ၶၢဝ်ႇ-ၸၢႆးၶုၼ်
ဝၼ်းထီႉ-12-08-2020
ယူႇတီႈႁွင်ႈၵၢၼ် ႁူင်းႁဵၼ်းၼေႃႇတႅၼ်းၶိူဝ်း ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆးတပ်ႉသိုၵ်းၸိုင်ႈတႆး ဢွၼ်ႁူဝ်သေ ၸတ်းႁဵတ်း ပၢင်လဵၼ်ႈႁႅင်း တီႈငဝ်ႈငုၼ်း ဝၢၼ်ႈႁႆး တႃႇႁႂ်ႈပဵၼ်မၢႆတွင်းဝၼ်းၵိူတ်ႇ ပႃႇတီႇမႂ်ႇသုင်ၸိုင်ႈတႆး ၶူပ်ႇၶွပ်ႈ (49) ပီႊဝႃႈၼႆ။
ပၢင်လဵၼ်ႈႁႅင်း တႃႇႁႂ်ႈပဵၼ်မၢႆတွင်း ဝၼ်းၵိူတ်ႇပႃႇတီႇမႂ်ႇသုင်ၸိုင်ႈတႆး ၶူပ်ႇၶွပ်ႈ (49 ) ပီႊၼႆႉ တေႇၸတ်းႁဵတ်း ၵႂႃႇ မိူဝ်ႈဝၼ်းထီႉ 11-08-2020 တေႃႇထိုင် ဝၼ်းထီႉ 16-08-2020 ၶၢဝ်းတၢင်း ( 6 ) ဝၼ်း တေမီးပၢင်ၶေႉၶဵင်ႇ လဵၼ်ႈႁႅင်း ပိတ်ႉမၢၵ်ႇၼင်လွမ်ႈ ၊ ဝႅၼ်သုင် ၊ ပိတ်ႉမၢၵ်ႇသွင်းဝၢႆ လႄႈ ၶေႉၶဵင်ႇလႅၼ်ႈဝႆး ၸိူဝ်းၼႆႉ ၊ ၸုမ်းလုၵ်ႈႁဵၼ်း ၼေႃႇတႅၼ်းၶိူဝ်း ၊ လုၵ်ႈႁဵၼ်း ႁူင်းႁဵၼ်းသိုၵ်း ၊ လုၵ်ႈႁဵၼ်း HRD ၶဝ်တေၶဝ်ႈၶေႉၶဵင်ႇ လဵၼ်ႈႁႅင်းၸွမ်းၵၼ်ၵႂႃႇ။ ၸွမ်သိုၵ်း ၶိၼ်ႇမိၼ်ႇ ၽူႈပွင်ၵၢၼ်သိုၵ်း SSPP/SSA တင်း ၽူႈယႂ်ႇၵူၼ်းလူင် ၸုမ်းပွင်ၵၢၼ်ပၢင်လဵၼ်ႈႁႅင်း ထႅင်ႈ လၢႆလၢႆၸဝ်ႈ ၶဝ်ႈႁူမ်ႈပၼ်ႁႅင်းၸွမ်းတင်းၼမ် ဝႃႈၼႆ။
ၸဝ်ႈႁၢၼ် ၽူင်းႁၢၼ်- မွၵ်ႇလၢတ်ႈၶေႃႈၵႂၢမ်း ၵဵဝ်ႇလူၺ်ႈ ဝၼ်းၵိူတ်ႇပႃႇ တီႇမႂ်ႇသုင်ၸိုင်ႈတႆးသေ ပၼ်ႁႅင်းၸႂ် ၸုမ်း လဵၼ်ႈႁႅင်း ႁႂ်ႈမေႃဝႆႉၸႂ် လွင်ႈမိုတ်ႈၵိုဝ်း ၸမ်ၸႂ်ပဵၼ်ယႂ်ႇ ၊ လွင်ႈပၢႆးယူႇလီ ၸိူဝ်းၼႆႉ ၶတ်းၸႂ်လဵၼ်ႈၸွမ်းၵၼ်ၵႂႃႇ ၊ ဝၢႆးသေပၢင်ၵႅဝ်ႈယဝ်ႉတူဝ်ႈၼၼ်ႉ ၸုမ်းလုၵ်ႈႁဵၼ်းၼေႃႇတႅၼ်းၶိူဝ်း တင်း လုၵ်ႈႁဵၼ်းသိုၵ်း ငဝ်ႈငုၼ်း လဵၼ်ႈၶဵင်ႇ မၢၵ်ႇၼင်လွမ်ႈၸွမ်းၵၼ်ၵႂႃႇ ဝႃႈၼႆ။
ပၢင်လဵၼ်ႈႁႅင်း ၶႄႉၶႅင်ႇၵၼ်ပွၵ်ႈၼႆႉ ဢဝ်ပဵၼ် ဝၼ်းမၢႆတွင်း ဢဝ်ၵုင်ႇမုၼ် ဝၼ်းၵိူတ်ႇပႃႇတီႇမႂ်ႇသုင်ၸိုင်ႈတႆး ၶူပ်ႇၶွပ်ႈ တဵမ် ( 49 ) ပီႊ ၊ ပႃႇတီႇမႂ်ႇသုင်ၸိုင်ႈတႆး ၼႆႉၶွတ်ႇၽွတ်ႈၶိုၼ်ႈမႃး မိူဝ်ႈပီႊ 1971 – လိူၼ်ဢေႃးၵၢသ်ႉ -16 ဝၼ်း သေ ၵွပ်ႈ ပိူဝ်ႈ တႃႇတေဢွၼ်ႁူဝ်တပ်ႉသိုၵ်း ၼိုင်ႈလုၵ်ႈၼႆႉ တိုၼ်းလူဝ်ႇမီးပႃႇတီႇဢွၼ်ႁူဝ်ယုမ်ႇယမ်ၸိူင်ႉၼႆ လႄႈၸင်ႇလႆႈ ၶွတ်ႇၽွတ်ႈမီးမႃးယူႇ ဝႃႈၼႆ။
