ၶၢဝ်ႇ – SSPP Info
ဝၼ်းထီႉ – 07.09.2020
မိူဝ်ႈဝႃး ဝၼ်းထီႉ(6) လိူၼ် သတိၼ်ႇပႃႇ ယၢမ်းၵၢင်ၶမ်ႈ 10:00 ၼႆႉ ၵူၼ်းဝၢၼ်ႈလူင်လဵၵ်း ထူပ်းႁၼ် ၵူၼ်းၸၢႆး (ဢမ်ႇႁူႉၸိုဝ်ႈ) ၵေႃႉၼိုင်ႈ ဢၼ်မၢတ်ႇၸဵပ်းႁၢဝ်ႈႁႅင်း ၼႂ်းၵေႈၵၢင်ဝၢၼ်ႈလူင်လဵၵ်း လႄႈ ဝၢၼ်ႈလွႆငိုၼ်းသေ ၵႂႃႇလၢတ်ႈ တီႈလုမ်းပရိၵ်ႈ တၢင်ႉယၢၼ်း၊ ၽၢႆႇၵႅတ်ႇၶေၾႆး ဝဵင်းတၢင်ႉယၢၼ်း ၶိုၼ်း ဢဝ် ၵႃးတၢင်ႇၵူၼ်းပဵၼ်သေ မႃးသူင်ႇဝႆႉ တီႈႁူင်းယႃတၢင်ႉယၢၼ်း ဝႃႈၼႆ။
ၽူႈမီးပုၼ်ႈၽွၼ်း ၽၢႆႇၶေၾႆး ဝဵင်းတၢင်ႉယၢၼ်း ဢူးၸူဝ်းမူဝ်းၼၢႆႇ လၢတ်ႈဝႃႈ “ ၵူၼ်းၵေႃႉၼႆႉ မၢတ်ႇၸဵပ်းႁၢဝ်ႈႁႅင်း ၼႃႇ၊ ႁၢၼ်ႉတေႃႇၵၢင်ၼႂ်မိူဝ်ႈၼႆႉ ယင်းပႆႇႁူႉတူဝ်၊ ပႆႇၸၢင်ႈထၢမ်သင်၊ မိူဝ်ႈႁဝ်းၶႃႈ ဢဝ်ၵႃးၵႂႃႇတၢင်ႇတႄႉၵေႃႈ ႁိမ်းၶၢင်ႈတူဝ်မၼ်းၼၼ်ႉ ႁၼ်ပႃးထူင်ၶူဝ်းသေ ၼႂ်းထူင်မၼ်းၵေႃႈ မိူၼ်ႁၢင်ႈ သွၵ်ႈတဝ်ဝႆႉ ယုင်ႈယၢင်ႈမူတ်း၊ မၢႆၾၢင်လႄႈငိုၼ်းမၼ်း ဢိၵ်ႇၾူၼ်းတင်းလူတ်ႉၶိူင်ႈ မၼ်းၵေႃႈ ဢမ်ႇႁၼ်ၺႃးသေမျဵဝ်း ၊ ၺႃး သေၵေႃႉၵေႃႉၸူၼ်ႁိမ်ဢဝ်ႁႃႉ၊ ပဵၼ်ယွၼ်ႉယၢမ်ႈဝႆႉၸႂ်တီႈၵၼ်သေပေႃႉႁႅမ် ႁိုဝ်ၵေႃႈ ပႆႇၸၢင်ႈလၢတ်ႈ ” ဝႃႈၼႆ။
မိူဝ်ႈဝႃး ဝၼ်းထီႉ 06.09.2020 ၼၼ်ႉၵေႃႈ ၵူၼ်းသွင်ၵေႃႉၽူဝ်မေး ထုၵ်ႇၺႃးၽႃႉၽၼ်း တီႈဝၢၼ်ႈၶူး ဢိူင်ႇ ၼွင်ၽႃ ၸေႈဝဵင်းတၢင်ႉယၢၼ်း ဝႃႈၼႆ၊ ၼႂ်းသွင်ၵေႃႉ ၽူဝ်မေးၼၼ်ႉ ၵေႃႉပဵၼ်ၽူဝ်တႄႉ ၺႃးၽၼ်းတီႈ ႁူဝ်မႃႇသေ ၶႅၼ်ပုတ်းၵႂႃႇ ၵေႃႉပဵၼ်မေးသမ်ႉ ၺႃးၸဵပ်းမၢတ်ႇၸွမ်းၶႅၼ်ၽွင်ႈ ၸွမ်းၼႃႈဢူၵ်းၽွင်ႈ (ဢမ်ႇ လႆႈမႆႈၸႂ်) ၼႆ၊ ၵေႃႉထုၵ်ႇၺႃးၽၼ်းၼႆႉ ပဵၼ်ဢၢႆႈဢုင်ႇ+ဢေးၼုမ်ႇ၊ ၵေႃႉၽၼ်းသမ်ႉပဵၼ် သၢင်ႇထုၼ်း ပဵၼ်ၵူၼ်းဝၢၼ်ႈလဵဝ်ၵၼ်သေဢမ်ႇၵႃး သၢင်ႇထုၼ်းၼႆႉ သမ်ႉပဵၼ်ထႅင်ႈ ၸိူဝ်ႉၶိူဝ်းပီႈၼွင်ႉ ဢေးၼုမ်ႇ ၶဝ် ထႅင်ႈၵွၼ်ႇ လႆႈႁူႉၸွမ်းၼင်ႇၼႆ။
ၼႂ်းလိူၼ်ၼႆႉၵူၺ်းၼင်ႇၵဝ်ႇ မိူဝ်ႈဝၼ်းထီႉ 02.09.2020 (ဝၼ်းလိူၼ်ၵဝ်ႈမူၼ်း)ၼၼ်ႉၵေႃႈ လုၵ်ႈဢွၼ်ႇ ၸၢႆး ၼႂ်းဝဵင်းတၢင်ႉယၢၼ်း ပဵၼ်ၽုင်ပဵၼ်ၵေ ၽိတ်းမေႃးပေႃႉႁႅမ်ၵၼ် ၸွမ်းၽင်ႇၼွင် ၶုၼ်သႃႇ(ၼွင်သွင် လုၵ်ႈ)သေ ထိုင်တီႈ ႁူဝ်ပဝ်ႈပွၵ်ႉ ဢိၵ်ႇတင်း ၽၢႆႇပရိၵ်ႈၶဝ် ပေႃးလႆႈမႃးထိင်း ၼႆယူႇယဝ်ႉ။