October 11, 2020
By – SSPP/ SSA
ၼႂ်းလိူၼ်ဢွၵ်ႇတူဝ်ႇပႃႇ 4 ဝၼ်း ပီႊ 2020 ၼီႊၼၼ်ႉ ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး (SSPP/ SSA) လႆႈၸွႆႈထႅမ်ၵေႃႇသၢင်ႈပၼ်ယွင်ၼမ်ႉလႄႈ ၸႂ်ႉတိုဝ်းႁႅင်းၾႆးသႅင်လႅတ်ႇသေ တိုတ်ႉ ၼမ်ႉပၼ် ပေႃႈမႄႈၵူၼ်းမိူင်း တီႈဝၢၼ်ႈၼမ်ႉလပ်ႉ ဢိူင်ႇၼမ်ႉလပ်ႉ ၸေႈဝဵင်းမၢႆ(7)မိူင်းၵၢဝ်လူင် တူင်ႇဝဵင်းတၢင်ႉယၢၼ်းၵႂႃႇယူႇ။
တီႈၵၢၼ်ၵေႃႇသၢင်ႈယွင်ၼမ်ႉၼၼ်ႉ ၶဝ်ႈပႃးၸုမ်းမေႃမိုဝ်းဝၢၼ်ႈၼမ်ႉလဝ်းလႄႈ ၸုမ်းမေႃမိုဝ်းၼႂ်း ၸေႈဝဵင်းၵေႇသီႇ ႁူမ်ႈၵၼ်မွၵ်ႈ(12)ၵေႃႉ ဢိၵ်ႇတင်းပေႃႈမႄႈၵူၼ်းမိူင်း ၼႂ်းဝၢၼ်ႈၼမ်ႉလပ်ႉ လႆႈ ႁူမ်ႈႁႅင်းၵၼ်သေ ၵေႃႇသၢင်ႈပဵၼ်မႃးယွင်ၼမ်ႉ ၼႆယူႇ။
ယွင်ၼမ်ႉၼၼ်ႉ ၼႃႈယၢဝ်းမီး(20)ထတ်း၊ ၼႃႈပွတ်းမီး(10)ထတ်းသေ တၢင်းသုင်မီး(6)ထတ်း ၼႆယူႇ။ လႆႈၸႂ်ႉတိုဝ်းႁႅင်းၾႆးသႅင်လႅတ်ႇ တိုတ်ႉဢဝ်ၼမ်ႉၼႂ်းထမ်ႈ မႃးၶင်ဝႆႉၼႂ်းယွင်သေ ပၼ်ႁႂ်ႈ ပေႃႈမႄႈၵူၼ်းမိူင်း ဢိၵ်ႇသင်ႇၶႃႇၸဝ်ႈၶဝ် ၸႂ်ႉတိုဝ်းၵႂႃႇယူႇ။
တီႈၵၢၼ်ၵေႃႇသၢင်ႈယွင်ၼမ်ႉလႄႈ တိုတ်ႉၼမ်ႉပၼ်ပေႃႈမႄႈၵူၼ်းမိူင်း တီႈဝၢၼ်ႈၼမ်ႉလပ်ႉၼၼ်ႉ လႆႈတေႇႁႅၵ်ႈႁဵတ်းမႃး ၼႂ်းလိူၼ်ဢွၵ်ႇတူဝ်ႇပႃႇ 4 ဝၼ်း ပီႊ 2020 ၼီႊ တေႃႇထိုင် လိူၼ်ဢွၵ်ႇတူဝ်ႇပႃႇ 11 ဝၼ်း ပီႊ 2020 ၼီႊ ၶၢဝ်းတၢင်းႁိုင်မွၵ်ႈ(8)ဝၼ်း ၸင်ႇယဝ်ႉတူဝ်ႈလီငၢမ်းၵႂႃႇယူႇ။
