ၶၢဝ်ႇ-SSPP info
June 29, 2020
ၾႆးမႆႈႁိူၼ်းၵူၼ်းဝၢၼ်ႈၼမ်ႉၶမ်းဢွၼ်ႇ ဢိူင်ႇၸေႈဢူ ၸေႈဝဵင်းမၢႆ(16) SSPP/SSA တူင်ႇဝဵင်း သႅၼ်ဝီ ၸိုင်ႈတႆးပွတ်းႁွင်ႇ။
ဝၼ်းထီႉ 27.6.2020 ၶၢဝ်းယၢမ်း11 မူင်းၵၢင်ၶိုၼ်းၼၼ်ႉ ၾႆးမႆႈႁိူၼ်း လုင်းလွႆၸၢႆး ဢႃႇယူႉ(69)ၶူပ်ႇ၊ ၼၢႆးလွႆသႂ် ဢႃႇယူႉ(70)ၶူပ်ႇ ယူႇဝၢၼ်ႈၼမ်ႉၶမ်းဢွၼ်ႇ ဢိူင်ႇၸေႈဢူႈၼၼ်ႉ ၶူဝ်းၶွင်လႆႈလူႉသုမ်းၵႂႃႇ ၸွမ်းၾႆး လူတ်ႉၶိူင်ႈ(3)လမ်း၊ ၽုၼ်ႇထၢတ်ႈ(5)ထူင်၊ ၶဝ်ႈပိူၵ်ႇ(3)ထူင်၊ ၸၢၵ်ႈလိူဝ်ႈမႆႉ(1)လုၵ်ႈ၊ ၸၢၵ်ႈ ႁူတ်းယိူဝ်ႈ(1)လုၵ်ႈ၊ ၸၢၵ်ႈတီႇယိူဝ်ႈ(1)လုၵ်ႈ၊ ၶဝ်ႈသၢၼ်လႄႈၶူဝ်းႁိူၼ်းၽိူၼ်ဝၢၼ်ႇ ဢမ်ႇတၼ်းလႆႈ သင် ၵႃႈၶၼ်ဢၼ်လႆႈသုမ်း ၸွမ်းၾႆးမႆႈၵႂႃႇၼၼ်ႉဢမ်ႇယွမ်း(200)သႅၼ် လႆႈႁူႉၼင်ႇၼႆ။
ၵူၼ်းဝၢၼ်ႈၵေႃႉၼိုင်ႈလၢတ်ႈဝႃႈ“လွင်ႈၾႆးလႆႈမႆႈႁိူၼ်းပူႇလွႆၸၢႆးၶဝ်ၼႆႉ မၼ်းပဵၼ်ၾႆးၾႃႉသွတ်ႉသေ တႅၵ်ႇ လၢမ်းမႆႈပႃးပုင်းၼမ်ႉမၼ်းထၢတ်ႈလႄႈလူတ်ႉၶိူင်ႈသေ လၢမ်းမႆႈႁိူၼ်း၊ ၾႆးၾႃႉၼႆႉ ပဵၼ်ဢၼ် ၵုမ်ႇမၼီႊ(JICS) Japan ၶဝ်မႃးၸွႆႈထႅမ် ပူၼ်ႉမႃး(2)ပၢႆၼၼ်ႉယဝ်ႉ၊ ၵိုင်ႉၵၢင်ႉမႆႈႁႅင်းၼႃႇလႄႈ ၸဝ်ႈ ႁိူၼ်းၵေႃႈဢမ်ႇတၼ်းလႆႈၶူဝ်းသင်”ဝႃႈၼႆ။
ဝၼ်းထီႉ 28.6.2020 ၶၢဝ်းယၢမ်း(9)မူင်းၼၼ်ႉ ၸိူဝ်းပဵၼ်ၽူႈတၢင်တူဝ် ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး ၽူႈၵွၼ်းဢိူင်ႇ လုင်းၸၢႆးၵျေႃႇ ဢွၼ်ႁူဝ် ၵေႃႇမတီႇဢိူင်ႇ၊ ၵေႃႇမတီႇၸုမ်းလႄႈ ၵေႃႇမတီႇဝၢၼ်ႈ ဢိၵ်ႇပႃးသိုၵ်းၵူၼ်းမိူင်းသေ ၵႂႃႇၸွႆႈထႅမ်ၽဵဝ်ႈပတ်းၸိူဝ်းၾႆးမႆႈၼၼ်ႉ တေႃႇထိုင် ယၢမ်းဝၢႆးဝၼ်း(3)မူင်းၶိုင်ႈ၊ ယူႇတီႈၽူႈၸတ်းၵၢၼ်ၸေႈဝဵင်းမၢႆ(16)သႅၼ်ဝီၵေႃႈ ၸွႆႈထႅမ်ၶဝ်ႈသၢၼ်(2) ထူင်လႄႈငိုၼ်း 100000(ၼိုင်ႈသႅၼ်)ပျႃး ယူႇယဝ်ႉ။ႁိူၼ်းပူႇလွႆၸၢႆး+ၼၢႆးလွႆသႂ်ၼႆႉ ႁဵတ်းယဝ်ႉဢမ်ႇပႆႇပေႃးႁိုင် တၢမ်တူဝ်(2)ထဝ်ႈ ထွၵ်ႇႁႅင်းလိူဝ်ႈမႆႉႁင်း ၵူၺ်းသေ မီးလၢၼ်ၸၢႆးၶႃ ၸၢႆးၵျေႃႇလူၼ်း ဢႃႇယူႉ(20)ၶူပ်ႇ ယူႇၸွမ်းလႄႈ မီးၵူၼ်းႁိူၼ်း(3)ၵေႃႉယူႇ ၸွမ်းၵၼ်ယူႇယဝ်ႉ။
