ၶၢဝ်ႇ-ၸၢႆးၶုၼ်
ဝၼ်းထီႉ- 08-08-2020
ၵေႃႉသိုၵ်းၵေႃႉႁၢၼ်ၽၢႆႇတပ်ႉၽၢႆႇဢုပ်ႉပိူင်ႇ SSPP/SSA ဢၼ်တူင်ႉၼိုင်ၼႂ်းၸေႈဝဵင်း သႅၼ်ဝီ တၢင်းၸေႈဝဵင်းမိူင်းယႆ ၸွႆႈထႅမ်ပေႃႈမႄႈၵူၼ်းမိူင်း ထူၺ်ႈၵႃႈသွမ်ႈၶဝ်ႈၼႃး ဝႃႈၼႆ။
မိူဝ်ႈဝၼ်းထီႉ 06-08-2020 ၼၼ်ႉၵေႃႉသိုၵ်းၵေႃႉႁၢၼ် ၽၢႆႇတပ်ႉၽၢႆႇဢုပ်ႉပိူင်ႇ SSPP/SSA ဢၼ်တူင်ႉၼိုင်တၢင်း ၸေႈဝဵင်းသႅၼ်ဝီၼၼ်ႉ ႁူမ်ႈႁႅင်းသိုၵ်း (13) ၵေႃႉ လႆႈၵႂႃႇၸွႆႈထႅမ်ပေႃႈမႄႈၵူၼ်းမိူင်း ထူၺ်ႈၵႃႈသွမ်ႈၶဝ်ႈၼႃး တီႈဝၢၼ်ႈ ၶွၵ်ႈၵႂၢႆး ဢိူင်ႇမိူင်းပႃး ၸေႈဝဵင်းသႅၼ်ဝီ ၊ ထႅင်ႈၽၢႆႇၼိုင်ႈၵေႃႈ ၵေႃႉသိုၵ်းၵေႃႉႁၢၼ် SSPP/SSA ဢၼ်တူင်ႉၼိုင်တၢင်း လိၼ်ၸၢပ်ႈၸေႈဝဵင်းသီႇပေႃႉ လႄႈ ၸေႈဝဵင်းမိူင်းယႆၼၼ်ႉၵေႃႈ ႁူမ်ႈႁႅင်းသိုၵ်း (5) ၵေႃႉသေ လႆႈၵႂႃႇၸွႆႈထႅမ်ပေႃႈမႄႈ ၵူၼ်းမိူင်း ထူၺ်ႈၵႃႈ သွမ်ႈၶဝ်ႈၼႃး တီႈဝၢၼ်ႈၼႃးလၢၼ်ႇ ဢိူင်ႇပႃႇၵၢင်း ၸေႈဝဵင်းမိူင်းယႆ ဝႃႈၼႆ။
ၵဵဝ်ႇလူၺ်ႈၵၢၼ်ၸွႆႈထႅမ်ပေႃႈမႄႈၵူၼ်းမိူင်း ၼႆႉယူႇတီႈ ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး တိုၼ်းမီးၽႅၼ် ၵၢၼ်တမ်းဝၢင်း ႁဵတ်းသၢင်ႈၵႂႃႇ ၵူႈၼႃႈတီႈ သေ ယူႇတီႈငဝ်းလၢႆးပၼ် လႄႈ ၵႃႈၼင်ႇပွင်ပဵၼ်လႆႈၼၼ်ႉ တေႁူမ်ႈမိုဝ်း တၢင်းပေႃႈမႄႈၵူၼ်းမိူင်း သိုပ်ႇၶၢတ်းၸႂ်ၵႂႃႇတၢင်းၼႃႈထႅင်ႈဝႃႈၼႆ။
