October 11, 2020
By – SSPP/ SSA
ၼႂ်းလိူၼ်ဢွၵ်ႇတူဝ်ႇပႃႇ 9 ဝၼ်း ပီႊ 2020 ၼီႊၼၼ်ႉ ႁွင်ႈၵၢၼ်ၽၢႆႇၵေႃႇသၢင်ႈတွၼ်ႈလိၼ်ၶိုၼ်ႈယႂ်ႇ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) လႆႈၵေႃႇသၢင်ႈၽၢႆတႅၼ်ႈ ႁဵတ်း ယွင်ၶင်ၼမ်ႉပၼ် ပေႃႈမႄႈၵူၼ်းမိူင်း ၼႂ်းဢိူင်ႇၼမ်ႉလပ်ႉ ၸေႈဝဵင်းမၢႆ(7) တူင်ႇဝဵင်းတၢင်ႉယၢၼ်း ၵႂႃႇယူႇ။
ၼႂ်းၶၵ်ႉၵၢၼ်ၵေႃႇသၢင်ႈၽၢႆတႅၼ်ႈ ႁဵတ်းယွင်ၶင်ၼမ်ႉ တီႈထုင်ႉၼမ်ႉသၢမ်ႁူး ဝၢၼ်ႈမႅၵ်ႉမႄး ဢိူင်ႇ ၼမ်ႉလပ်ႉၼၼ်ႉ လႆႈၸႂ်ႉတိုဝ်းဢဵၼ်ႁႅင်း ၵႃးၸၢၵ်ႈၶုတ်းလိၼ် Wheel Loader (2)လမ်းလႄႈ ႁူမ်ႈ ပႃးဢဵၼ်ႁႅင်းပေႃႈမႄႈၵူၼ်းမိူင်း ၼႂ်းပိုၼ်ႉတီႈမွၵ်ႈ(30)ၵေႃႉသေ ဢွၼ်ၵၼ်တီႇၽဵဝ်ႈယုမ်းၼၢမ်၊ ၸုတ်ႇၽဝ်ၶႅမ်းမႆႉလႄႈ ၶုတ်းလိၼ်တေႃႉထွၵ်ႇ ၵေႃႇသၢင်ႈႁဵတ်းပဵၼ်ၽၢႆတႅၼ်ႈၶင်ၼမ်ႉ ၵႂႃႇယူႇ။
ၽၢႆတႅၼ်ႈၶင်ၼမ်ႉၼၼ်ႉ တၢင်းသုင်မီး(8)ထတ်း၊ ၼႃႈယၢဝ်းမီး(234)ထတ်းသေ ၶဝ်ႈပဵၼ်ၽၢႆတႅၼ်ႈ လိၼ် ဢၼ်တေၶင်ဢဝ် ၼမ်ႉသၢမ်ႁူး ႁဵတ်းပဵၼ်ၼွင်ၼမ်ႉ တႃႇပေႃႈမႄႈၵူၼ်းမိူင်းၼႂ်းပိုၼ်ႉတီႈၸႂ်ႉ တိုဝ်းလႄႈ ႁဵတ်းပဵၼ်ဢွင်ႈတီႈ တႃႇတူဝ်သတ်း မႃႉ၊လႃး၊ ဝူဝ်း၊ ၵႂၢႆး ယူႇမူၼ်ႈၵိုၵ်းၵၼ်တင်း သၽႃႇဝႃႉ ၼမ်ႉလိၼ်ႁိၼ်ၽႃ ၵႂႃႇယူႇ။
