵႂႃႇတၢင်းပၢင်တိုၵ်းၼၼ်ႉ 12 လုၵ်ႈ ၵူၺ်းဢမ်ႇတိူဝ်ႉၽႂ်။
တပ်ႉဢူၺ်းလီသၢမ်ၸုမ်း ဢၼ်ပၵ်းသဝ်းဢဝ်တီႈယူႇဝႆႉၼိူဝ်လွႆၵွင်းတုၺ်ၼၼ်ႉ ပဵၼ်တပ်ႉသိုၵ်းၸိုင်ႈ တႆး ဢၼ်ဢဝ်ႁူမ်ႇလူမ်ႈၸေႈဝဵင်းမၢႆ(15)ပၢင်ႇသၢႆး၊ တပ်ႉသိုၵ်းယၶႅင်ႇလႄႈတပ်ႉသိုၵ်းၵူဝ်းၵၢင်ႉယူႇ သဝ်းၸွမ်းၵၼ် ပူၼ်ႉမႃးမိူဝ်ႈၼႂ်းလိူၼ်ႈဢေႃးၵတ်ႊၼၼ်ႉၵေႃႈ သိုၵ်းမၢၼ်ႈယၢမ်ႈၶွၼ်ႈႁႅင်းၶိုၼ်ႈ လေႃႇတိုၵ်းမႃးပွၵ်ႈၼိုင်ႈယူႇယဝ်ႉ။ယူႇတီႈၽၢႆႇတပ်ႉသိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်းတေႃႇထိုင်လိူၼ် တီႊၸိမ်ႊပႃႊသုတ်းၼႆသေတႃႉ ပၢင်တိုၵ်းယင်းၵိုတ်ႇၶိုၼ်ႈလၢႆလၢႆတီႈ မိူၼ်ၼင်ႇၸေႈဝဵင်းၼမ်ႉတူႈၵေႃႈ တပ်ႉသိုၵ်းမၢၼ်ႈပိုတ်ႇၼႃႈ သိုၵ်းတေႃႇ တပ်ႉသိုၵ်းTNLA (2)ပွၵ်ႈယူႇယဝ်ႉ။
