ၶၢဝ်ႇ-SSPP info
2020,October 19
လုၵ်ႉတီႈႁူင်းယႃတူၼ်ႈတီး ၵူတ်ႇထတ်းၺႃး ၵူၼ်းၸပ်းတၢင်းပဵၼ် ၵႃႇလၵူၼ်း (COVID-19) 10 ၵေႃႉ ၼႂ်းဝၼ်းထီႉ 18.11.2020 ၶၢဝ်းယၢမ်း 8 မူင်းၼၼ်ႉ ပႃးၵူၼ်းမိူင်းၵေးသီးၼိုင်ႈၵေႃႉၼႆယူႇယဝ်ႉ။
ၵဵဝ်ႇၵပ်းၸႅၼ်ႇပဵၼ် ၼၢင်းယိင်း ဢႃႇယူႉ(21)ၶူပ်ႇ ၸပ်းတၢင်းပဵၼ်ၵႃႇလၵူၼ်း(COVID-19)ၼၼ်ႉသေ ၵူၼ်းမိူင်းၵေးသီးၵေႃႉၼိုင်ႈလၢတ်ႈဝႃႈ“ဢၼ်ၸပ်းတၢင်းပဵၼ်ၼႆႉ ပဵၼ်ၸၢဝ်းၶိူဝ်းရၶႅင်ႇ လုၵ်ႉတီႈဝဵင်း မျွၵ်ႉဢုၵ်ႉၵလႃႇပ တိူင်းတႃႈၵုင်ႈ မႃးယူႇၸွမ်းၽူဝ်မၼ်း ဢၼ်ႁၢပ်ႇၵၢၼ်ဝႆႉ တီႈလုမ်းၽၢႆႇတႅၵ်ႈ ၼႃႈလိၼ်လႄႈ ၸဵမ်မိူဝ်ႈဝၼ်းဢၼ်ၽႅဝ်မႃး ဝၼ်းထီႉ 7.11.2020 ၼၼ်ႉ လႆႈဢဝ်သႂ်ႇဝႆႉတီႈၵုမ်းၶင်၊ ၵမ်းလဵဝ်ယူႇ၊ ဢဝ်ၶီႈတိူၵ်ႇၵႂႃႇၵူတ်ႇထတ်းၵေႃႈ ႁၼ်ၸိူဝ်ႉမႅင်းတၢင်းပဵၼ် ၸိူင်ႉၼင်ႇလူင်ပွင်ၸိုင်ႈ ပိုၼ်ၽၢဝ်ႇမႃးၼၼ်ႉယူႇ၊ သိုပ်ႇလၢတ်ႈထႅင်ႈဝႃႈ“ပေႃးပဵၼ်ၵူၼ်းလုၵ်ႉတၢင်းမိူင်းရၶႅင်ႇမႃးတႄႉ 10ၵေႃႉ တိုၼ်းၸပ်းၸိူဝ်ႉမႅင်း 8 ၵေႃႉ ၵွပ်ႈၼၼ်လီဢွၼ်ၵၼ်ၾၢင်ႉယူႇ”ဝႃႈၼႆ။
ပူၼ်ႉမႃးလၢႆဝၼ်းၼႆႉၵူၺ်း ထတ်းႁၼ်ၵူၼ်းၸပ်းတၢင်းပဵၼ် ၵႃႇလၵူၼ်း(COVID-19)ၼႂ်းမိူင်းတႆး မီး ဢွၵ်ႇမႃး လၢႆလၢႆတီႈသေ ႁဵတ်းႁႂ်ႈပဵၼ်လွင်ႈတိုၼ်ႇၽၢၼ်ႈ ၵူဝ်ႁေ တေၵႂႃႇတေမႃး တိုၼ်းလူဝ်ႇလႆႈၾၢင်ႉ မိူၼ်ၼင်ႇဝၼ်းထီႉ 16.11.2020 မီးၶၢဝ်ႇဢွၵ်ႇဝႃႈ“ၵူၼ်းဝၢၼ်ႈမၢၵ်ႇတွႆႇ ၸပ်းတၢင်းပဵၼ်”ၼႆပဵၼ်ၶၢဝ်ႇ လိုဝ်းၵႂႃႇ ဝၼ်းထီႉ 18.11.2020 ၼႆႉ လႆႈၶေႃႈတွပ်ႇဝႃႈ ၵူၼ်းၸိူဝ်းၵဵဝ်ႇၶွင်ႈၼၼ်ႉ ၵူတ်ႇထတ်းဢမ်ႇမီး တၢင်းပဵၼ်သေၵေႃႉၼႆသေတႃႉ တေၶိုၼ်းၵူတ်ႇထတ်းထႅင်ႈပွၵ်ႈၵမ်း(2)ယူႇ လႆႈႁူႉၼင်ႇၼႆ။
ယူႇတီႈၸုမ်းၵႅတ်ႇၶေ တၢင်းပဵၼ်ၵႃႇလၵူၼ်း(COVID-19) ငဝ်ႈငုၼ်းပႃႇတီႇ မႂ်ႇသုင်ၸိုင်ႈတႆး တပ်ႉသိုၵ်း ၸိုင်ႈတႆးၵေႃႈ လႆႈလူင်းပၼ်ပိုၼ်ႉႁူႉၼႂ်းၼႃႈတီႈ ၵႃႈၼင်ႇယိုၼ်းထိုင်လႆႈ၊ တီႈငဝ်ႈငုၼ်းၵေႃႈ လႆႈပိုတ်ႇဝႆႉဢွင်ႈၵုမ်းထိင်း ၵူၼ်းၸိူဝ်းလုၵ်ႉတီႈၵႆပႆတီႈယၢဝ်း ပွၵ်ႈၶိုၼ်းၸူးပီႈၼွင်ႉၽႂ်မၼ်း ၼႂ်း ၼႃႈတီႈယိုၼ်းထိုင်လႆႈၼၼ်ႉသေ တၢင်းၽၢႆႇယူႇလီလူင်ပွင်ၸိုင်ႈၵေႃႈ ၵပ်းသိုပ်ႇၵပ်းသၢၼ်ၵၼ် ႁဵတ်းသၢင်ႈဝႆႉယူႇယဝ်ႉ။ၽၢႆႇယူႇလီလူင်ပွင်ၸိုင်ႈၵေႃႈ ပိုၼ်ၽၢဝ်ႇဢွၵ်ႇၵူႈဝၼ်း ႁႂ်ႈဢွၼ်ၵၼ်သႂ်ႇၽႅၼ်ႇတူမ်းသူပ်း(Mask) ၵႆႉ လၢင်ႉမိုဝ်း၊ ယႃႇယူႇၶွၼ်ႈၵူၼ်းၼမ်၊ တေဢမ်ႇလႆႈယူႇၸမ်ၵၼ် ပေႃးႁၼ်ၵူၼ်းပဵၼ်လၢၵ်ႇလၢႆး ႁႂ်ႈၸွႆႈ ပွင်ႇလႅင်းထိုင်တီႈၽူႈမီးပုၼ်ႈၽွၼ်းသေဢမ်ႇၵႃး တႄႇဢဝ်ဝၼ်းထီႉ 21.11.2020 တေႃႇထိုင်ဝၼ်းထီႉ 5.11. 2020 ၼၼ်ႉႁႂ်ႈဢွၼ်ၵၼ်ယူႇႁိူၼ်း ပေႃးဢမ်ႇမီးၵၢၼ်လမ်ႇလွင်ႈ ယႃႇဢွၵ်ႇတၢင်းၼွၵ်ႈၼႆ ဢွၵ်ႇ လိၵ်ႈပၼ်ၾၢင်ႉထိုင်ၵူၼ်းမိူင်း ဝၼ်းထီႉ 18.11.2020 ၼၼ်ႉယူႇယဝ်ႉ။
