ၶၢဝ်ႇ ၊ SSPP info
September 29, 2020
ၵူၼ်းၸၢႆးၵေႃႉၼိုင်ႈ ၼႂ်းတူင်ႇဝဵင်းမိူင်းယႆ သႅၼ်းဢႃႇယူႉ (40)ပၢႆ ဢူမ်ပၢၵ်ႇၵွင်ႈသတ်ႉယၢမ်းသေ ၶႃႈတူဝ်ၸဝ်ႈၵဝ်ႇတၢႆထင်တီႈၵႂႃႇၵမ်းလဵဝ် ၼႆယူႇၶႃႈ။
မိူဝ်ႈဝၼ်းတီႈ လိူၼ်ၸတဵမ်ႇပႃႇ 28 ဝၼ်း ၶၢဝ်းယၢမ်းၵၢင်ၼႂ် မွၵ်ႈ 07:00 မူင်းၼၼ်ႉ ၵေႃႉပဵၼ်လုင်းပၼ်ႇ ဢႃႇယူႉ (49)ပီႊ တီႈယူႇဝၢၼ်ႈၽႃသႅင် ၼႂ်းဢိူင်ႇမိူင်းၸိတ်ႇ တူင်ႇဝဵင်းမိူင်းယႆ လုၵ်ႉဢဝ်တီႈႁိူၼ်းမၼ်းၸၢႆးတီႈဝၢၼ်ႈၽႃသႅင် ပႃးဢဝ်မူၵ်ႇၵွင်ႈသတ်ႉယၢမ်းဢၼ်ၵဝ်ႇၼိုင်ႈလွတ်ႇ ဢၢၼ်းတေၵႂႃႇႁဵတ်းႁိူၼ်းၵွင်ႈသတ်ႉယၢမ်းဢၼ်မႂ်ႇ တီႈထဵင်ၼႃးမၼ်းၸၢႆးၼႆသေ ဢွၵ်ႇႁိူၼ်းၵႂႃႇ ၵွပ်ႈဢမ်ႇႁၼ်မႃးၵိၼ်ၶဝ်ႈၼႂ်/ၶဝ်ႈဝၼ်းၶိုၼ်းတီႈႁိူၼ်းလႄႈ ၵေႃႉပဵၼ်လုၵ်ႈၸၢႆးမၼ်း ၸၢႆးသၢႆလိူၼ် ၸင်ႇၵႂႃႇၸွမ်းၶႆႈႁႃသေ ၶၢဝ်းယၢမ်းဝၢႆးဝၼ်းမွၵ်ႈ (03:00)မူင်းၼၼ်ႉ ၵႂႃႇထူပ်းႁၼ်တူဝ်တၢႆလုင်းပၼ်ႇ ပဵၼ်ၽၢင်ႁၢင်ႈဢူမ်ပၢၵ်ႇၵွင်ႈသတ်ႉယၢမ်းသေ ယိုဝ်းတူဝ်တၢႆၶိုၼ်း မၢၵ်ႇၵွင်ႈပွင်ႇၵႂႃႇၵွင်ႇၵေႃႈၽၢႆႇလင် သေ တၢႆထင်တီႈယူႇ ၽၢႆႇၸဵင်ႇၸၢၼ်းဝၼ်းတူၵ်းဝၢၼ်ႈၽႃသႅင် ယၢၼ်ၵႆဝၢၼ်ႈယူႇမွၵ်ႈ (4) ၽႃႇလူင်ႇၼၼ်ႉ ၼႆယူႇယဝ်ႉ။ ၸၢႆးသၢႆလိူၼ်ၵေႃႉပဵၼ်လုၵ်ႈၸၢႆးလုင်းပၼ်ႇလၢတ်ႈဝႃႈ “ ဢူႈႁဝ်းဢွၵ်ႇႁိူၼ်းၵႂႃႇ ၸဵမ်ၸဝ်ႉၶႃႈဢေႃႈမိူဝ်ႈၼႆႉ ၊ ၶဝ်ႈၼႂ်ၵေႃႈတမ်ႉပႆႇလႆႈၵိၼ်ၵွၼ်ႇၶႃႈ၊ မၼ်းဢဝ်မူၵ်ႇၵွင်ႈယၢမ်း ဢၼ်ၵဝ်ႇမၼ်းသေ မၼ်းဝႃႈတေၵႂႃႇလႅၵ်ႈပႅတ်ႈႁိူၼ်းၵွင်ႈမႂ်ႇ တီႈထဵင်ၼႃး ၼႆၶႃႈဢေႃႈ ၊ ၶဝ်ႈၼႂ်ၵေႃႈဢမ်ႇႁၼ်မႃးၵိၼ် ၊ တေႃႇထိုင်ၵၢင်ဝၼ်းၵေႃႈဢမ်ႇႁၼ်ပွၵ်ႈမႃးၶိုၼ်းလႄႈ ၶႃႈလႆႈၵႂႃႇႁႃၶႆႈ ဢူႈႁဝ်းၶႃႈဢေႃႈ ၊ ၽိူဝ်ႇၶႃႈၵႂႃႇတၢင်းၼႃးၵေႃႈ ၵႂႃႇႁၼ်ဢူႈႁဝ်းပေႃးပဵၼ်တူဝ်တၢႆ ဢွၵ်ႇလိူတ်ႈဢွၵ်ႇယၢင် ဝႆႉ ၼၼ်ႉၶႃႈယဝ်ႈ ၊ ၶႃႈၵေႃႈလႆႈၶိုၼ်းမိူဝ်းလၢတ်ႈၵူၼ်းလူင်ၼႂ်းဝၢၼ်ႈသေ မိူဝ်ႈလဵဝ်တေႉ ႁဝ်းၶႃႈဢွၼ်ၵၼ်လုမ်းလႃးၶၢပ်ႈတူဝ်ဢူႈႁဝ်းယဝ်ႉတူဝ်ႈၵႂႃႇယဝ်ႉၶႃႈ “ ၼႆယူႇ။
လုင်းပၼ်ႇၼႆႉ တေႇၼႃႈႁိူၼ်းၸွမ်း ပႃႈမူၺ်း တီႈယူႇဝၢၼ်ႈၽႃသႅင် မီးလုၵ်ႈႁူမ်ႈၵၼ် (6) ၵေႃႉ ၊ ၵူၼ်းၸၢႆး (2) ၵေႃႉ ၊ ၵူၼ်းယိင်း (4)ၵေႃႉ သေ ၸဵမ်မိူဝ်ႈဢွၼ်တၢင်း ပႆႇပဵၼ်လွင်ႈႁႅမ်တူဝ်တၢႆၼႆႉ ၵဵဝ်ႇၵပ်း လူၺ်ႈၵၢၼ်ၼႃႈႁိူၼ်း လႄႈသင် ၵူၼ်းၼႂ်းၼႃႈႁိူၼ်းၸိူဝ်းၼႆႉၵေႃႈ ဢမ်ႇလႆႈမီးပၼ်ႁႃလွင်ႈသင်ၵၼ် ဝႃႈၼႆယူႇၶႃႈ။
