September 28, 2020
By – SSPP/ SSA
ၼႂ်းလိူၼ်သႅပ်ႉတိမ်ႇပႃႇ 28 ဝၼ်း ပီႊ 2020 ၼီႊၼႆႉ ၽၢႆႇဢုပ်ႉပိူင်ႇပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်း ၸိုင်ႈတႆး(SSPP/ SSA) ၵႅမ်ၸေႈဝဵင်းမၢႆ(18)ၼမ်ႉတူႈ ၸိုဝ်ႈႁွင်ႉၸၢႆးလႃႉ ၸၼ်ႉသိုၵ်းၵႅမ်ၶုၼ်ႁၢၼ် လႆႈဢွၼ်ႁူဝ်ၵူၼ်းသိုၵ်း(10)ၵေႃႉ ႁူမ်ႈမိုဝ်းၵၼ်တင်းပေႃႈမႄႈၵူၼ်းမိူင်း ၼႂ်းဝၢၼ်ႈၼႃး(28)ၵေႃႉ ႁူမ်ႈႁႅင်းၵူၼ်းသိုၵ်းဢိၵ်ႇၵူၼ်းမိူင်း(38)ၵေႃႉသေ ၵေႃႇသၢင်ႈတဵင်ၽၢႆ ႁဵတ်းၼွင်ပႃ တႃႇပေႃႈမႄႈ ၵူၼ်းမိူင်း ၼႂ်းဝၢၼ်ႈၼႃး ဢိူင်ႇဝၢၼ်ႈသၢင်း ၸေႈဝဵင်းမၢႆ(18)ၼမ်ႉတူႈ ၸိုင်ႈတႆးပွတ်းႁွင်ႇၵႂႃႇယူႇ။
ၵၢၼ်ၵေႃႇသၢင်ႈတဵင်ၽၢႆ ႁဵတ်းၼွင်ပႃပၼ် ပေႃႈမႄႈၵူၼ်းမိူင်း ဝၢၼ်ႈၼႃး ဢိူင်ႇဝၢၼ်ႈသၢင်ႈၼႆႉ လႆႈတေႁဵတ်းသၢင်ႈမႃး ၼႂ်းလိူၼ်သႅပ်ႉတိမ်ႇပႃႇ 28 ဝၼ်းၼႆႉသေ ယူႇတီႈၽၢႆႇဢုပ်ႉပိူင်ႇ ပႃႇတီႇမႂ်ႇ သုင်ၸိုင်ႈတႆး၊ တပ်ႉသိုၵ်းၸိုင်ႈတႆး(SSPP/ SSA) တေသိုပ်ႇၶတ်းၸႂ်ႁဵတ်းၵၢၼ်ႁႂ်ႈယဝ်ႉတူဝ်ႈၵႂႃႇ ၼႆယူႇ။တေႇဢဝ်ၼႂ်းလုၵ်ႈလိူၼ်သႅပ်ႉတိမ်ႇပႃႇၵႂႃႇၼႆႉ ထိုင်ၶၢဝ်းယၢမ်းတူင်ႈၼႃးလႄႈ တိူၵ်ႇႁႆႈၸမ်ပွင်ႇ မၢၵ်ႇ ၶဝ်ႈတဝ်ႈၼမ်ႉၵေႃႈ ၸမ်တေသုၵ်းသႂ်သေ ပဵၼ်ၶၢဝ်းယၢမ်းဢၼ်ပႃႇတီႇမႂ်ႇသုင်ၸိုင်ႈတႆး၊ တပ်ႉသိုၵ်း ၸိုင်ႈတႆး(SSPP/ SSA) တေလႆႈႁၢပ်ႇမႃႇပႃးပၢၼ်ႈ ၸွႆႈထႅမ်ႁွပ်ႇၵူႈဢဝ်မၢၵ်ႇၶဝ်ႈတဝ်ႈၼမ်ႉပၼ် ပေႃႈမႄႈၵူၼ်းမိူင်း ၵႂႃႇယူႇ။
