ၶၢဝ်ႇ – ssppssa
August 26, 2020
ၵူၼ်းၼုမ်ႇၸၢႆးသွင်ၵေႃႉ သႅၼ်းဢႃႇယူႉ 30 ပၢႆ ၊ ၼႂ်းထုင်ႉၼမ်ႉမႃႉ မွၵ်ႇတွင်း ၼႂ်းတူင်ႇဝဵင်းသီႇပေႃႉ ထဵင်မေႃးၵၼ်သေ ထိုင်တီႈလႆႈဢဝ်ၾႆးၸုတ်ႇၽဝ်ႁိူၼ်းၵၼ် ၼႆယူႇယဝ်ႉ။
ဝၼ်းတီႈ 26 ဝၼ်းလိူၼ်ဢေႃးၵၢတ်ႉ ၶၢဝ်းယၢမ်းၵၢင်ၼႂ် မွၵ်ႈ 11:30 ၼၼ်ႉ ၵူၼ်းၸၢႆးသွင်ၵေႃႉ ၸိုဝ်ႈသဵင်ၸၢႆးၵျေႃႇ လႄႈ ၸၢႆးပုၼ်ႉ တီႈယူႇဝၢၼ်ႈလူင် ၼမ်ႉမႃႉ ၊ ဢိူင်ႇၼႃးၼိဝ်ႉ ၵႂႃႇၽၼ်းမႆႉ တႃႇႁဵတ်းၽၵ်းတူၵျွင်းမူႇၵျႃဝ်ႇသေ ထဵင်မေႃးၵၼ် မိူဝ်ႈၽွင်းၶိုၼ်းပွၵ်ႈမႃးထိုင်တီႈၵျွင်းမူႇၵျူဝ်ႇ ၼၼ်ႉၼႆယူႇ။ ၵဵဝ်ႇလူၺ်ႈလွင်ႈၼႆႉသေ ၸၢႆးပုၼ်ႉ (ၵေႃႉထုၵ်ႇၺႃးၾႆးၸုတ်ႇၽဝ်ႁိူၼ်း) လၢတ်ႈဝႃႈ
“ ဢၼ်ၵႂႃႇၽၼ်းမႆႉၵျွင်းၼႆႉ မီးႁဝ်းသၢမ်ႁိူၼ်းၶႃႈဢေႃႈ ၊ ၶႃႈဝႃႈႁင်းမၼ်း မႂ်းလႃႈလီၽၼ်းမႆႉမႃး ၵူဝ်ဢမ်ႇၸႂ်ႉလႆႈ ၵူဝ်ပူႇၵေႇဢမ်ႇလွတ်ႈလႃႇႁႃး ၶႃႈဝႃႈၼႆ ႁင်းမၼ်းၶႃႈဢေႃႈ ၊ မၼ်းသမ်ႉမႃးပၢၼ်း ၽိတ်းၶႃႈဢွၼ်ႈတၢင်းသေ ဢဝ်လၢင်ႉၵၢင်ႉလမ်းၶႃႈ ၊ မၼ်းဢၢပ်ႈမဝ်းလဝ်ႈဝႆႉလႄႈ ၶႃႈၵေႃႈၵူဝ်သေ လႅၼ်ႈမိူဝ်းပႅပ်ႉၼႂ်းသွင်ႇၾႆးပီႈၼၢင်းႁဝ်းၶဝ်ၶႃႈဢေႃႈ ၊ မၼ်းမိူဝ်းဢဝ်တႃမိုဝ်းထုပ်ႉသႂ်ႇႁူဝ်ၶႃႈ ၵမ်းၼိုင်ႈ ပေႃးႁႃႇဢွၵ်ႇလိူတ်ႈ ဝႆႉၶႃႈဢေႃး ၊ ပေႃးမၼ်းထုပ်ႉၶႃႈသေဢွၵ်ႇၵႂႃႇထၢၼ်ႇထၢၼ်ႇၵေႃႈ လုင်းမႃႇလႃႇ လႅၼ်ႈမႃးလၢတ်ႈဝႃႈ ၾႆးမႆႈႁိူၼ်းၶႃႈၼႆၶႃႈဢေႃႈ “ ဝႃႈၼႆယူႇ ။ ႁိူၼ်းၸၢႆးပုၼ်ႉ ဢၼ်ထုၵ်ႇဢဝ်ၾႆးၸုတ်ႇၽဝ်ၼၼ်ႉ ပဵၼ်ႁိူၼ်း ၽၢၵ်ႈမုင်းၶႃး ၊ ႁိူၼ်းတိၼ်တႅမ် ယွၼ်ႉၶေႇၾႆးလႆႈၶိုတ်းတၼ်းလႄႈ ၶူဝ်းၼႂ်းႁိူၼ်းတေႉဢမ်ႇလူႇသုမ်းသင် ၾႆးမႆႈၶႃႈမုင်းဝႆႉၼိူဝ် ၸွမ်ႁိူၼ်း ၶိုင်ႈၼိုင်ႈၼႆယူႇၶႃႈ။
ၸၢႆးၵျေႃႇၼႆႉ မိူဝ်ႈဢွၼ်တၢင်းပဵၼ်ၵူၼ်းယူႇတၢင်း ထုင်ႉၼမ်ႉပွင်ႈ ၵုင်းပဝ်း ၼႃးၶူၵ်ႉ ၼႆႉသေ ၶၢႆႉမႃးယူႇ တီႈဝၢၼ်ႈလူင် ၼႂ်းပီ 2020 မွၵ်ႈႁၢင်လိူၼ် January ၼၼ်ႉၵူၺ်း ထိုင်တီႈလႆႈပဵၼ်ပၼ်ႁႃ လွင်ႈၼႆႉ လႄႈ မိူဝ်ႈလဵဝ်ယူႇတီႈၸဝ်ႈၼႃႈတီႈၽူႈမီးပုၼ်ႈၽွၼ်းၶဝ် ဢဝ်လိူင်ႈၵၢၼ် ၵုမ်းၶင်ဝႆႉ ၸွမ်းၼင်ႇ တၢင်းၽိတ်းမီးၼၼ်ႉ ၼႆယူႇၶႃႈ။
