04-10-2020
ၶၢဝ်ႇ-ၸၢႆးၶုၼ်
ၼၢင်းယိင်းဢွၼ်ႇ သႅၼ်းဢႃႇယု 15 ၶူပ်ႇၵေႃႉၼိုင်ႈ ထုၵ်ႇၺႃးၸုတ်ႇၽဝ်တူဝ်သေ တၢႆဝႆႉတီႈၼွၵ်ႈတၢင်းၵႃးလူင် လႃ သဵဝ်ႈၼမ်ႉတူႈ တီႈၼႂ်းၵႄႈ ၵၢင်ဝၢၼ်ႈၶူဝ်ၽိူၵ်ႇလႄႈ ဝၢၼ်ႈပၢင်သပေႇ ဝႃႈၼႆ။
မိူဝ်ႈဝၼ်းထီႉ 01-10-2020 မိူဝ်ႈယၢမ်းဝၢႆးဝၼ်းၼၼ်ႉ မီးၵူၼ်းထူပ်းႁၼ်တူဝ်တၢႆ ၼၢင်းယိင်းဢွၼ်ႇ ၵေႃႉၼိုင်ႈတီႈႁိမ်း ၼွၵ်ႈတၢင်းၵႃးလူင်လႃသဵဝ်ႈၼမ်ႉတူႈ တီႈဢၼ်ယၢၼ်ၵႆ ဝဵင်းၼမ်ႉတူႈမွၵ်ႈ 7 လၵ်း ပဵၼ်တီႈၼႂ်းၵႄႈၵၢင် ဝၢၼ်ႈၶူဝ် ၽိူၵ်ႇ လႄႈ ဝၢၼ်ႈပၢင်သပေႇ ယူႇတီႈၽူႈမီးပုၼ်ႈၽွၼ်း ၽၢႆႇပလိၵ်ႈ ၼႂ်းၸေႈဝဵင်းၼမ်ႉတူႈၶဝ် မႃးၵူတ်ႇထတ်းတူၺ်း တီႈတူဝ်တၢႆမၼ်းၼၢင်းလႄႈ ႁိမ်းႁွမ်းတီႈပဵၼ်ပၼ်ႁႃၼၼ်ႉယဝ်ႉလီငမ်းသေ ၸုမ်းပရႁိတ ဝဵင်းၼမ်ႉတူႈၶဝ်ၸွႆႈ တၢင်ႇဢဝ်ၶၢပ်ႈတူဝ်တၢႆ မိူဝ်းသူင်ႇဝႆႉတီႈႁူင်းယႃလူင်ဝဵင်းၼမ်ႉတူႈ ၼႂ်းဝၼ်းၼၼ်ၵမ်းလဵဝ်ဝႃႈၼႆ။
ၼၢင်းယိင်းဢၼ်ထုၵ်ႇၽဝ်တူဝ်ၶႃႈႁႅမ်တၢႆဝႆႉၼႆႉ ၸိုဝ်ႈႁွင်ႉဝႃႈ ၼၢင်းထူၺ်းငႄႇ ဢႃႇယု 15 ၶူပ်ႇ ၸိုဝ်ႈမႄႈ ပႃႈသေး ပဵၼ်ၸိူဝ်ႉၶိူဝ်းလွႆ ယူႇသဝ်းဝႆႉတီႈ ဝဵင်းၼမ်ႉတူႈ ပွၵ်ႉမၢႆ (10) သေ မၼ်းၼၢင်းတေႇႁၢႆဢွၵ်ႇႁိူၼ်းၵႂႃႇ မိူဝ်ႈဝၼ်းထီႉ 30-09-2020 ၼၼ်ႉဝႃႈၼႆ။ ၵူၼ်းမိူင်းၼႂ်းပိုၼ်ႉတီႈၸေႈဝဵင်းၼမ်ႉတူႈၵေႃႉၼိုင်ႈလၢတ်ႈတီႈႁဝ်းၶႃႈဝႃႈ ၼႂ်းဝဵင်းၼမ်ႉတူႈၼႆႉ ယွၼ်ႉၵူၼ်းသိုဝ်ႉၶၢႆ သူႇသမ်းၵိၼ်ယႃႈ ၼမ်လိူင်ႇမႃးၵူႈပီႊပီႊလႄႈ ၽူႈလၵ်ႉၸၢၵ်ႈၶုတ်ႈၵေႃႈ လိူင်ႇၼမ်မႃး ယင်းၵႆႉမီးပႃးၵၢၼ်ၶႃႈႁႅမ်ၵၼ် ၸွမ်းတႃႈၸွမ်းတၢင်းသေ ပုၼ်ႈတႃႇၵူၼ်းႁဵတ်းၵိၼ်ၵၢၼ်ၽုၵ်ႇသွမ်ႈၶဝ်ၵေႃႈ ပေႃးထိုင်ၶၢဝ်း မၢၵ်ႇၶဝ်ႈတဝ်ႈၼမ်ႉလႆႈ မႃးၼႆ ၵႆႉၵႆႉလႆႈထုၵ်ႇၺႃးၽူႈလၵ်ႉၶဝ် ၶဝ်ႈလၵ်ႉၶူဝ်းၽုၵ်ႇဢွၵ်ႇမႃးၼႂ်း သူၼ်ၼႂ်းႁိူၵ်ႈဢမ်ႇၵႃး မိူဝ်ႈယၢမ်း လူဝ်ႇၵႂႃႇမႃးပႆ ၸွမ်းတႃႈၸွမ်းတၢင်းၵေႃႈယင်းဢမ်ႇမီးလွင်ႈႁူမ်ႇလူမ်ႈသေဢိတ်းယဝ်ႉ ဝႃႈၼႆ။
