ၶၢဝ်ႇ- SSPP Info
ဝၼ်းထီႉ 14.09.2020
ဢိင်ၼိူဝ်ၵူၼ်းတိတ်းၸပ်းတၢင်းပဵၼ် ၼႂ်းမိူင်းႁူမ်ႈတုမ်မိူင်းမၢၼ်ႈ တိူဝ်းလိူဝ်ၶိုၼ်ႈႁႅင်းမႃးၵူႈမိုဝ်ႉၵူႈဝၼ်း သေ ယူႇတီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး၊တပ်ႉသိုၵ်းၸိုင်ႈတႆး တိူဝ်းၶိုၼ်ႈၵေး ၵူတ်ႇထတ်း ၵူၼ်းၶဝ်ႈ ၵူၼ်းဢွၵ်ႇ ငဝ်ႈငုၼ်းဝၢၼ်ႈႁႆး၊ တႅၵ်ႈပႃးလူမ်ႈမႆႈ၊ၸႂ်ႉသုၵ်ႈမိုဝ်း၊ သိတ်းပႃးၸဵမ်ၵႃးၸဵမ်ၵူၼ်း၊ ဢဝ်ပႃးၸိုဝ်ႈ၊ တီႈယူႇ၊ လုၵ်ႉလႂ်မႃး၊ မႃးႁဵတ်းသင်ၸိူဝ်းၼႆႉ ၸွမ်းတၢင်းၶဝ်ႈ/ဢွၵ်ႇငဝ်ႈငုၼ်းဝၢၼ်ႈႁႆးၵူႈသဵၼ်ႈ၊ သင်ဝႃႈ ဢမ်ႇၸႂ်ႈၵူၼ်း ၼႂ်းပိုၼ်ႉတီႈ ဢမ်ႇမီးသုၼ်ႇလႆႈ မႃးလိုဝ်ႈယင်ႉ၊ ၼင်ႈၵိၼ်တၢင်းၵိၼ် ၼႂ်းဝၢၼ်ႈႁႆး၊ လတ်း ၽၢၼ်ႇၵႂႃႇမႃးတႄႉ ၵေႃႈ လႆႈယူႇ ၵူၺ်းတေလႆႈတိုဝ်းၵမ်ႁဵတ်းၸွမ်း ပိူင်ၵၢၼ်ႁေႉၵင်ႈ တၢင်းပဵၼ်ၶူဝ်းဝိတ်ႉ-19 ၶွင်ပႃႇတီႇမႂ်ႇသုင်ၸိုင်ႈတႆး၊တပ်ႉသိုၵ်းၸိုင်ႈတႆး ၼႆ။
လိူဝ်သေၼၼ်ႉ ၽၢႆႇဢုပ်ႉပိူင်ႇ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆးSSPP/SSA လႆႈဢွၵ်ႇလိၵ်ႈ ပိူင် ၶေႃႈတိုဝ်းၵမ် ပေႃႈမႄႈၵူၼ်းမိူင်း ၼႂ်းၼႃႈတီႈ ဢုပ်ႉပိူင်ႇပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးၵႂႃႇ ပိူင်ၶေႃႈတိုဝ်းၵမ်(9)ၶေႃႈ၊ ၼႂ်းၸိူဝ်းၼၼ်ႉ တေဢမ်ႇလႆႈႁဵတ်းပွႆးလၢမ်း၊ သႅင်ႇၵိၼ်ယမ်ႉတၢင်းသဵင်ႈ ဢမ်ႇမီး သုၼ်ႇလႆႈၼင်ႈၵိၼ် (တေလႆႈၸွၵ်း ၵႂႃႇဢဝ်)၊ ပေႃးဢွၵ်ႇတင်းၼွၵ်ႈႁိူၼ်း တေလႆႈတၢပ်ႈ ၽႅၼ်ႇတူမ်းသူမ်း (Mask)ၸၵႂႃႇၸိူဝ်းၼႆႉ သေ သင်ဝႃႈၽူႈလႂ်ၵေႃႉလႂ် ဢမ်ႇ ႁဵတ်းၸွမ်းၸိုင် တေလႆႈၶၢမ်ႇတၢင်းဢဝ်လိူင်ႈ ၸိူဝ်းၼႆႉယူႇယဝ်ႉ။
မိူဝ်ႈလဵဝ် ၼႂ်းမိူင်းႁူမ်ႈတုမ်မိူင်းမၢၼ်ႈ ၵူၼ်းတိတ်းၸပ်းတၢင်းပဵၼ် ၶူဝ်းဝိတ်ႉ-19ၼႆႉ မီး(3015)သေ ၵူၼ်း တၢႆယွၼ်ႉတၢင်းပဵၼ်မီး(24)ၵေႃႉ၊ ၵူၼ်းၸိုၼ်ႈၶႅၼ်းသေ လႆႈလူင်းႁူင်းယႃ(699)ၵေႃႉသေ ယူႇတီႈ ပႃႇတီႇမႂ်ႇ သုင်ၸိုင်ႈတႆး တပ်ႉသိုၵ်းၸိုင်ႈတႆး ၶႂ်ႈပၼ်ၾၢင်ႉထိုင်ပေႃႈမႄႈၵူၼ်းမိူင်း ၼႂ်းပိုၼ်ႉတီႈတင်းသဵင်ႈ ယႃႇယူႇ မဝ်ၵိၼ်မၢင်၊ ႁႂ်ႈႁဵတ်းၸွမ်းတိုဝ်းၵမ်ၸွမ်း ဢၼ်မေႃယႃၶဝ် ၼႄဝႆႉၵၢၼ်ႁေႉၵင်ႈတၢင်းပဵၼ်၊ မိူင်းႁဝ်းၼႆႉ ပႆႇမီးၶိူင်ႈယႃဢီႈယႃသင် လိူဝ်သေ ႁေႉၵင်ႈယႃႇႁႂ်ႈတၢင်းပဵၼ်ၶဝ်ႈမႃးၽေႈတိုၼ်း ၼႂ်းမိူင်းႁဝ်းဝႃႈၼႆ။
