ၶၢဝ်ႇ – SSPP info
ဝၼ်းထီႉ – 31- 07 -2020
မိူဝ်ႈဝႃး လိူၼ်ၵျူႇလၢႆႇ(30)ဝၼ်း ယၢမ်းဝၢႆးဝၼ်း(4)မူင်းၶိုင်ႈၼၼ်ႉ မၢၵ်ႇတႅၵ်ႇတီႈဝၢၼ်ႈ ၶူဝ်တိုင် ၸေႈဝဵင်း ၵူတ်ႉၶၢႆ ၸိုင်ႈတႆးပွတ်းႁွင်ႇသေ ႁဵတ်းႁႂ်ႈလုၵ်ႈဢွၼ်ႇ မၢတ်ႇၸဵပ်း(5)ၵေႃႉ၊ လူႉတၢႆၵႂႃႇ (1)ၵေႃႉၼႆယဝ်ႉ။
ၵူၼ်းဝၢၼ်ႈ ၶူဝ်တိုင် လုင်းဢၢႆႈၶျုင်းလၢတ်ႈဝႃႈ“ လုၵ်ႈဢွၼ်ႇ(6)ၵေႃႉ ဢွၼ်ၵၼ်ယဝ်ႉယွၵ်ႇလဵၼ်ႈၵၼ် တီႈ ၼမ်ႉမေႃႇႁိမ်းၶၢင်ႈႁိူၼ်းသေ ႁဝ်းၶႃႈငိၼ်းသဵင်တႅၵ်ႇမေႃးလင်လႄႈဢွၼ်ၵၼ်ၵႂႃႇတူၺ်း လုၵ်ႈဢွၼ်ႇပေႃး မၢတ်ႇၸဵပ်း လူမ်ႉသဵင်ႈယဝ်ႉ၊ ၵူၼ်းဝၢၼ်ႈၵမ်ႉပႃႈၼမ် ဢွၼ်ၵၼ်ၵႂႃႇႁဵတ်းၵၢၼ် ပိူင်ပဵၼ်မၢၵ်ႇတႅၵ်ႇ မီးၸိူင်ႉ ႁိုဝ်တႄႉတႄႉ ႁဝ်းၶႃႈၵေႃႈပႆႇလႆႈႁူႉ” လၢတ်ႈၼင်ႇၼႆ။
လုၵ်ႈဢွၼ်ႇၸိူဝ်ႉတိူဝ်ႉမၢတ်ႇၸဵပ်းၼၼ်ႉ ၵဵင် ဢႃႇယူႉ(4)ပီလႄႈ ဢီႇလၢဝ် ဢႃႇယူႉ(2)ပီတႄႉၵေႃႈ ဢမ်ႇ ပေႃးမၢတ်ႇၸဵပ်းႁၢဝ်ႈႁႅင်း ယူတ်းယႃဝႆႉတီႈဝၢၼ်ႈၵူၺ်း၊ လိူဝ်ၼၼ်ႉ ၵျေႃႇထုၼ်း ဢႃႇယူႉ(7)ၶူပ်ႇ ဢေးလၢဝ် ဢႃႇယူႉ(8)ၶူပ်ႇ ဢွင်ႇၼၢႆႇ ဢႃႇယူႉ(5)ၶူပ်ႇၸိူဝ်းၼႆႉ ယွၼ်ႉမၢတ်ႇၸဵပ်းႁၢဝ်ႈႁႅင်းလႄႈ လႆႈသူင်ႇယႃတူဝ်ဝႆႉ တီႈဝဵင်းလႃႈသဵဝ်ႈၼႆယူႇယဝ်ႉ၊ၵေႃႉပဵၼ်ၼၢင်းၵဵင်ၶမ်း ဢႃႇယူႉ(5)ပီၵေႃႈ မၢတ်ႇၸဵပ်းႁၢဝ်ႈႁႅင်းမိူၼ်ၵၼ် သေ ၽွင်းသူင်ႇယႃတူဝ်တူဝ် တီႈႁူင်းယႃလူင် ဝဵင်းၵူတ်ႉၶၢႆၼၼ်ႉ လႆႈလူႉတၢႆၵႂႃႇ ယၢမ်းၵၢင်ၶမ်း 9:40 လႆႈ ႁူႉၼင်ႇၼႆ၊ ၼၢင်းၵဵင်ၶမ်းၼႆႉ ပေႃႈမႄႈမၼ်းၼၢင်း ယူႇသဝ်းတင်းတႃႈၶီႈလဵၵ်းၼႆသေ ၽွင်းမႃးယူႇၸွမ်း ၵေႃႉပဵၼ်ပူႇ တီႈဝၢၼ်ႈၶူဝ်တိုင်ၼၼ်ႉ ၸင်ႇလႆႈထူပ်းၽေးၸိူင်ႉၼႆ။
မိူဝ်ႈပူၼ်ႉမႃးၼိုင်ႈပီၼၼ်ႉ သိုၵ်းမၢၼ်ႈတပ်ႉမ(99) ၶလယ(419) ယၢမ်ႈမႃး ၼွၼ်းလိုဝ်ႈသဝ်း တီႈႁိူၼ်း လင်ဢၼ်မၢၵ်ႇတႅၵ်ႇၼႆႉသေ ဢမ်ႇၵႃး ယၢမ်ႈယၢမ်ႈယူႇတီႈႁိူၼ်းလင်ၼႆႉသေ ပိုတ်းယိုဝ်းပႃးၵွင်ႈ ၼႆယူႇ ယဝ်ႉ။
