ၶၢဝ်ႇ-sspp info
September 6, 2020
ၵူၼ်းၼုမ်ႇၸၢႆးၼႂ်းထုင်ႉႁၢင်ၼႃး တူင်ႇဝဵင်းလႃႈသဵဝ်ႈ ၵေႃႉၼိုင်ႈ သႅၼ်းဢႃႇယူႉမွၵ်ႈ 35 ပီ ၵိၼ်လဝ်ႈမဝ်းႁႅင်းသေ ထိုင်တီႈဢဝ်လႅဝ်းတႅင်းတူဝ်ၸဝ်ႈၵဝ်ႇၶိုၼ်းၼႆယူႇ။
ဝၼ်းတီႈ 6 ဝၼ်း လိူၼ်ၸတိၼ်ႇပႃႇ ၶၢဝ်းယၢမ်းၵၢင်ၼႂ်မွၵ်ႈ 02 : 00 မူင်းၼၼ်ႉ ၸိုဝ်ႈသဵင် ၸၢႆးၵျေႃႇဢေး တီႈယူႇ ဝၢၼ်ႈႁိူၼ်းလွၼ်ႉ ၊ ၼႂ်းဢိူင်ႇႁၢင်ၼႃး ၊ တူင်ႇဝဵင်းလႃႈသဵဝ်ႈ ၼႆႉ ယွၼ်ႉၵိၼ်လဝ်ႈမဝ်းႁႅင်းလႄႈဢွၵ်ႇလူမ်းယွင်ႇယၢင်ႇသေ ဢဝ်လႅဝ်းႁၢမ်းငၢႆး ဢၼ်ယၢဝ်း တႅင်းသႂ်ႇတူဝ်ၸဝ်ႈၵဝ်ႇ ၽွင်းယၢမ်းၵၢင်ၶိုၼ်း တီႈႁိူၼ်းမၼ်းၸၢႆးၼၼ်ႉ တႅင်းတိူဝ်ႉၺႃး တီႈလွၵ်းႁူဝ်ၸႂ် ၽၢႆႇၼိူဝ်ပုမ် မၼ်းၸၢႆးၼိုင်ႈၵမ်း တၢင်းလိုၵ်ႉၶဝ်ႈယူႇ မွၵ်ႈ 3 ၼိဝ်ႉပၢႆပၢႆ သေ လႆႈတၢင်းၸဵပ်းမၢတ်ႇႁၢဝ်ႉႁႅင်း ထိုင်တီႈဢမ်ႇတူင်ႉတူဝ်လႆႈ ၼႆယူႇ ၊ ၵဵဝ်ႇလူၺ်ႈလွင်ႈၼႆႉသေ လုင်းသူႉလိင်ႇ (ၵေႃႉပဵၼ်ဢူႈ) လၢတ်ႈၼေဝႃႈ “ မီးမႃး 4 ဝၼ်းၸိူဝ်းၼႆႉယဝ်ႉၶႃႈ ႁဝ်းတူၺ်းမၼ်း ၸႂ်မၼ်းဢမ်ႇပုင်ႇမၢၼ်ႇၶႃႈ ၊ ပိူင်ၼိုင်ႈၵေႃႈမိူဝ်ႈဢွၼ်တၢင်းသမ်ႉမီးလူမ်းယွင်ႇဝႆႉၶႃႈဢေႃႈ ၊ လူမ်းယွင်ႇမၼ်းၼၼ်ႉ ပဵၼ်ၵၢင်ၶိုၼ်းၵူၺ်း ၵၢင်ဝၼ်းတေႉဢမ်ႇပဵၼ်သင် ၊ မိူဝ်ႈမၼ်းတႅင်းတူဝ်မၼ်းၼၼ်ႉ ယွၼ်ႉပဵၼ်ၵၢင်ၶိုၼ်းလႄႈ ႁဵတ်းႁိုဝ်သေတႅင်းၼၼ်ႉတေႉ ဢမ်ႇမီးၽႂ်ႁၼ်သေၵေႃႉၶႃႈ ၊ ႁဝ်းငိၼ်းသဵင်ၵူၼ်းမေႃးသေ မေးမၼ်းမႃးလၢတ်ႈလႄႈ ႁဝ်းၵႂႃႇတူၺ်းၵေႃႈပေႃးပဵၼ်လိူတ်ႈ ပဵၼ်ယၢင်ဝႆႉယူႇယဝ်ႉၶႃႈ၊ မၼ်းသမ်ႉၵႆႉၵိၼ်ၶဝ်ႈၼမ်ဝႆႉၶႃႈဢေႃႈ ၸႂ်မၼ်းၵေႃႈမီးလူမ်းယွင်ႇသေ လွင်ႈၼႆႉပဵၼ်လွင်ႈသင်လီလီ ဢမ်ႇႁူႉယဝ်ႉၶႃႈ ၊ ႁဝ်းၶႃႈတေႉထၢင်ႇမၼ်းၵႂႃႇၽိတ်းၽီမႆႉႁႆး သေ ၽီၶဝ်ႈတူဝ်မၼ်းၼႆၵွၼ်ႇၶႃႈဢေႃႈ၊ မိူဝ်ႈလဵဝ်တေႉႁဝ်းၶႃႈ ၵႂႃႇမွၵ်ႇမေႃယႃၼႂ်းဝၢၼ်ႈ မႃးသမ်းၶဵမ်ပၼ်ဝႆႉသေ ပေႃးမေႃယႃတီႈဝၢၼ်ႈႁဝ်းဝႃႈ ထုၵ်ႇလီဢဝ်ၵႂႃႇႁူင်း ယႃၼႆၵေႃႈ တေဢဝ်ၵႂႃႇယူႇၶႃႈ ‘’ ဝႃႈၼင်ၼႆ။
ၸၢႆးၵျေႃႇဢေးၼႆႉ တေႇၼႃႈႁိူၼ်းၸွမ်း ၼၢင်းၵမ်ႇ တီႈယူႇဝၢၼ်ႈၶၢႆး သေ မီးလုၵ်ႈယိင်းၼိုင်ႈၵေႃႉ လုၵ်ႈၸၢႆးၼိုင်ႈၵေႃႉ ၊တေႇၼႃႈႁိူၼ်းယဝ်ႉလူင်းယူႇႁိူၼ်းႁင်းၵွႆး ၊ပူၼ်ႉမႃး ၼႂ်းပၢတ်ႈ 4 လိူၼ်ပီႊ2020ၼီႊၼႆႉ မၼ်းၸၢႆး ယၢမ်ႈဢွၵ်ႇလူမ်းယွင်ႇ ႁူဝ်ၸႂ်ဢမ်ႇပုင်ႇမၢၼ်ႇၸိူင်ႉၼႆ ပွၵ်ႈၼိုင်ႈလႄႈ ထိုင်တီႈ ဢူႈမႄႈပီႈၼွင်ႉ ၼၢင်းမေး လႆႈဢဝ်ၵႂႃႇယူတ်းယႃလႄႈ လႆႈၸိုၼ်ႈၶႅၼ်းမႃး ၸိူဝ်းၼႆႉၵေႃႈမီးမႃး ယူႇဝႃႈၼႆ။
